ନବରଙ୍ଗପୁର/ଡାବୁଗାଁ,୩।୧୦(ସଦାଶିବ ପ୍ରହରାଜ/ ପ୍ରଜ୍ଞାରଞ୍ଜନ ପରିଡ଼ା): ନବରଙ୍ଗପୁର ଜିଲା ଡାବୁଗାଁ ଥାନା ଅଧୀନ ପାପଡ଼ାହାଣ୍ଡି ବ୍ଲକ ମାନିଗାଁ ପୂର୍ବତନ ସରପଞ୍ଚ ମଞ୍ଜୁଳା ଜାନୀ ହରିଶ୍ଚନ୍ଦ୍ର ଯୋଜନା ଅର୍ଥ ଆତ୍ମସାତ୍ କରିଥିବା ନେଇ ଅଭିଯୋଗ ହୋଇଛି। ପଞ୍ଚାୟତବାସୀ, ଜିଲା ପରିଷଦ ଜୋନ୍-୧ ସଭ୍ୟ ଯଶୋବନ୍ତ ନାୟକ ଓ ବର୍ତ୍ତମାନର ସରପଞ୍ଚ ଶୁକଦେବ ମାଝୀ ଏ ନେଇ ଜିଲାପାଳଙ୍କ କାର୍ଯ୍ୟାଳୟରେ ଅଭିଯୋଗ କରିଛନ୍ତି। ୨୦୧୭ରୁ ୨୦୨୨ ପର୍ଯ୍ୟନ୍ତ ପୂର୍ବତନ ସରପଞ୍ଚ ହରିଶ୍ଚନ୍ଦ୍ର ଯୋଜନା ଅନୁଦାନ ଟଙ୍କା ହଡ଼ପ କରିଥିବା ନେଇ ଏକ ଅଭିଯୋଗ ପତ୍ର ଜିଲାପାଳଙ୍କ ଉଦ୍ଦେଶ୍ୟରେ ଅତିରିକ୍ତ ଜିଲାପାଳ ମହେଶ୍ବର ଚନ୍ଦ୍ର ନାୟକଙ୍କୁ ସରପଞ୍ଚ ପ୍ରଦାନ କରିଛନ୍ତି। ଅଭିଯୋଗର ତଦନ୍ତ ହେବ। ରିପୋର୍ଟ ଆସିବା ପରେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ଅତିରିକ୍ତ ଜିଲାପାଳ କହିଛନ୍ତି। ଏହାର ଏକ ନକଲ ପାପଡ଼ାହାଣ୍ଡି ବିଡିଓଙ୍କୁ ମଧ୍ୟ ପ୍ରଦାନ କରାଯାଇଛି। ଏ ନେଇ ଡାବୁଗାଁ ଥାନାରେ ମଧ୍ୟ ଅଭିଯୋଗ ହୋଇଛି। ଥାନା କେସ୍ ନଂ ୧୭୯/୨୪ ରେ ଏକ ମାମଲା ରୁଜୁ କରାଯାଇଛି। ଘଟଣାର ତଦନ୍ତ ଆରମ୍ଭ ହୋଇଛି ବୋଲି ଡାବୁଗାଁ ଆଇଆଇସି ସୁନୀଲ କୁମାର ପ୍ରଧାନ ସୂଚନା ଦେଇଛନ୍ତି। ପାପଡ଼ାହାଣ୍ଡି ବ୍ଲକ୍ ମାନିଗାଁ ପଞ୍ଚାୟତରେ ମଞ୍ଜୁଳା ୨୦୧୭ରୁ ୨୦୨୨ ମଧ୍ୟରେ ସରପଞ୍ଚ ଥିଲେ। ଏହି ସମୟରେ ପଞ୍ଚାୟତ ପିଡିଏସ୍ ଆକାଉଣ୍ଟରୁ ହରିଶ୍ଚନ୍ଦ୍ର ଯୋଜନା ଅର୍ଥ ପର୍ଯ୍ୟାୟକ୍ରମେ ୪ଟି କିସ୍ତିରେ ୧ ଲକ୍ଷ ୪୦ ହଜାର ଟଙ୍କା ଉଠାଯାଇଥିଲା। ଏହି