ସାଉଥମ୍ପଟନ୍,୮।୭: ରୋହିତ ଶର୍ମାଙ୍କ ଅଧିନାୟକତ୍ୱରେ ପ୍ରଥମ ଟି-୨୦ ମ୍ୟାଚରେ ଭାରତୀୟ ଦଳ ଇଂଲଣ୍ଡକୁ ୫୦ ରନରେ ପରାସ୍ତ କରିଛି। ଏହି ମ୍ୟାଚରେ ଭାରତର ତାରକା ଅଲରାଉଣ୍ଡର ହାର୍ଦ୍ଦିକ ପାଣ୍ଡ୍ୟା ଉଭୟ ବଲ ଏବଂ ବ୍ୟାଟ ସହିତ ଏକ ଚମତ୍କାର ଖେଳ ପ୍ରଦର୍ଶନ କରିଥିଲେ। ସେ ତାଙ୍କ ପ୍ରଦର୍ଶନ ସହିତ ସମସ୍ତଙ୍କ ହୃଦୟ ଜିତିଥିଲେ। ମ୍ୟାଚରେ ହାର୍ଦ୍ଦିକ ଏକ ନିଆରା ରେକର୍ଡ ସୃଷ୍ଟି କରିଥିଲେ।
ରୋହିତ ଶର୍ମା ଟସ ଜିତି ପ୍ରଥମେ ଇଂଲଣ୍ଡ ବିପକ୍ଷରେ ବ୍ୟାଟିଂ କରିବାକୁ ନିଷ୍ପତ୍ତି ନେଇଥିଲେ। ଏହି ନିଷ୍ପତ୍ତି ଭାରତୀୟ ବ୍ୟାଟ୍ସମ୍ୟାନଙ୍କ ଦ୍ୱାରା ସଠିକ ପ୍ରମାଣିତ ହୋଇଥିଲା। ହାର୍ଦ୍ଦିକ ପାଣ୍ଡ୍ୟା ମଧ୍ୟ ମ୍ୟାଚ୍ରେ ୫୧ ରନ୍ର ଏକ ଇନିଂସ ଖେଳିଥିଲେ। ଏଥିରେ ୬ଟି ଚୌକା ଓ ଗୋଟିଏ ଛକା ସାମିଲ ଥିଲା। ଟି-୨୦ ଅନ୍ତର୍ଜାତୀୟ କ୍ରିକେଟରେ ଏହା ତାଙ୍କର ପ୍ରଥମ ଅର୍ଦ୍ଧଶତକ।
ବ୍ୟାଟିଂ ପରେ ହାର୍ଦ୍ଦିକ ପାଣ୍ଡ୍ୟା ଚମତ୍କାର ବୋଲିଂ ମଧ୍ୟ କରିଥିଲେ। ସେ ଚାରି ଓଭରରେ ୩୩ ରନ ଦେଇ ୪ଟି ଉଇକେଟ ନେଇଥିଲେ। ହାର୍ଦ୍ଦିକ ନିଜର ପ୍ରଥମ ଓଭରରେ ଲିଆମ ଲିଭିଙ୍ଗଷ୍ଟୋନ ଏବଂ ଡେଭିଡ ମାଲାନଙ୍କ ଉଇକେଟ ନେଇଥିଲେ। ସେ ନିଜର ତୀକ୍ଷ୍ଣ ବୋଲିଂ ସହ ଇଂଲଣ୍ଡର ବ୍ୟାଟିଂ ଅର୍ଡରର ମେରୁଦଣ୍ଡ ଭାଙ୍ଗିଥିଲେ।
ଅର୍ଦ୍ଧଶତକ ହାସଲ ପରେ ଗୋଟିଏ ମ୍ୟାଚରେ ୪ଟି ଉଇକେଟ ନେଇଥିବା ହାର୍ଦ୍ଦିକ ପାଣ୍ଡ୍ୟା ପ୍ରଥମ ଭାରତୀୟ ଖେଳାଳି ହୋଇଛନ୍ତି। ତାଙ୍କ ପୂର୍ବରୁ ଯୁବରାଜ ସିଂ ମଧ୍ୟ ୨୦୦୯ରେ ଶ୍ରୀଲଙ୍କା ବିପକ୍ଷରେ ୬୦ ରନ୍ର ଇନିଂସ ସହ ୩ଟି ଉଇକେଟ ନେଇଥିଲେ। ହାର୍ଦ୍ଦିକ ପାଣ୍ଡ୍ୟା ଏବେ ଭଲ ଫର୍ମରେ ଅଛନ୍ତି। ତାଙ୍କ ଅଧିନାୟକତ୍ୱରେ ଗୁଜରାଟ ଟାଇଟାନ୍ସ ଆଇପିଏଲରେ ଟାଇଟଲ ଜିତିଥିଲା।