ଆନନ୍ଦପୁର,୭ା୮(ସ୍ବ.ପ୍ର.): କେନ୍ଦୁଝର ଜିଲା ଆନନ୍ଦପୁର ଥାନା ଅନ୍ତର୍ଗତ ଆଦିବାସୀ ଅଧ୍ୟୁଷିତ ମନୋହରପୁର ପୁଣି ଚର୍ଚ୍ଚାର ପରିସରକୁ ଆସିଛି। ୧୯୯୯ ମସିହାରେ ଗ୍ରାହାମ ଷ୍ଟୁଆର୍ଟ ଷ୍ଟେନସ୍ ଓ ତାଙ୍କ ଦୁଇ ଶିଶୁ ପୁତ୍ର ଟିମୋଥି ଓ ଫିଲିପ୍ଙ୍କୁ ଗାଡ଼ି ଭିତରେ ଶୋଇଥିବା ଅବସ୍ଥାରେ ଜାଳିଦେବା ଘଟଣା ସାରା ଦେଶରେ ଚର୍ଚ୍ଚିତ ଖବର ପାଲଟିଥିବାବେଳେ ଏବେ ସେଠାରେ ଥିବା ଚର୍ଚ୍ଚ କାନ୍ଥରେ ହରହର ମହାଦେବ ଓ ଜୟ ଶ୍ରୀରାମ ଲେଖାକୁ ନେଇ ପୁଣି ଚର୍ଚ୍ଚାକୁ ଆସିଛି। ଧାର୍ମିକ ଭାବନାକୁ ପ୍ରଭାବିତ କରାଯାଇଥିବା ଅନୁଭବ କରି ଚର୍ଚ୍ଚର ମୁଖ୍ୟ ଚୈତନ୍ୟ ମୁର୍ମୁ ଆନନ୍ଦପୁର ଥାନାରେ ଅଭିଯୋଗ କରିଥିଲେ। ପୋଲିସ କେସ୍ ନଂ ୧୫୮/୨୧ରେ ଏକ ମାମଲା ରୁଜୁ କରି ଘଟଣାର ତଦନ୍ତ ଆରମ୍ଭ କରିଥିବାବେଳେ ଦୁଇ ଜଣଙ୍କୁ ଗିରଫ କରିଥିବା ସୂଚନା ମିଳିଛି। ଗିରଫ ଦୁଇ ଜଣ ହେଲେ ମନୋହରପୁର ଗ୍ରାମର ରାମସିଂ ମୁର୍ମୁ ଓ ପୁରୀ ଜିଲା ଦେବସେନାର ଦେବୀପ୍ରସାଦ ଦାଶ। ନିକଟରେ ଦେବୀପ୍ରସାଦ କେନ୍ଦୁଝର ଜେଲରେ ଷ୍ଟେନସ୍ ପୋଡ଼ି ଘଟଣାରେ ରହିଥିବା ଦାରା ସିଂଙ୍କୁ ଦେଖା କରିବାକୁ ଆସିଥିଲେ। ପରେ ଏଭଳି ଘଟଣା ସାଧାରଣରେ ଆଲୋଡ଼ନ ସୃଷ୍ଟି କରିଛି। ଚର୍ଚ୍ଚ କାନ୍ଥରେ ଲେଖାଯିବା ସହିତ ଅଭିଯୁକ୍ତମାନେ ୧୯୯୯ ମସିହା ଘଟଣାର ପୁନରାବୃତ୍ତି ହେବାର ଧମକ ଦିଆଯାଇଥିବା ଅଭିଯୋଗ ହୋଇଛି ବୋଲି ଥାନାଧିକାରୀ ମନୋରଞ୍ଜନ ପ୍ରଧାନ ସୂଚନା ଦେଇଛନ୍ତି।