ମୁମ୍ବାଇ: ବଲିଉଡ୍ର ଆଗଧାଡିର କୋରିଓଗ୍ରାଫର ଗୀତା କପୁର ୪୭ ବର୍ଷ ବୟସରେ ପଦାର୍ପଣ କରିଛନ୍ତି। ହେଲେ ଆଜି ପର୍ଯ୍ୟନ୍ତ ସେ ବିବାହ କରିନାହାନ୍ତି। ବଲିଉଡ୍ର ପପୁଲାର ଗୀତ ତୁଝେ ୟାଦ ନା ମେରି ଆଇ(କୁଛ କୁଛ ହୋତା ହୈ), ହେ ବେବି(ହେ ବେବି) ଶିଲା କି ଯଓ୍ବାନି(ତିସ ମାର ଖାନ), ଅନାରକଲି ଡିସ୍କୋ ଚଲି(ହାଉସ ଫୁଲ ୨) ଆଦିରେ ନୃତ୍ୟ ନିର୍ଦ୍ଦେଶନା ଦେଇ ସମସ୍ତଙ୍କ ନିକଟତର ହୋଇ ପାରିଛନ୍ତି ଏହି କୋରିଓଗ୍ରାଫର। ମାତ୍ର ୧୫ ବର୍ଷ ବୟସରେ ଫରାହା ଖାନଙ୍କ ଗ୍ରୁପରେ ଯୋଗ ଦେଇଥିବା ଗୀତା କପୁର ଏବେ ଗୀତା ମା’ ଭାବେ ବେଶ୍ ପରିଚିତ। କୁଛ କୁଛ ହୋତା ହୈ, ଦିଲ ତୋ ପାଗଲ ହୈ, କଭି ଖୁସି କଭି ଗମ୍, ମୋହବତେ, କଲ ହୋ ନା ହୋରେ ମଧ୍ୟ ଗୀତାଙ୍କ କାମକୁ ବେଶ୍ ପ୍ରଶଂସା ମିଳିଛି। ପର୍ସନାଲ ଲାଇଫ୍ କଥା କହିଲେ ଆଜି ପର୍ଯ୍ୟନ୍ତ ଅବିବାହିତ ଥିବା ଗୀତାଙ୍କର କୁଆଡେ ଅଭିନେତା ରାଜୀବ ଖିଞ୍ଚିଙ୍କ ସହ ପ୍ରେମ ସମ୍ପର୍କ ଥିଲା ବୋଲି କୁହାଯାଏ। ସୋସିଆଲ ମିଡିଆରେ ଉଭୟଙ୍କ ଫଟୋ ଭାଇରାଲ ହେବା ପରେ ଗଣମାଧ୍ୟମରେ ଗୀତା-ରାଜୀବ ପରସ୍ପରକୁ ଡେଟ୍ କରୁଛନ୍ତି ବୋଲି ମଧ୍ୟ ଦାବି କରାଯାଇଥିଲା। ହେଲେ ଏମାନେ ଏ ସମ୍ପର୍କରେ କିଛି କହି ନ ଥିଲେ। ଅସଲରେ ରାଜୀବ ଜଣେ ଆକ୍ଟର, କୋରିଓଗ୍ରାଫର ଓ ଡାଇରେକ୍ଟର ହୋଇଥିବା ବେଳେ ତାଙ୍କ ହାତରେ କିନ୍ତୁ ସେମିତି କିଛି ବଡ ପ୍ରୋଜେକ୍ଟ ନ ଥିବା ଦେଖାଯାଇଛି। ନ୍ୟୁୟର୍କର ମେଡିସନ ସ୍କୋୟାରରେ ଅନୁଷ୍ଠିତ ପ୍ରଧାନମନ୍ତ୍ରୀ ନରୋନ୍ଦ୍ର ମୋଦିଙ୍କ ଇଭେଣ୍ଟରେ କୋରିଓଗ୍ରାଫର ଭାବେ କାମ ସେ କରିଛନ୍ତି।
