ନୂଆଦିଲ୍ଲୀ, ୨୮ା୧୨ (ପି.ଟି.): ଆଗାମୀ ଶ୍ରୀଲଙ୍କା ବିପକ୍ଷ ୩ ମ୍ୟାଚ୍ବିଶିଷ୍ଟ ଅନ୍ତର୍ଜାତୀୟ ଟି୨୦ କ୍ରିକେଟ ସିରିଜ ପାଇଁ ଅଲ୍ରାଉଣ୍ଡର ହାର୍ଦ୍ଦିକ ପାଣ୍ଡ୍ୟାଙ୍କୁ ଭାରତୀୟ ଦଳର ଅଧିନାୟକ ମନୋନୀତ କରାଯାଇଛି। ରୋହିତ ଶର୍ମା କିନ୍ତୁ ଅନ୍ତର୍ଜାତୀୟ ଦିନିକିଆ ଦଳର ଅଧିନାୟକ ରହିବେ। ବିରାଟ କୋହଲି ଓ କେ.ଏଲ୍. ରାହୁଲଙ୍କୁ ଦଳରେ ସ୍ଥାନ ମିଳିନାହିଁ। ଏହି ଦୁଇଜଣଙ୍କ ବ୍ୟତୀତ ରୋହିତ୍ଙ୍କୁ ୨୦୨୪ରେ ହେବାକୁଥିବା ଟି୨୦ ବିଶ୍ୱକପ୍ ପାଇଁ ଦଳରେ ନିଆଯାଇ ନ ପାରେ ବୋଲି ଏକ ସୂଚନା ମିଳୁଛି। ପାଣ୍ଡ୍ୟାଙ୍କୁ ପଦୋନ୍ନତି ଦିଆଯିବା ପଛରେ ଭିତିରି କାରଣ ଥିବା କୁହାଯାଉଛି। ଶ୍ରୀଲଙ୍କା ବିପକ୍ଷରେ ଖେଳାଯିବାକୁଥିବା ଅନ୍ତର୍ଜାତୀୟ ଦିନିକିଆ ସିରିଜ ପାଇଁ ତାଙ୍କୁ ରୋହିତ୍ଙ୍କ ଡେପୁଟି ଭାବେ ମନୋନୀତ କରାଯାଇଛି। ଅନ୍ୟପକ୍ଷରେ ଚଳିତବର୍ଷ ପ୍ରଭାବୀ ପ୍ରଦର୍ଶନ କରିଆସୁଥିବା ସୂର୍ଯ୍ୟକୁମାର ଯାଦବଙ୍କୁ ଅନ୍ତର୍ଜାତୀୟ ଟି୨୦ ଦଳର ନୂଆ ଉପଅଧିନାୟକ କରାଯାଇଛି। ଗତ ଟି୨୦ ବିଶ୍ୱକପ୍ ସେମିଫାଇନାଲରେ ଇଂଲଣ୍ଡଠାରୁ ପରାଜିତ ହେବା ପରେ ସେତେବେଳେ ରୋହିତଙ୍କ ସ୍ଥାନରେ ପାଣ୍ଡ୍ୟାଙ୍କୁ ଅଧିନାୟକ କରାଯିବା ଉଚିତ ବୋଲି ମତ ପ୍ରକାଶ ପାଇଥିଲା। ପାଣ୍ଡ୍ୟାଙ୍କ ନେତୃତ୍ୱରେ ଗୁଜରାଟ ଟାଇଟନ୍ସ ଆଇପିଏଲ୍ର ଗତ ସଂସ୍କରଣ ଟାଇଟଲ ବିଜୟୀ ହୋଇଥିଲା। ରୋହିତଙ୍କ ବୃଦ୍ଧାଙ୍ଗୁଳିରେ ଯେଉଁ ଆଘାତ ଲାଗିଥିଲା ସେଥିରୁ ସେ ଏପର୍ଯ୍ୟନ୍ତ ସମ୍ପୂର୍ଣ୍ଣ ସୁସ୍ଥ ହୋଇପାରିନାହାନ୍ତି। କିନ୍ତୁ ଭାରତୀୟ କ୍ରିକେଟ କଣ୍ଟ୍ରୋଲ ବୋର୍ଡ (ବିସିସିଆଇ) ପ୍ରେସ୍ ରିଲିଜ୍ରେ ଗୋଟିଏ ସିରିଜ ପାଇଁ ନା ସ୍ଥାୟୀ ଭାବେ ଦଳରେ ପରିବର୍ତ୍ତନ କରାଯାଇଛି ତାହା