ବିବାହ ପରେ ବର-କନ୍ୟା ବହୁତ ଖୁସିରେ ଥିଲେ। ବିବାହର ୮ ମାସ ମଧ୍ୟରେ ଦୁହେଁ ଏପରି ନିଷ୍ପତ୍ତି ନେବେ ବୋଲି କେହି ଆଶା କରି ନ ଥିଲେ। ଉଭୟଙ୍କ ଦାମ୍ପତ୍ୟ ଜୀବନ ଭଲରେ ଚାଲିଥିଲା। ସ୍ତ୍ରୀ ତାଙ୍କ ଶାଶୁ ଘରେ ଥିବା ବେଳେ ବିବାହ ପରେ ସ୍ବାମୀ କାମ ପାଇଁ ଜମ୍ମୁ କଶ୍ମୀରର କୁପଓ୍ବାରାଠାରେ ପୋଷ୍ଟିଂ ହୋଇଥିଲେ। ଦୁହେଁ ପ୍ରାୟତଃ ଫୋନ୍ରେ କଥା ହେଉଥିଲେ। ତେବେ ସ୍ତ୍ରୀଙ୍କଠାରୁ ଏକ ଫୋନ୍ କଲ୍ ପାଇ ପରେ ଯାହା ଘଟିଲା ଜାଣିଲେ ଆଶ୍ଚର୍ଯ୍ୟ ହେବେ।
ଜମ୍ମୁ କଶ୍ମୀରର କୁପଓ୍ବାରା ଜିଲାର ଏକ ସୀମା ସୁରକ୍ଷା ବଳ (ବିଏସ୍ଏଫ୍) ଯବାନଙ୍କ ସ୍ତ୍ରୀ ରାଜସ୍ଥାନରେ ନିଜ ଘରେ ଆତ୍ମହତ୍ୟା କରିଥିବା ଜାଣିବା ପରେ ନିଜକୁ ଗୁଳି କରି ହତ୍ୟା କରିଛନ୍ତି। ଅଧିକାରୀ କହିଛନ୍ତି, କୁପଓ୍ବାରା ଜିଲାରେ ବିଏସ୍ଏଫ୍ ହେଡ୍ କନଷ୍ଟେବଳ ରାଜେନ୍ଦ୍ର ଯାଦବ ପୋଷ୍ଟିଂ ପାଇଥିଲେ। ଯେତେବେଳେ ସେ ଜାଣିବାକୁ ପାଇଲେ ଯେ ତାଙ୍କ ସ୍ତ୍ରୀ ଅଂଶୁ ମଙ୍ଗଳବାର ରାଜସ୍ଥାନର ଧୀରପୁର ଗ୍ରାମରେ ଥିବା ନିଜ ଘରେ ଫ୍ୟାନ୍ରେ ରଶି ଲଗାଇ ଆତ୍ମହତ୍ୟା କରିଛନ୍ତି, ସେତେବେଳେ ବିଏସ୍ଏଫ୍ ଯବାନ ତାଙ୍କ ସେବା ରିଭଲଭର ସାହାଯ୍ୟରେ ନିଜକୁ ଗୁଳି ଚଳାଇଥିଲେ।
ଅଧିକାରୀ କହିଛନ୍ତି, ସ୍ତ୍ରୀ ଚରମ ପଦକ୍ଷେପ ନେବା ପୂର୍ବରୁ ଫୋନ୍ରେ ଦମ୍ପତିଙ୍କ ମଧ୍ୟରେ ଝଗଡ଼ା ହୋଇଥିଲା। ଅଧିକାରୀ କହିଛନ୍ତି, ବିଏସ୍ଏଫ୍ ଯବାନଙ୍କ ମୃତଦେହ ଗୁରୁବାର ତାଙ୍କ ଘରେ ପହଞ୍ଚିବ।
