ମୁମ୍ବାଇ: ବଲିଉଡ୍ ନିର୍ଦ୍ଦେଶିକା ଭାବେ କିରଣ ରାଓଙ୍କର ଯେତିକି ପରିଚୟ ଅଛି ତା’ଠାରୁ ସେ ଅଧିକ ପରିଚିତ ବଲିଉଡ୍ର ମିଷ୍ଟର ପରଫେକ୍ସନିଷ୍ଟ ଆମିର ଖାଁଙ୍କ ପତ୍ନୀ ଭାବେ । କିରଣ ତେଲେଙ୍ଗାନାରେ ୭ ନଭେମ୍ବର ୧୯୭୩ରେ ଜନ୍ମ ହୋଇଥିଲେ ବି ଦିଲ୍ଲୀରେ ପାଠ ପଢିଛନ୍ତି । ଆଉ ଫିଲ୍ମରେ ରୁଚି ଥିବାରୁ ସେ ମୁମ୍ବାଇ ଆସି ପ୍ରଥମେ ଆସିଷ୍ଟାଣ୍ଡ ଡାଇରେକ୍ଟର ଭାବେ କାମ ଆରମ୍ଭ କରିଥିଲେ । ଆଉ ଏହାପରଠାରୁ ସେ ଆଉ ପଛକୁ ନ ଚାହିଁ ବଲିଉଡରେ ନିଜର କ୍ୟାରିୟର ଗଢିଥିଲେ । କେବଳ କ୍ୟାରିୟର ନୁହେଁ ନିଜ ସଂସାର ବି ଗଢିଲେ ମାୟା ନଗରୀରେ । ନିର୍ଦ୍ଦେଶକ ଆଶୁତୋଷ ଗୋୱାରିକରଙ୍କୁ ଆସିଷ୍ଟ କରୁଥିବା ବେଳେ ଫିଲ୍ମ ‘ଲଗାନ’ର ସେଟରେ ସେ ଆମିରଙ୍କୁ ଭେଟିଥିଲେ । ଆଉ ସେହିଠାରୁ ହିଁ ସେମାନଙ୍କର ବନ୍ଧୁତା ଆରମ୍ଭ ହୋଇ ପରେ ଏହା ପ୍ରେମର ରୂପ ନେଇଥିଲା । ଆଉ ଉଭୟ ଗଢିଥିଲେ ଏକ ସୁନ୍ଦର ସଂସାର । ଲଗାନର ଶୁଟିଂ ସମୟରେ ଆମିର ସାମାନ୍ୟ ଅପସେଟ୍ ରହୁଥିଲେ । ସେତେବେଳକୁ ତାଙ୍କ ପ୍ରଥମ ପତ୍ନୀ ରିନାଙ୍କଠାରୁ ସେ ଅଲଗା ହୋଇ ସାରିଥିଲେ । ଆଉ ଏହାରି ଭିତରେ ଆମରିଙ୍କ ଜୀବନ ଖୁବ୍ ଉଥ୍ଥାନ ପତନ ଦେଇ ଗତି କରୁଥିବା ବେଳେ କିରଣ ବଢାଇଥିଲେ ବନ୍ଧୁତାର ହାତ । ଆଉ ଏହି ବନ୍ଧୁତା ପରେ ଜୀବନସାଥୀର ରୂପନେଲା । ୨୦୦୫ରେ ଉଭୟ ବିବାହ କରିନେଲେ । ଉଭୟଙ୍କର ଏକ ପୁଅ ଆଜାଦ ରାଓ ଖାଁ ଥିବା ବେଳେ ୨୦୨୧ରେ ଉଭୟ ଅଲଗା ହୋଇଯାଇଛନ୍ତି । ଯାହାକୁ ନେଇ କିଛିଦିନ ହେବ ଉଭୟ ଚର୍ଚ୍ଚାରେ ରହି ଆସୁଛନ୍ତି । ପୁଅ ଆଜାଦ ଏବେ କିରଣଙ୍କ ପାଖରେ ଥିବା ବେଳେ ଉଭୟ ମିଶି ପିଲାର ଯତ୍ନ ନେବେ ବୋଲି ନିଷ୍ପତ୍ତି ନେଇଛନ୍ତି ।
