ନୂଆଦିଲ୍ଲୀ,୨୫।୧୧: ଆଇପିଏଲ ୨୦୨୪ ଆରମ୍ଭ ହେବାକୁ ଆହୁରି ତିନି ମାସରୁ ଅଧିକ ସମୟ ବାକି ଅଛି। ହେଲେ ଏହାପୂର୍ବରୁ ଏହି ଲିଗ ଖୁବ ଚର୍ଚ୍ଚାରେ ରହିଛି। କାରଣ ହେଉଛି ଗୁଜୁରାଟ ଟାଇଟାନ୍ସର ଅଧିନାୟକ ହାର୍ଦ୍ଦିକ ପାଣ୍ଡ୍ୟାଙ୍କ ମୁମ୍ବାଇ ଇଣ୍ଡିଆନ୍ସରେ ଯୋଗଦେବା ଖବର ହଠାତ୍ ସାମ୍ନାକୁ ଆସିଛି। ଗୁଜୁରାଟ ଦଳ ଗତ ଦୁଇ ସିଜନରେ ଆଇପିଏଲ ଖେଳୁଛି ଏବଂ ଗତ ଦୁଇ ସିଜନରେ ହାର୍ଦ୍ଦିକଙ୍କ ଅଧିନାୟକତ୍ୱରେ ଦଳ ଫାଇନାଲରେ ପ୍ରବେଶ କରିଛି।
୨୦୨୨ରେ ଗୁଜୁରାଟ ଦଳ ଚାମ୍ପିୟନ ହୋଇଥିଲେ। ବର୍ତ୍ତମାନ ଖବର ଆସୁଛି ଯେ ହାର୍ଦ୍ଦିକ ଗୁଜୁରାଟ ଛାଡିବାକୁ ପ୍ରସ୍ତୁତ ଏବଂ ମୁମ୍ବାଇ ତାଙ୍କୁ ଟ୍ରେଡ ୱିଣ୍ଡୋ ମାଧ୍ୟମରେ ନିଜ ଦଳରେ ଅନ୍ତର୍ଭୁକ୍ତ କରିବାକୁ ଚାହୁଁଛି। ଗୁଜୁରାଟ ମଧ୍ୟ ହାର୍ଦ୍ଦିକଙ୍କୁ ମୁକ୍ତ କରିବାକୁ ପ୍ରସ୍ତୁତ ଅଛି। ତେବେ ମୁମ୍ବାଇରେ ବର୍ତ୍ତମାନ ଅର୍ଥ ଅଭାବ ରହିଛି। ଟ୍ରାନ୍ସଫର ୱିଣ୍ଡୋ ୨୬ରେ ବନ୍ଦ ହେବ। ଏହା ପୂର୍ବରୁ ମୁମ୍ବାଇକୁ ଏହି ରାଶି ଦେବାକୁ ପଡିବ। ଏହି ଚୁକ୍ତି ପ୍ରାୟ ଚୂଡାନ୍ତ ହୋଇଛି।
ଗଣମାଧ୍ୟମ ରିପୋର୍ଟ ଅନୁଯାୟୀ, ମୁମ୍ବାଇକୁ ହାର୍ଦ୍ଦିକଙ୍କ ଦରମା ଏବଂ ଟାଇଟାନ୍ସକୁ ଟ୍ରାନ୍ସଫର ଫି ହିସାବରେ ୧୫କୋଟି ଟଙ୍କା (ପ୍ରାୟ ୧.୮ ମିଲିୟନ ଡଲାର୍) ଦେବାକୁ ପଡିବ। ଟ୍ରାନ୍ସଫର ଫିର ପରିମାଣ ବିଷୟରେ ସୂଚନା ଏପର୍ଯ୍ୟନ୍ତ ଗ୍ରହଣ କରାଯାଇ ନାହିଁ । ଟ୍ରାନ୍ସଫର ଦେୟର ୫୦ ପ୍ରତିଶତ ପର୍ଯ୍ୟନ୍ତ ହାର୍ଦ୍ଦିକ ପାଇବେ ବୋଲଇ କୁହାଯାଉଛି। ହାର୍ଦ୍ଦିକ ମଧ୍ୟ ୨୦୧୫ ରେ ମୁମ୍ବାଇ ଇଣ୍ଡିଆନ୍ସ ସହିତ ଆଇପିଏଲ କ୍ୟାରିୟର ଆରମ୍ଭ କରିଥିଲେ।