ନୂଆଦିଲ୍ଲୀ,୧୮।୧୦: ତାରକା ଅଲରାଉଣ୍ଡର ହାର୍ଦ୍ଦିକ ପାଣ୍ଡ୍ୟାଙ୍କୁ ଟି-୨୦ ବିଶ୍ୱକପରେ ଭାରତ ଏକାଦଶ ଟିମ୍ରେ ସୁଯୋଗ ମିଳିବା ଉଚିତ। ହେଲେ ଉଭୟ ଅଭ୍ୟାସ ମ୍ୟାଚ୍ରେ ବୋଲିଂ କରିପାରିଲେ ତାଙ୍କୁ ଏହି ସୁଯୋଗ ଦିଆଯିବା ଉଚିତ ବୋଲି ପୂର୍ବ ଓପନର୍ ଗୌତମ ଗମ୍ଭୀର କହିଛନ୍ତି।
୨୦୧୯ରେ ଅଣ୍ଟାର ସର୍ଜରୀ କରାଇଥିଲେ ହାର୍ଦ୍ଦିକ। ଏହାପରଠାରୁ ସେ ନିୟମିତ ଭାବେ ଭାରତୀୟ ଟିମ୍ ଏବଂ ଆଇପିଏଲ୍ରେ ମୁମ୍ବାଇ ଇଣ୍ଡିଆନ୍ସ ପାଇଁ ବୋଲିଂ କରିନାହାନ୍ତି। ବିଶ୍ୱକପ୍ ଟିମ୍ରେ ତାଙ୍କୁ ଚୟନ କରାଯାଇଥିଲେ ହେଁ ସେ ଟୁର୍ନାମେଣ୍ଟରେ ବୋଲିଂ କରିପାରିବେ ନାହିଁ ବୋଲି ସ୍ପଷ୍ଟ ହେଉଛି। ଏଣୁ ଚୟନକର୍ତ୍ତା ଅକ୍ଷର ପଟେଲଙ୍କ ସ୍ଥାନରେ ଶାର୍ଦ୍ଦୁଳ ଠାକୁରଙ୍କୁ ଏବେ ସାମିଲ କରିଛନ୍ତି। ଏନେଇ ନିଜର ପ୍ରତିକ୍ରିୟା ରଖିଛନ୍ତି ଗମ୍ଭୀର।
ଷ୍ଟାର ସ୍ପୋଟ୍ସର ଶୋ’ ‘ଗେମ୍ ପ୍ଲାନ୍’ରେ ଗମ୍ଭୀର କହିଛନ୍ତି, ମୋ ନଜରରେ ହାର୍ଦ୍ଦିକଙ୍କୁ ଭାରତ-ଏକାଦଶରେ ସେତେବେଳେ ସୁଯୋଗ ମିଳିବା ଉଚିତ ଯେତେବେଳେ ସେ ଉଭୟ ଅଭ୍ୟାସ ମ୍ୟାଚ୍ରେ ବୋଲିଂ କରିବେ। କେବଳ ନେଟ୍ସରେ ବୋଲିଂ କରିଲେ ତାଙ୍କୁ ଖେଳାଇବା ଉଚିତ ନୁହେଁ। କାରଣ ନେଟ୍ସରେ ବୋଲିଂ କରିବା ଏବଂ ବିଶ୍ୱକପ୍ ଭଳି ଟୁର୍ନାମେଣ୍ଟରେ ବାବର ଆଜମଙ୍କ ଭଳି କ୍ୱାଲିଟି ବ୍ୟାଟ୍ସମ୍ୟାନଙ୍କ ସାମ୍ନାରେ ବୋଲିଂ କରିବା ଭିନ୍ନ କଥା। ଏହାଛଡ଼ା ହାର୍ଦ୍ଦିକଙ୍କ ନେଟ୍ସ ସହ ଅଭ୍ୟାସ ମ୍ୟାଚ୍ରେ ବୋଲିଂ କରିବାକୁ ହେବ। ତାଙ୍କୁ ନିଜର ୧୦୦ ପ୍ରତିଶତ ଯୋଗଦାନ ବୋଲିଂରେ ଦେବାକୁ ହେବ ବୋଲି ସେ କହିଛନ୍ତି।