ନୂଆଦିଲ୍ଲୀ,୩ ।୧: ପାଖାପାଖି ୨ ବର୍ଷ ହେବ କଂଗ୍ରେସଠାରୁ ଦୂରେଇ ରହିଥିବା ପୂର୍ବତନ କ୍ରିକେଟର ନବଜୋତ ସିଂ ସିଦ୍ଧୁ ପୁଣିଥରେ ଦଳକୁ ଫେରିବେ ବୋଲି ଶୁଣିବାକୁ ମିଳିଛି । ଏଥିପାଇଁ ଦଳ ୩ଟି ଫର୍ମୁଲାରେ କାମ କରୁଥିବା କୁହାଯାଉଛି । ତେବେ ପଞ୍ଜାବ ମୁଖ୍ୟମନ୍ତ୍ରୀ କ୍ୟାପଟେନ ଅମରିନ୍ଦର ସିଂଙ୍କ ସହ ସିଦ୍ଧୁଙ୍କର ଥିବା ମନୋମାଳିନ୍ୟ ଶେଷ ହୋଇଥିବା କୁହାଯାଉଥିବା ବେଳେ ଏଥିରେ କେନ୍ଦ୍ରୀୟ ନେତୃତ୍ୱ ସିଦ୍ଧୁଙ୍କ ଭୂମିକା ସମ୍ପର୍କରେ ଚିନ୍ତା କରୁଥିବା ଜଣାପଡିଛି । ଏମିତିକି ଅମରିନ୍ଦରଙ୍କର ଘୋର ବିରୋଧୀ କୁହାଯାଉଥିବା ରାଜ୍ୟ ସଭା ଏମ୍ପି ପ୍ରତାପ ସିଂ ବାୱଜା ବି ଏଥିରେ ମିଶି ଯାଇଥିବା କୁହାଯାଉଛି । ତେବେ ଅମରିନ୍ଦରଙ୍କ ସହ ସିଦ୍ଧୁଙ୍କର ମିଳିନ ପଛରେ ରାଜ୍ୟର ନୂଆ ପ୍ରଭାରୀ ହରିଶ ରାୱତଙ୍କ ହାତ ଥିବା ଜଣାପଡିଛି । ଏହାପରେ ମୁଖ୍ୟମନ୍ତ୍ରୀ ଅମରିନ୍ଦର ସିଦ୍ଧୁଙ୍କୁ ନୂଆ ଦାୟିତ୍ୱ ଦେବାରେ କୌଣସି ସମସ୍ୟା ନ ଥିବା କୁହାଯାଉଛି । ସବୁ କିନ୍ତୁ ନିର୍ଭର କରୁଛି ଅମରିନ୍ଦରଙ୍କ ଉପରେ । ଏମିତିକି ତାଙ୍କ ମନ୍ତ୍ରୀମଣ୍ଡଳରେ ସିଦ୍ଧୁଙ୍କୁ ସ୍ଥାନ ମିଳିପାରେ ବୋଲି ମଧ୍ୟ ଆଲୋଚନା ହେଉଛି । ବର୍ତ୍ତମାନ ରାଜ୍ୟ କଂଗ୍ରେସର ଅଧ୍ୟକ୍ଷ ଥିବା ସୁନିଲ ଜାଖଡଙ୍କର କାର୍ଯ୍ୟକାଳ ସରି ଆସୁଥିବା ବେଳେ ଏହି ପଦ ସିଦ୍ଧୁଙ୍କୁ ବି ମିଳିପାରେ ବୋଲି ଅନୁମାନ କରାଯାଇଛି ।
