ଦୁବାଇ,୨୮।୧୦: ଅଲରାଉଣ୍ଡର ହାର୍ଦ୍ଦିକ ପାଣ୍ଡ୍ୟା ଚଳିତ ମାସରେ ପ୍ରଥମ ଥର ନେଟ୍ସରେ ବୋଲିଂ କରିଛନ୍ତି। ଏଥିଯୋଗୁ ନ୍ୟୁଜିଲାଣ୍ଡ ବିପକ୍ଷ ମ୍ୟାଚ୍ରେ ତାଙ୍କ ଖେଳିବାର ସମ୍ଭାବନା ବୃଦ୍ଧି ପାଇଛି। କାରଣ ତାଙ୍କର ଉପସ୍ଥିତି ଦଳକୁ ୬ଷ୍ଠ ବୋଲିଂ ବିକଳ୍ପ ଦେଉଛି। ପ୍ରଥମ ମ୍ୟାଚ୍ରେ ପାକିସ୍ତାନ ଠାରୁ ଶୋଚନୀୟ ପରାଜୟ ବରଣ କରିଥିବା ଟିମ୍ ଇଣ୍ଡିଆକୁ ପରବର୍ତ୍ତୀ ମ୍ୟାଚ୍ରେ ନିଶ୍ଚିତ ବିଜୟ ଦରକାର। ହାର୍ଦ୍ଦିକ ବୋଲିଂ କରୁ ନ ଥିବାରୁ ଭାରତୀୟ ଦଳର ସନ୍ତୁଳନ ବିଗିଡ଼ି ଯାଇଛି।
ହାର୍ଦ୍ଦିକ ଶେଷ ଥର ଜୁଲାଇରେ ଶ୍ରୀଲଙ୍କା ବିପକ୍ଷ ସିରିଜ୍ରେ ବୋଲିଂ କରିଥିଲେ। କିନ୍ତୁ ଆଇପିଏଲର ୟୁଏଇ ଲେଗ୍ରେ ମୁମ୍ବାଇ ଇଣ୍ଡିଆନ୍ସ ପାଇଁ ସେ ଥରେ ହେଲେ ବୋଲିଂ କରି ନ ଥିଲେ। ଏହାବାଦ୍ ପାକିସ୍ତାନ ବିପକ୍ଷ ମ୍ୟାଚ୍ରେ ତାଙ୍କ କାନ୍ଧରେ ଆଘାତ ଲାଗିଥିଲା। ଫଳରେ ସେ ଫିଲ୍ଡିଂ କରିବାକୁ ଓହ୍ଲାଇ ନ ଥିଲେ।
ବୁଧବାର ଷ୍ଟ୍ରେନ୍ଥ ଓ କଣ୍ଡିସନିଂ କୋଚ୍ ସୋହମ ଦେସାଇ ଓ ଫିଜିଓ ନୀତିନ ପଟେଲଙ୍କ ତତ୍ତ୍ୱାବଧାନରେ ହାର୍ଦ୍ଦିକ ଶର୍ଟ ସ୍ପ୍ରିଣ୍ଟ କରିଥିଲେ। ତା’ ପରେ ଭୁବନେଶ୍ୱର କୁମାର ଓ ଶାର୍ଦ୍ଦୁଳ ଠାକୁରଙ୍କ ସହ ମିଶି ୨୦ ମିନିଟ୍ ଧରି ବୋଲିଂ କରିଥିଲେ।