ଟଙ୍କା କିନ୍ତୁ ତତ୍କାଳୀନ ସରପଞ୍ଚ ହିତାଧିକାରୀଙ୍କୁ ଦେଇ ନ ଥିଲେ। ୨୦୨୨ ଏପ୍ରିଲରେ ଶୁକଦେବ ମାନିଗାଁ ସରପଞ୍ଚ ନିର୍ବାଚିତ ହୋଇଥିଲେ। ଏହାପରେ ହରିଶ୍ଚନ୍ଦ୍ର ଯୋଜନା ଟଙ୍କା ପାଇବାକୁ ଥିବା ହିତାଧିକାରୀ ତାଙ୍କୁ ମାଗିଥିଲେ। ପୂର୍ବତନ ସରପଞ୍ଚଙ୍କ କାର୍ଯ୍ୟକାଳ ସମୟରେ ମୃତ୍ୟୁବରଣ କରିଥିବା ପରିବାରବର୍ଗଙ୍କୁ ସହାୟତା ପ୍ରଦାନ କରାଯାଇପାରିବ ନାହିଁ ବୋଲି ସରପଞ୍ଚ ଶୁକଦେବ କହିଥିଲେ। ବାରମ୍ବାର ଲୋକେ ଟଙ୍କା ମାଗିବାରୁ ସେ ଘଟଣାର ତଦନ୍ତ କରିଥିଲେ। ମଞ୍ଜୁଳା ପିଡିଏସ୍ ଆକାଉଣ୍ଟରୁ ୨୦୧୮ ସେପ୍ଟେମ୍ବର ୭ରୁ ୨୦୧୯ ଅଗଷ୍ଟ ୩୦ ମଧ୍ୟରେ ୪ଟି ପର୍ଯ୍ୟାୟରେ ହରିଶ୍ଚନ୍ଦ୍ର ଯୋଜନା ଅର୍ଥ ଉଠାଇଛନ୍ତି। ସେହି ଅର୍ଥକୁ ହିତାଧିକାରୀଙ୍କୁ ଦେଇ ନ ଥିବା ଜାଣିବାକୁ ପାଇଥିଲେ। ଏହାପରେ ବୁଧବାର ମାନିଗାଁ ସରପଞ୍ଚ, ଜିଲା ପରିଷଦ ସଭ୍ୟ ଓ ୨ଶହରୁ ଊର୍ଦ୍ଧ୍ୱ ଜନସାଧାରଣ ଓ ହିତାଧିକାରୀ ଜିଲାପାଳଙ୍କ କାର୍ଯ୍ୟାଳୟରେ ଘଟଣା ସମ୍ପର୍କରେ ଜଣାଇଥିଲେ। ୨୦୧୭ରେ ସ୍ତ୍ରୀଙ୍କ ମୃତ୍ୟୁ ହୋଇଥିଲା। କିନ୍ତୁ ହରିଶ୍ଚନ୍ଦ୍ର ଯୋଜନା ଟଙ୍କା ମିଳିଲା ନାହିଁ ବୋଲି ରାଉଲିଗୁଡା ଗାଁର ଘାସିରାମ ଜାନୀ ଅଭିଯୋଗ କରିଛନ୍ତି। ସେହିଭଳି ଉକ୍ତ ଗାଁର ପ୍ରଶାନ୍ତ ହରିଜନଙ୍କ କହିବା ଅନୁଯାୟୀ, ଜେଜେବାପା ଦୀନବନ୍ଧୁ ହରିଜନ ୨୦୧୯ ଓ ଜେଜେ ମାଆ ସେବତୀଙ୍କ ୨୦୨୦ରେ ମୃତ୍ୟୁ ହୋଇଥିଲା। ଏବେଯାଏ କିନ୍ତୁ ହରିଶ୍ଚନ୍ଦ୍ର ଯୋଜନା ଟଙ୍କା ମିଳିଲା ନାହିଁ। ଏହିଭଳି ଅନେକ ଲୋକ ମୃତଦେହ ସତ୍କାର ସହାୟତା ଟଙ୍କା ପାଇବାରୁ ବଞ୍ଚତ୍ତ ବୋଲି ଅଭିଯୋଗ କରିଛନ୍ତି।
