ଚେନ୍ନାଇ, ୧୫।୮: ଇଣ୍ଡିଆନ୍ ପ୍ରିମିୟର ଲିଗ୍ (ଆଇପିଏଲ୍)ର ତ୍ରୟୋଦଶ ସଂସ୍କରଣ ଆସନ୍ତା ମାସରୁ ୟୁଏଇରେ ଆରମ୍ଭ ହେବ। ଏଥିଲାଗି ଅଗଷ୍ଟ ୨୦ରେ ଚେନ୍ନାଇ ସୁପର୍ କିଙ୍ଗ୍ସ୍ (ସିଏସ୍କେ) ଦଳ ୟୁଏଇ ଅଭିମୁଖେ ଗସ୍ତ କରିବାର କାର୍ଯ୍ୟସୂଚୀ ରହିଛି। ତେବେ ଏଥିପୂର୍ବରୁ ସୁପର୍ କିଙ୍ଗ୍ସ ଦଳ ଶନିବାରଠାରୁ ସ୍ଥାନୀୟ ଏମ୍.ଏ. ଚିଦାମ୍ବରମ ଷ୍ଟାଡିୟମରେ ପ୍ରସ୍ତୁତି ଶିବିର ଆରମ୍ଭ କରିଛି। ପୂର୍ବରୁ ବ୍ୟକ୍ତିଗତ କାରଣ ଲାଗି ଚେନ୍ନାଇର ଷ୍ଟାର୍ ଅଲ୍ରାଉଣ୍ଡର ରବୀନ୍ଦ୍ର ଜାଡେଜା ଏହି କ୍ୟାମ୍ପରେ ଯୋଗ ଦେଇପାରିବେନି ବୋଲି ଜଣାପଡ଼ିଥିଲା। ଏବେ ଆଉ ୨ ଜଣ ସିଏସ୍କେ ଖେଳାଳି ଏହି କ୍ୟାମ୍ପ୍ର ଅଂଶଗ୍ରହଣ କରିବେ ନାହିଁ ବୋଲି ରିପୋର୍ଟ ପ୍ରକାଶ ପାଇଛି। ସେମାନେ ହେଲେ ଦଳର ଅଭିଜ୍ଞ ସ୍ପିନର ହରଭଜନ ସିଂ ଓ ଦ୍ରୁତ ବୋଲର ଶାର୍ଦ୍ଦୁଳ ଠାକୁର। ‘ଉଭୟ ମଧ୍ୟ କିଛି ବ୍ୟକ୍ତିଗତ କାରଣ ଲାଗି ଦଳସହ ଯୋଗ ଦେଇପାରିବେନି। କିନ୍ତୁ ଅଗଷ୍ଟ ୧୯ରେ କ୍ୟାମ୍ପ୍ରେ ସାମିଲ ହେବେ’ ବୋଲି ସିଏସ୍କେ ପକ୍ଷରୁ କୁହାଯାଇଛ। ୩୯ ବର୍ଷୀୟ ହରଭଜନ ୧୬୦ ଆଇପିଏଲ୍ ମ୍ୟାଚ୍ ଖେଳି ୧୫୦ ଉଇକେଟ୍ ଅକ୍ତିଆର କରିଛନ୍ତି। ୧୮ ରନ ବ୍ୟୟରେ ୫ ଉଇକେଟ୍ ହାସଲ ତାଙ୍କର ଶ୍ରେଷ୍ଠ ପ୍ରଦର୍ଶନ ରହିଛି। ସେହିଭଳି ୨୦୧୬ରେ ଶେଷଥର ପାଇଁ ଭାରତୀୟ ଦଳ ପକ୍ଷରୁ ଖେଳିଥିବା ଏହି ଷ୍ଟାର୍ ସ୍ପିନର ଟେଷ୍ଟରେ ୪୧୭ ଓ ଦିନିକିଆରେ ୨୬୯ ଉଇକେଟ୍ ନେଇଛନ୍ତି।
