ନୂଆଦିଲ୍ଲୀ,୧୧।୭: ଇଂଲଣ୍ଡ ବିପକ୍ଷ ପ୍ରଥମ ଟି୨୦ ମ୍ୟାଚ୍ରେ ହରଲିନ ଦେଓଲ ନିଜର ଏକ କ୍ୟାଚ୍କୁ ନେଇ ଚର୍ଚ୍ଚାରେ। ମହାନ କ୍ରିକେଟର ସଚିନ ତେନ୍ଦୁଲକରଙ୍କଠାରୁ ଆରମ୍ଭ କରି ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ପର୍ଯ୍ୟନ୍ତ ସମସ୍ତେ ତାଙ୍କର ପ୍ରଶଂସା କରିଛନ୍ତି। ସଚିନ ହରଲିନଙ୍କ କ୍ୟାଚ୍କୁ ‘କ୍ୟାଚ୍ ଅଫ୍ ଦ ଇଅର’ କହିଛନ୍ତି। ତେବେ ଚଣ୍ଡିଗଡ଼ର ଗଳିରୁ ଭାରତୀୟ ମହିଳା କ୍ରିକେଟ ଟିମ୍ରେ ସାମିଲ ହେବାର ଯାତ୍ରା ସେତେଟା ସହଜ ନ ଥିଲା। ୨୦୧୨ରେ ସେ ହିମାଚଳପ୍ରଦେଶ କ୍ରିକେଟ ଆସୋସିଏଶନର ଅଣ୍ଡର-୧୯ କ୍ରିକେଟ ଏକାଡେମୀରେ ପଡଞ୍ଚିଥିଲେ। ସେତେବେଳେ ତାଙ୍କୁ କ୍ୟାଚ୍ ଧରିବା ଲାଗି ଡାଇଭ୍ କରିବାକୁ ଡରଲାଗୁଥିଲା। ହେଲେ ଏବେ ସେ ଅଦ୍ଭୁତ କ୍ୟାଚ୍ ଧରି ସମସ୍ତଙ୍କ ପାଇଁ ପ୍ରଶଂସାର ପାତ୍ର ହୋଇଛନ୍ତି।
୭ ବର୍ଷ ବୟସରୁ କ୍ରିକେଟ ଖେଳିବା ଆରମ୍ଭ କରିଥିଲେ ହରଲିନ। ପ୍ରାରମ୍ଭିକ ଦିନରେ ସେ ଅନେକ ଥର ଆହତ ହୋଇଛନ୍ତି। ଖେଳ ପଡ଼ିଆରୁ ଭଙ୍ଗା ଆଙ୍ଗୁଠି ନେଇ ଘରକୁ ଆସିଛନ୍ତି। ହିମାଚଳ ପ୍ରଦେଶ ପାଇଁ ଏକଦା ଖେଳୁଥିବା ସମୟରେ ଆଘାତ ଲାଗିବା ପରେ ମଧ୍ୟ ସେ ବୋଲିଂ ଜାରି ରଖିଥିଲେ। ଠିକ୍ ସେହିଭଳି ପଡ଼ିବାକୁ ଖାତିର ନ କରି ସେ କ୍ୟାଚ୍ ଧରିଥିଲେ। ତାକୁ ନେଇ ବଡ଼ ବଡ଼ କ୍ରିକେଟରଙ୍କ ପ୍ରଶଂସା ତାଙ୍କ କଷ୍ଟର ଉପହାର ବୋଲି ହରଲିନଙ୍କ ମା’ ସାକ୍ଷାତକାରରେ କହିଛନ୍ତି।
କହିରଖୁଛୁ, ହରଲିନ ଜୁନିୟର କ୍ରିକେଟରେ ଜଣେ ଷ୍ଟାର ଖେଳାଳି ଥିଲେ। ସେ ୮ ବର୍ଷ ବୟସରେ ଅଣ୍ଡର-୧୯ ଇଣ୍ଟର ସ୍କୁଲ ମ୍ୟାଚ୍ରେ ଭାଗ ନେଇଥିଲେ। ୨୦୧୦ରେ ସେ ପଞ୍ଜାବର ଅଣ୍ଡର-୧୯ ଟିମ୍ର ସଦସ୍ୟ ହୋଇଥିଲେ। ଏହାପରେ ସେ ହିମାଚଳପ୍ରଦେଶ ଚାଲିଯାଇଥିଲେ। ସେଠାରେ ସେ ୨୦୧୨ରେ ରାଜ୍ୟ ଅଣ୍ଡର-୧୯ କ୍ରିକେଟ ଏକାଡେମୀରେ ଯୋଗ ଦେଇଥିଲେ। ସେଠାରେ ସେ ବହୁତ ପରିଶ୍ରମ କରୁଥିଲେ। ଏବେ ସେ ଜଣେ ଭଲ ବୋଲର, ବ୍ୟାଟ୍ସମ୍ୟାନ୍ ସହ ଭଲ ଫିଲ୍ଡର ପାଲଟିଛନ୍ତି। ଭାରତ ପାଇଁ ସେ ଏଯାବତ ୧୦ ଟି୨୦ ମ୍ୟାଚ୍ ଖେଳିଛନ୍ତି। ଦିନିକିଆରେ ସେ ଉଇକେଟ ନ ନେଇ ଥିଲେ ବି ଟି୨୦ରେ ୬ ଉଇକେଟ ନେଇ ୧୨୭ ରନ୍ କରିଛନ୍ତି।