କାବୁଲ,୩।୧୧: ଆଫଗାନିସ୍ତାନରେ ତାଲିବାନ ଶାସନ କ୍ଷମତା ଦଖଲ କରିବା ପରେ ଏକ ବଡ ଅସୁବିଧାର ସମ୍ମୁଖୀନ ହୋଇଛି। ମଙ୍ଗଳବାର ଏକ ଭୟଙ୍କର ଆତ୍ମଘାତୀ ବିସ୍ଫୋରଣରେ ପାକିସ୍ତାନ ସମର୍ଥିତ ଆତଙ୍କବାଦୀ ସଂଗଠନ ହକ୍କାନି ନେଟୱାର୍କର ମୁଖ୍ୟ ରଣନୀତିଜ୍ଞ ତଥା ତାଲିବାନ ସରକାରଙ୍କ ଗୃହମନ୍ତ୍ରୀ ହମଦୁଲ୍ଲା ମୁଖଲିସ୍ଙ୍କୁ ହତ୍ୟା କରାଯାଇଛି। କାବୁଲକୁ ତାଲିବାନ ଦଖଲ କରିବା ପରେ ହମଦୁଲ୍ଲା ପ୍ରଥମ ବ୍ୟକ୍ତି ଭାବେ ରାଷ୍ଟ୍ରପତି ଆଶରଫ ଘାନିଙ୍କ କାର୍ଯ୍ୟାଳୟରେ ପ୍ରବେଶ କରିଥିଲେ। ସେ ରାସ୍ତାରେ ଚେୟାରରେ ବସିଥିବାର ଫଟୋ ସୋସିଆଲ ମିଡିଆରେ ବେଶ ଭାଇରାଲ ହୋଇଥିଲା।
ମଙ୍ଗଳବାର ଦିନ କାବୁଲରେ ଗୋଟିଏ ପରେ ଗୋଟିଏ ବିସ୍ଫୋରଣ ହୋଇଥିଲା। ଏହି ବିସ୍ଫୋରଣରେ ଏପର୍ଯ୍ୟନ୍ତ ୨୫ ରୁ ଅଧିକ ଲୋକଙ୍କର ମୃତ୍ୟୁ ଘଟିଛି। କୁହାଯାଉଛି ଯେ ଏହ ମୃତକଙ୍କ ମଧ୍ୟରେ ହମଦୁଲ୍ଲା ମଧ୍ୟ ରହିଛନ୍ତି। ହମଦୁଲ୍ଲା ତାଲିବାନ୍ର ସ୍ବତନ୍ତ୍ର ବାହିନୀ ବଦ୍ରି ବ୍ରିଗେଡର କମାଣ୍ଡର ମଧ୍ୟ ଥିଲେ।
ଏହି ବ୍ରିଗେଡକୁ କାବୁଲରେ ସୁରକ୍ଷା ଦାୟିତ୍ୱ ଦିଆଯାଇଛି। ତାଲିବାନ କମାଣ୍ଡରଙ୍କ ମୃତ୍ୟୁ ହକ୍କାନି ନେଟୱାର୍କକୁ ଏକ ବଡ ଝଟ୍କା ଦେଇଛି। ଏହାପୂର୍ବରୁ ହମଦୁଲ୍ଲା ପାକଟିକା ଏବଂ ଖୋସ୍ତ ପ୍ରଦେଶରେ ତାଲିବାନର କାର୍ଯ୍ୟନିର୍ବାହି ରାଜ୍ୟପାଳ ଥିଲେ।
ଏହି ଆକ୍ରମଣ ପାଇଁ ଇସଲାମିକ ଷ୍ଟେଟ (ଆଇଏସ) ସଂଗଠନର ନିଜକୁ ଦାୟୀ କରିଛି। ତାଲିବାନ ମୁଖପାତ୍ର ଜବିହୁଲ୍ଲା ମୁଜାହିଦ କହିଛନ୍ତି ଯେ, ୪୦୦ ଶଯ୍ୟା ବିଶିଷ୍ଟ ସର୍ଦ୍ଦାର ମହମ୍ମଦ ଦାଉଦ ଖାଁ ହସ୍ପିଟାଲର ପ୍ରବେଶ ଦ୍ୱାରରେ ଏହି ବିସ୍ଫୋରଣ ଘଟିଛି।
ଏହା ପରେ ଇସଲାମିକ ଷ୍ଟେଟ ବନ୍ଧୁକଧାରୀଙ୍କ ଦ୍ୱାରା ଆକ୍ରମଣ ହୋଇଥିଲା। ଆଫଗାନିସ୍ତାନର ତାଲିବାନର ନିୟନ୍ତ୍ରଣ ବିରୋଧରେ ଇସଲାମିକ ଷ୍ଟେଟ ସବୁଠାରୁ ବଡ ବିପଦ ଭାବରେ ଉଭା ହୋଇଛି।