କୁଲୁ,୧୦ା୧୨: ହିମାଚଳପ୍ରଦେଶ ବିଧାନସଭା ନିର୍ବାଚନରେ ଆମ୍ ଆଦ୍ମୀ ପାର୍ଟି (ଏଏପି) ପ୍ରଥମ ଥର ପ୍ରତିଦ୍ୱନ୍ଦ୍ୱିତା କରିଥିବାବେଳେ ରାଜ୍ୟର ତୃତୀୟ ତଥା ଶ୍ରେଷ୍ଠ ବିକଳ୍ପ ଦଳ ଭାବେ ନିଜକୁ ଉପସ୍ଥାପିତ କରିଥିଲା। ତେବେ ନିର୍ବାଚନ ଫଳାଫଳ ଏହି ଦଳ ପାଇଁ ଶକ୍ତ ଧକ୍କା ହୋଇଛି। ଦଳ ଏଠାରେ ଖାତା ଖୋଲିବାକୁ ସକ୍ଷମ ହୋଇ ନ ଥିବାବେଳେ ସମସ୍ତ ୬୭ ଜଣ ପ୍ରାର୍ଥୀ ଅମାନତ ହରାଇଛନ୍ତି। କାରଣ ଜଣେ ହେଲେ ମୋଟ ବୈଧ ଭୋଟର ସର୍ବନିମ୍ନ ୬ ଭାଗରୁ ଭାଗେ ଭୋଟ ପାଇନାହାନ୍ତି। ଏଏପି ଟିକେଟରେ ଲଢ଼ିଥିବା ପୂର୍ବତନ ଲୋକ ସଭା ସଦସ୍ୟ ରାଜନ ସୁଶାନ୍ତ ମଧ୍ୟ ହାରିଯାଇଛନ୍ତି। ପଞ୍ଜାବରେ ଏଏପି କ୍ଷମତାରେ ଥିବାବେଳେ ଏହାର ପଡୋଶୀ ରାଜ୍ୟ ଉପରେ କୌଣସି ପ୍ରଭାବ ପଡ଼ିନାହିଁ। ଏଏପି ଆବାହକ ତଥା ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିଓ୍ବାଲ ବାରମ୍ବାର ହିମାଚଳପ୍ରଦେଶ ଯାଇ ଏକାଧିକ ରୋଡ୍ ଶୋ’ କରିଥିଲେ। ତେବେ ପ୍ରଚାର ମଧ୍ୟଭାଗରୁ ଦଳ ନିରାଶ ହୋଇପଡ଼ିଥିଲା। ପ୍ରଚାର ଶେଷ ପର୍ଯ୍ୟାୟରେ କେବଳ ଭାଜପା ଏବଂ କଂଗ୍ରେସ ରାଲି କରିଥିଲେ।