କେନ୍ଦୁଝର,୧୧।୮(ନରେଶ ଚନ୍ଦ୍ର ପଟ୍ଟନାୟକ): ୭୬ତମ ସ୍ବଧୀନତା ଦିବସ ପାଳନ ପରିପ୍ରେକ୍ଷୀରେ ଦେଶରେ ‘ଆଜାଦୀ କା ଅମୃତ ମହୋତ୍ସବ’ କାର୍ଯ୍ୟକ୍ରମ ଅଧୀନରେ ‘ହର ଘର ତ୍ରିରଙ୍ଗା’ ଅଭିଯାନ ଆରମ୍ଭ ହୋଇଯାଇଛି। କାର୍ଯ୍ୟକ୍ରମକୁ ଆହୁରି ବ୍ୟାପକ କରିବା ପାଇଁ ନୂଆଦିଲ୍ଲୀ ସ୍ଥିତ ଡାକ ନିର୍ଦ୍ଦେଶାଳୟ ପରାମର୍ଶ କ୍ରମେ ଡାକ ବିଭାଗ ପକ୍ଷରୁ ବିଭିନ୍ନ ପଦକ୍ଷେପ ଗ୍ରହଣ କରାଯାଉଛି । କାର୍ଯ୍ୟକ୍ରମରେ ସମସ୍ତ ବର୍ଗର ଲୋକଙ୍କୁ ସାମିଲ କରିବା ପାଇଁ କେନ୍ଦୁଝର ଡାକମଣ୍ଡଳ ପକ୍ଷରୁ ଶୁକ୍ରବାର ଏକ ସଚେତନତା ଯାତ୍ରା ଓ ଏକ ବାଇକ୍ ଶୋଭାଯାତ୍ରା ହୋଇଥିଲା।
କାର୍ଯ୍ୟକ୍ରମକୁ ସଫଳ କରିବା ନେଇ ଜନସାଧାରଣଙ୍କୁ ଡାକବିଭାଗ ପକ୍ଷରୁ ଅନୁରୋଧ କରାଯାଉଛି। ଏପରିକି ଡାକଘରୁ ୫୦ ଟଙ୍କା ଦେଇ ତ୍ରିରଙ୍ଗା ପତାକା କିଣି ପାରିବେ। କେନ୍ଦୁଝର ଡାକମଣ୍ଡଳ ଅଧୀକ୍ଷକ ହରିହର ନାୟକ, ସହକାରୀ ଅଧୀକ୍ଷକ ବିଷ୍ଣୁ ପ୍ରସାଦ ନାୟକଙ୍କ ପ୍ରତ୍ୟକ୍ଷ ତତ୍ତ୍ୱାବଧାନ ଏବଂ ପ୍ରଧାନ ଡାକପାଳ ଦୁର୍ଯ୍ୟୋଧନ ସେଠୀଙ୍କ ସହଯୋଗରେ ବ୍ୟବସାୟୀକ କାର୍ଯ୍ୟନିବାହୀ ଅଧିକାରୀଙ୍କ ସଂଯୋଜନାରେ କେନ୍ଦୁଝର ପ୍ରଧାନ ଡାକଘର ନିକଟରୁ ଏକ ଶୋଭାଯାତ୍ରା ବାହାରି କଚେରୀ ଛକ, ମହାତ୍ମାଗାନ୍ଧୀ ଛକ, ଜିଲା ଆରକ୍ଷୀ କାର୍ଯ୍ୟାଳୟ, ଜିଲାପାଳଙ୍କ କାର୍ଯ୍ୟାଳୟ ରୋଡ ପରିକ୍ରମା କରିଥିଲା।