ଖୋର୍ଦ୍ଧା ଅଫିସ,୧୩ା୧୦: ଓଡ଼ିଶା ଲୋକସେବା ଆୟୋଗ (ଓପିଏସ୍ସି) ଦ୍ୱାରା ପରିଚାଳିତ ଓଡ଼ିଶା ସିିଭିଲ ସର୍ଭିସ (ଓସିଏସ୍) ପରୀକ୍ଷା-୨୦୨୦ର ଫଳାଫଳ ପ୍ରକାଶ ପାଇଛି। ଏଥିରେ ଖୋର୍ଦ୍ଧା ବ୍ଲକ ଅନ୍ତର୍ଗତ ନନ୍ଦପୁର ଗ୍ରାମର ସବିତା ଦଳେଇ ୨୭୩ ର଼୍ୟାଙ୍କରେ ରହିଛନ୍ତି। ସବିତାଙ୍କ ପିତା ଗଣେଶ ଦଳେଇ ଜଣେ ବ୍ୟବସାୟୀ ଏବଂ ମାଆ ରଜନୀ ଗୃହିଣୀ। ସେ ଗାଁ ସ୍କୁଲରୁ ମାଟ୍ରିକ ଓ ପ୍ରାଣନାଥ ସ୍ବୟଂଶାସିତ ମହାବିଦ୍ୟାଳୟରୁ ସ୍ନାତକରେ ଉତ୍ତୀର୍ଣ୍ଣ ହେବା ପରେ ଖୋର୍ଦ୍ଧା ଉପ-ନିବନ୍ଧକଙ୍କ କାର୍ଯ୍ୟାଳୟରେ କନିଷ୍ଠ କିରାଣି ଭାବେ କାର୍ଯ୍ୟରତ ଅଛନ୍ତି। ୨୦୧୯ରେ ସେ ଓସିଏସ୍ ପରୀକ୍ଷା ଦେଇ ଅସଫଳ ହୋଇଥିବା ବେଳେ ସମ୍ପ୍ରତି ଏହି ସଫଳତା ହାସଲ କରିଛନ୍ତି। ସବିତାଙ୍କ ତିନି ଭଉଣୀ ବର୍ତ୍ତମାନ ପ୍ରଶାସନିକ ସେବାରେ କାର୍ଯ୍ୟରତ ଅଛନ୍ତି। କଲେଜ ପାଠପଢା ସମୟରେ ତାଙ୍କର ପ୍ରଶାସନିକ ସେବା ପ୍ରତି ଆଗ୍ରହ ବଢିଥିଲା। ସଫଳତାରେ ସେ ଖୁବ୍ ଖୁସି ବୋଲି କହିବା ସହ ଏଥିଲାଗି ଭଗବାନଙ୍କ ଆଶୀର୍ବାଦ, ପରିବାର ଏବଂ କାର୍ଯ୍ୟାଳୟ କର୍ମଚାରୀଙ୍କ ପ୍ରେରଣାକୁ ଶ୍ରେୟ ଦେଇଛନ୍ତି। ମହିଳା ଓ ଶିଶୁ ବିଭାଗ କ୍ଷେତ୍ରରେ କାର୍ଯ୍ୟ କରିବାକୁ ସେ ଆଗ୍ରହ ରଖିଛନ୍ତି। ଆଗକୁ ଆଇଏଏସ୍ ଅଫିସର ହେବାକୁ ଲକ୍ଷ୍ୟ ରଖିଥିବା ସବିତା କହିଛନ୍ତି। ସାକ୍ଷାତକାର ସମୟରେ ମୁଁ ଟିକିଏ ନର୍ଭସ ହୋଇପଡ଼ିଥିଲି। ମୋର ଜିଓଗ୍ରାଫି ଓ ହୋମ ସାଇନ୍ସ ବିଷୟ ରହିଥିବାରୁ ପ୍ରାୟତଃ ବିଷୟଗତ ପ୍ରଶ୍ନ ପଚରାଯାଇଥିଲା। ଅଶୀ ପ୍ରତିଶତ ପ୍ରଶ୍ନର ଉତ୍ତର ଦେଇଥିଲି। ସରକାରୀ ଚାକିରି ସହିତ ପ୍ରସ୍ତୁତି ଜାରି ରଖିଥିଲି। ଯେତେବେଳେ ସମୟ ମିଳୁଥିଲା, ଅନଲାଇନ ପାଠପଢା ଉପରେ ଗୁରୁତ୍ୱ ଦେଉଥିଲି। ଅନେକ ରାତି ଉଜାଗର ରହି ପରିଶ୍ରମ କରିଛି। କଠିନ ଅଧ୍ୟବସାୟ, ନିରନ୍ତର ପ୍ରୟାସ ଓ ନିଷ୍ଠା ରହିଲେ ସଫଳତା ନିଶ୍ଚୟ ମିଳିବ। ତେବେ ସେଥିଲାଗି ଧୈର୍ଯ୍ୟ ଆବଶ୍ୟକ। ପ୍ରଥମ ଅସଫଳତାରେ ଭାଙ୍ଗି ନ ପଡ଼ି ପୁଣି ନିଜକୁ ପ୍ରସ୍ତୁତ କରି ଆଗେଇବାକୁ ପଡ଼ିବ ବୋଲି ସବିତା ପ୍ରକାଶ କରିଛନ୍ତି।