ସ୍ପଷ୍ଟ କରାଯାଇନାହିଁ। ଅନ୍ତର୍ଜାତୀୟ ଟି୨୦ ଦଳରେ ପ୍ରଥମଥର ଦୁଇ ପେସ୍ ବୋଲର ଶିବମ୍ ମାଭି ଓ ମୁକେଶ କୁମାର ସ୍ଥାନ ପାଇଛନ୍ତି। ଏଥର ଆଇପିଏଲ୍ ନିଲାମିରେ ମାଭିଙ୍କୁ ୬ କୋଟିରେ କ୍ରୟ କରିଛି ଟାଇଟନ୍ସ। ସେହିପରି ଦିଲ୍ଲୀ କ୍ୟାପିଟାଲ୍ସ ୫.୫୦ କୋଟି ଟଙ୍କାରେ ବେଙ୍ଗଲର ମୁକେଶଙ୍କୁ କ୍ରୟ କରିଛି। ଆଇପିଏଲ୍ରେ ଭଲ ପ୍ରଦର୍ଶନ କରିଥିବା ଋତୁରାଜ ଗାଏକ୍ୱାଡ୍ ଓ ରାହୁଲ ତ୍ରିପାଠୀଙ୍କୁ ମଧ୍ୟ ଟି୨୦ ଦଳରେ ନିଆଯାଇଛି। ଅନ୍ତର୍ଜାତୀୟ ଦିନିକିଆ ଦଳକୁ ଅଭିଜ୍ଞ ମହମ୍ମଦ ସାମି ଫେରିଛନ୍ତି। କାନ୍ଧରେ ଆଘାତପ୍ରାପ୍ତ ଯୋଗୁ ସେ କିଛିଦିନ କ୍ରିକେଟ୍ରୁ ଦୂରେଇ ରହିଥିଲେ। ଅନ୍ତର୍ଜାତୀୟ ଦଳର ଶିଖର ଧାଓ୍ବନ ବାଦ୍ ପଡ଼ିଛନ୍ତି, ଯାହାକି ଆଶା କରାଯାଉଥିଲା।
ଶ୍ରୀଲଙ୍କା ବିପକ୍ଷ ଟି୨୦ ସିରିଜ ପାଇଁ ଭାରତୀୟ ଦଳ: ହାର୍ଦ୍ଦିକ ପାଣ୍ଡ୍ୟା (ଅଧିନାୟକ), ଇଶାନ କିଶନ (ଉଇକେଟ୍କିପର), ଋତୁରାଜ ଗାଏକ୍ୱାଡ୍, ଶୁବମନ ଗିଲ୍, ସୂର୍ଯ୍ୟକୁମାର ଯାଦବ (ଉପଅଧିନାୟକ), ଦୀପକ ହୁଦା, ରାହୁଲ ତ୍ରିପାଠୀ, ସଞ୍ଜୁ ସାମ୍ସନ, ଓ୍ବାଶିଂଟନ ସୁନ୍ଦର, ୟୁଜ୍ବେନ୍ଦ୍ର ଚହଲ, ଅକ୍ଷର ପଟେଲ, ଅର୍ଶଦୀପ ସିଂ, ହର୍ଶଲ ପଟେଲ, ଉମ୍ରାନ ମଲିକ, ଶିବମ୍ ମାଭି ଓ ମୁକେଶ କୁମାର।
ଅନ୍ତର୍ଜାତୀୟ ଦିନିକିଆ ଦଳ: ରୋହିତ୍ ଶର୍ମା (ଅଧିନାୟକ), ଶୁବମନ ଗିଲ୍, ବିରାଟ କୋହଲି, ସୂର୍ଯ୍ୟକୁମାର ଯାଦବ, ଶ୍ରେୟାସ ଆୟର, କେ.ଏଲ୍. ରାହୁଲ (ଉଇକେଟ୍କିପର), ଇଶାନ କିଶନ (ଉଇକେଟ୍କିପର), ହାର୍ଦ୍ଦିକ ପାଣ୍ଡ୍ୟା (ଉପଅଧିନାୟକ), ଓ୍ବାଶିଂଟନ ସୁନ୍ଦର, ୟୁଜ୍ବେନ୍ଦ୍ର ଚହଲ, କୁଲ୍ଦୀପ ଯାଦବ, ଅକ୍ଷର ପଟେଲ, ମହମ୍ମଦ ଶାମି, ସିରାଜ, ଉମ୍ରାନ ମଲିକ ଓ ଅର୍ଶଦୀପ ସିଂ।