ନୂଆଦିଲ୍ଲୀ, ୫।୮: ନିକଟରେ ପିତୃତ୍ୱ ଲାଭ କରିଥିବା ଭାରତୀୟ କ୍ରିକେଟ୍ ଦଳର ଷ୍ଟାର୍ ଅଲ୍ରାଉଣ୍ଡର ହାର୍ଦ୍ଦିକ ପାଣ୍ଡ୍ୟା ଏବେ ସୋସିଆଲ ମିଡିଆରେ ବେଶ୍ ଆକ୍ଟିଭ ରହୁଛନ୍ତି। ହାର୍ଦ୍ଦିକ କେତେବେଳେ ନବଜାତ ପୁଅ ସହ ତ ପୁଣି କେତେବେଳେ ସ୍ତ୍ରୀ ତଥା ସର୍ବିୟା ଅଭିନେତ୍ରୀ ନତାଶା ଷ୍ଟାନକୋଭିକଙ୍କ ସହ ଏକାଠି ଥିବାର ହୋଇଥିବାର ଫଟୋ ସୋସିଆଲ ମିଡିଆରେ ପୋଷ୍ଟ କରୁଛନ୍ତି। ସଦ୍ୟତମ ଘଟଣାକ୍ରମେ ହସ୍ପିଟାଲରେ ପାଖାପାଖି ଗୋଟିଏ ସପ୍ତାହ ରହିବା ପରେ ହାର୍ଦ୍ଦିକ ସ୍ତ୍ରୀ ନତାଶା ଓ ନବଜାତ ସନ୍ତାନକୁ ନେଇ ଘରକୁ ଫେରିଛନ୍ତି। ହାର୍ଦ୍ଦିକ ଯେତେବେଳେ ଘରେ ପହଞ୍ଚତ୍ଥିଲେ ସେଠାରେ ତାଙ୍କ ଭାଉଜ ତଥା କ୍ରୁନାଲ ପାଣ୍ଡ୍ୟାଙ୍କ ସ୍ତ୍ରୀ ପାଙ୍ଖୁରୀ ଶର୍ମା ନବଜାତ ସନ୍ତାନ ପାଇଁ ଏକ ବଡ଼ ସ୍ବାଗତର ଆୟୋଜନ କରିଥିଲେ। ପୁରା ଘର ବେଲୁନରେ ସାଜସଜ୍ଜା ହୋଇଥିଲା। ଭାଉଜଙ୍କ ଏଭଳି ସାଜସଜ୍ଜାକୁ ଦେଖି ହାର୍ଦ୍ଦିକ ବହୁତ ଖୁସି ହୋଇଯାଇଥିଲେ। ପାଙ୍ଖୁରୀ ମଧ୍ୟ ଏହି ଅବସରରେ ଏକ ଛୋଟିଆ ପାର୍ଟିର ଆୟୋଜନ କରିଥିଲେ।
ତେବେ ପାର୍ଟିରେ ଯେଉଁ କେକ୍ କଟାଯାଇଥିଲା ସେହି କାରଣରୁ ହାର୍ଦ୍ଦିକଙ୍କ ନବଜାତ ପୁତ୍ର ସନ୍ତାନର ନାମ କ’ଣ ରଖିଛନ୍ତି ତାହା ଜଣାପଡ଼ିଯାଇଛି। ହାର୍ଦ୍ଦିକ କିମ୍ବା ତାଙ୍କ ପରିବାରର କୌଣସି ସଦସ୍ୟଙ୍କ ପକ୍ଷରୁ ପୂର୍ବରୁ ନବଜାତ ସନ୍ତାନର ନାମ ପ୍ରକାଶ କରାଯାଇ ନ ଥିଲା। କିନ୍ତୁ ଏହି କେକ୍ ଏବେ ହାର୍ଦ୍ଦିକଙ୍କ ପୁଅର ନାମ ଖୁଲାସା କରିଛି। କେକ୍ କମ୍ପାନୀ ପକ୍ଷରୁ ଏହାର ସୋସିଆଲ ମିଡିଆରେ ଏକ ଫଟୋ ପୋଷ୍ଟ କରାଯାଇଛି। ଯେଉଁଥିରେ କେକ୍ ଉପରେ ‘ସ୍ବାଗତ ହେ ନତାଶା ଓ ଅଗସ୍ତ୍ୟା’ ବୋଲି ଲେଖାଯାଇଛି। ଫଳରେ ହାର୍ଦ୍ଦିକଙ୍କ ପୁଅର ନାମ ଅଗସ୍ତ୍ୟା ବୋଲି ଏଥିରୁ ସ୍ପଷ୍ଟ ହୋଇଛି।
