କୋରୁକୋଣ୍ଡା, ୨୬ା୧୨ (ଡି.ଏନ.ଏ.): ମାଲକାନଗିରି ଜିଲା କୋରୁକୋଣ୍ଡା ବ୍ଲକ ନାକାମାମୁଡି ପଞ୍ଚାୟତର ଘିସିଙ୍ଗିବେଡା ଗ୍ରାମର ହରି ଗୋଲପେଡା (୫୩) ଭତ୍ତା ପାଇବ ଲାଗି ବାରମ୍ବାର ବ୍ଲକ କାର୍ଯ୍ୟାଳୟକୁ ଦୌଡି କିଛି ସୁଫଳ ପାଇନାହାନ୍ତି। ଶେଷରେ ସେ ଏନେଇ ଆବେଦନ କରିବାକୁ ଜିଲାପାଳଙ୍କ କାର୍ଯ୍ୟାଳୟକୁ ଯାଇ ଜିଲାପାଳଙ୍କୁ ସାକ୍ଷାତ କରିବାକୁ ଚିନ୍ତା କଲେ। ମାତ୍ର ଏଥିପାଇଁ ପାଖରେ ଅର୍ଥ ନ ଥିବାରୁ ସେ ଯାଇପାରୁ ନ ଥିଲେ। ଶେଷରେ ସେ ନିଜ ଛେଳି ବିକ୍ରି କରି ଜିଲାପାଳଙ୍କ କାର୍ଯ୍ୟାଳୟକୁ ଯାଇ ତାଙ୍କୁ ସାକ୍ଷାତ କରିବାରୁ ଦିବ୍ୟାଙ୍ଗ ଭତ୍ତା ପାଇଛନ୍ତି। ଏପରି ଦେଖିବାକୁ ମିଳିଛି ମାଲକାନଗିରି ଜିଲା କୋରୁକୋଣ୍ଡା ବ୍ଲକ ନାକାମାମୁଡି ପଞ୍ଚାୟତର ଘିସିଙ୍ଗିବେଡା ଗ୍ରାମରେ।
ଏହି ଗ୍ରାମରେ ହରି ଗୋଲପେଡା (୫୩) ପରିବାର ସହ ବସବାସ କରନ୍ତି। ୫୦ବର୍ଷ ତଳୁ ତାଙ୍କ ବାମ ଆଖି ନଷ୍ଟ ହୋଇଯାଇଛି । ସେ ଜଣେ ଦିବ୍ୟାଙ୍ଗ ହୋଇ ମଧ୍ୟ ଭତ୍ତା ପାଇପରିନାହାନ୍ତି। ନିଜର କିଛି ଜମି ସହ ଅନ୍ୟମାନଙ୍କ ଜମିରେ ଦିନମଜୁରିଆ ଭାବେ କାର୍ଯ୍ୟ କରି ପରିବାର ଚଳାଉଥିବା ହରି ଏଥିପାଇଁ ଅନେକ ଥର ସରକାରୀ କାର୍ଯ୍ୟାଳୟକୁ ଯାଇ ଭତ୍ତାଟିଏ କରି ଦେବାକୁ ଦାୟିତ୍ୱରେ ଥିବା ଅଧିକାରୀମାନଙ୍କୁ ଜଣାଇଛନ୍ତି। ତାଙ୍କ ପାଖରେ ମଧ୍ୟ ଦିବ୍ୟାଙ୍ଗ ହେବାର ପ୍ରମାଣପାତ୍ର ରହିଛି। ବାରମ୍ବାର ପଞ୍ଚାୟତ କାର୍ଯ୍ୟାଳୟକୁ ଯାଇ ନିରାଶ ହେଉଥିଲେ ସେ। ମାତ୍ର ତାଙ୍କ କଥା କେହି ଶୁଣିଲେନି। ହରି ଜିଲାପାଳଙ୍କୁ ଯାଇ ଭେଟିବାକୁ ନିଷ୍ପତ୍ତି ନେଲେ। ହେଲେ ଜିଲାପାଳଙ୍କ ନିକଟକୁ ଯିବାଲାଗି ତାଙ୍କ ପାଖରେ ଅର୍ଥ ନ ଥିଲା। ଶେଷରେ ସେ ନିଜ ଛେଳି ୨୨୫୦ ଟଙ୍କାରେ ବିକି ଜିଲାପାଳଙ୍କୁ ଯାଇ ଭେଟିଥିଲେ। ଏହା ପରେ ତାଙ୍କର ଦିବ୍ୟାଙ୍ଗ ଭତ୍ତା ହୋଇଥିଲା। କୁଡୁମୁଲୁଗୁମାସ୍ଥିତ ବ୍ଲକ କାର୍ଯ୍ୟାଳୟରେ ହରି ପହଞ୍ଚତ୍ ଜାଣିଲେ ବ୍ଲକ କାର୍ଯ୍ୟାଳୟ ଚିତ୍ରକୋଣ୍ଡା ସ୍ଥାନାନ୍ତରିତ ହୋଇଯାଇଛି। ନାକାମାମୁଡି ପଞ୍ଚାୟତ କୋରୁକୋଣ୍ଡା ବ୍ଲକ ଅଧୀନକୁ ଯାଇଛି। ଏହା ଶୁଣି ହରି ମାଲକାନଗିରିସ୍ଥିତ ଜିଲ୍ଲାପାଳଙ୍କ କାର୍ଯ୍ୟାଳୟକୁ ଯିବାକୁ ଚିନ୍ତା କରିଥିଲେ। ଗୁରୁବାର ଜିଲାପାଳଙ୍କ କାର୍ଯ୍ୟାଳୟ ବନ୍ଦ ଥିବାରୁ ଏବଂ ସେ ଘରୁ ଆସିବା ୯ ଦିନ ବିତିଯାଇଥିବାରୁ ପରିବାର ଲୋକେ ବ୍ୟସ୍ତ ହେଉଥିବେ ଭାବି ଘରକୁ ଫେରିଥିଲେ। ବାଲିମେଳା ଛକ ନିକଟରେ ସେ ବସିଥିବା ଦେଖି ନିକଟସ୍ଥ ଅଲେଖଗୁଡା ଗ୍ରାମର ସରାବୁ ଭଟ୍ଟ ହରିଙ୍କୁ କୁଆଡେ ଯିବ ବୋଲି ପଚାରିଥିଲେ। ହରି ଦିବ୍ୟାଙ୍ଗ ଭତ୍ତା ପାଇଁ ଆସିଥିବା ଜାଣି ସରାବୁ ତାଙ୍କୁ ରାତିରେ ନିଜ ଘରେ ଆଶ୍ରୟ ଦେଇଥିଲେ। ସକାଳୁ କୋରୁକୋଣ୍ଡା ବ୍ଲକକୁ ଉଭୟେ ଯାଇଥିଲେ। ବଡଦିନ ପାଇଁ ବ୍ଲକ କାର୍ଯ୍ୟାଳୟ ବନ୍ଦ ଥିବାରୁ କୌଣସି ପ୍ରକରେ ସରାବୁ ବ୍ଲକ ସାମାଜିକ ସୁରକ୍ଷା ଅଧିକାରୀ ରାଜୀବ ପୂଜାରୀଙ୍କୁ ଭେଟିଥିଲେ। ସରାବୁ ହରିଙ୍କ ସମ୍ପର୍କରେ ରାଜୀବଙ୍କୁ ଅବଗତ କରାଇଥିଲେ। ପୂଜାରୀ ହରିଙ୍କୁ ଆଶ୍ୱାସନା ଦେଇ ଦିବ୍ୟାଙ୍ଗ ଭତ୍ତା ପାଇଁ ଆବେଦନପତ୍ର ଗ୍ରହଣ କରିଥିଲେ। ହରିଙ୍କୁ ଭତ୍ତାକାର୍ଡ ଦେଇ ଜାନୁୟାରୀରୁ ସେ ଭତ୍ତା ପାଇବେ ବୋଲି ପ୍ରତିଶ୍ରୁତି ଦେଇଥିଲେ। ଉଭୟଙ୍କୁ ସେମାନଙ୍କ ଘରେ ଛାଡିବା ବ୍ୟବସ୍ଥା କରିଥିଲେ।