ମୀରପୁର,୮ା୭: ବାଂଲାଦେଶ ବିପକ୍ଷ ପ୍ରଥମ ମହିଳା ଟି୨୦ ମ୍ୟାଚରେ ଭାରତ ବିଜୟୀ ହୋଇଛି। ପ୍ରଥମେ ଭାରତୀୟ ସ୍ପିନର ବାଂଲାଦେଶକୁ ୧୧୪ ରନ୍ରେ ସୀମିତ ରଖିଥିଲେ। ଅଧିନାୟିକା ହରମନ୍ପ୍ରୀତ କୌରଙ୍କ ଅପରାଜିତ ୫୪ ରନ୍ ବଳରେ ଭାରତ ୩ ଉଇକେଟ ହରାଇ ଆବଶ୍ୟକ ରନ୍ ସଂଗ୍ରହ କରି ନେଇଥିଲା।
ଭାରତ ଟସ୍ ଜିତି ପ୍ରଥମେ ବୋଲିଂ ନିଷ୍ପତ୍ତି ନେଇଥିଲା। ବାଂଲାଦେଶର ଦୁଇ ଓପନର ସାଥ ରାଣୀ(୨୨) ଓ ଶମିମା ସୁଲତାନା(୧୭) ପ୍ରଥମ ଉଇକେଟରେ ୨୭ ରନ୍ ଯୋଡିଥିଲେ। ଭାରତ ପାଇଁ ପଦାର୍ପଣ କରିଥିବା କେରଳର ମିନ୍ନୁ ମଣି ଶମିମା ସୁଲତାନାଙ୍କୁ ଆଉଟ କରି ଭାରତକୁ ପ୍ରଥମ ସଫଳତା ଦେଇଥିଲେ। ପରେ ରାଣୀଙ୍କୁ ଆଉଟ କରିଥିଲେ ପୂଜା ବସ୍ତ୍ରକାର। ମିଡିଲ ଓଭରରେ ଦୀପ୍ତି ଶର୍ମା, ଶେଫାଳି ବର୍ମା ଓ ପଦାର୍ପଣକାରୀ ବାରେଡି ଅନୁଷା ଦମଦାର ବୋଲିଂ କରିବାରୁ ବାଂଲାଦେଶର ରନ୍ ଗତି ଧୀମେଇ ଯାଇଥିଲା। ଶେଷ ଆଡକୁ ଶୋରନା ଅଖତର ୨୮ ରନ୍ କରିବାରୁ ବାଂଲାଦେଶ ୧୦୦ ରନ୍ ପାର କରିଥିଲା। ଭାରତ ପକ୍ଷରୁ ମିନ୍ନୁ ମଣି, ପୂଜା ବସ୍ତ୍ରକାର ଓ ଶେଫାଳି ବର୍ମା ଗୋଟିଏ ଲେଖାଏ ଉଇକେଟ ନେଇଥିଲେ। ନିର୍ଦ୍ଧାରିତ ୨୦ ଓଭରରେ ବାଂଲାଦେଶ ୫ ଉଇକେଟ ହରାଇ ୧୧୪ ରନ୍ କରିଥିଲା।
୧୧୫ ରନ୍ ଲକ୍ଷ୍ୟରେ ଭାରତ ୧ ରନ୍ରେ ଶେଫାଳି ବର୍ମାଙ୍କ ଉଇକେଟ ହରାଇଥିଲା। ଦଳୀୟ ସ୍କୋର ୨୧ ରନ୍ରେ ଜେମିମା ରୋଡ୍ରିଗୁଏଜ(୧୧) ଆଉଟ ହୋଇଥିଲେ। ତେବେ ସ୍ମୃତି ମନ୍ଧାନା ୩୮ ଓ ହରମନ୍ପ୍ରୀତ ୫୪* ତୃତୀୟ ଉଇକେଟରେ ୭୦ ରନ୍ ଯୋଡିଥିଲେ। ୩୪ ବଲ୍ ଖେଳି ସ୍ମୃତି ୫ ଚୌକା ମାରିଥିଲେ। ସ୍ମୃତି ଆଉଟ ହେବା ପରେ ୟସ୍ତିକା ଭାଟିଆ(୯*)ଙ୍କୁ ସାଥୀ କରି ମ୍ୟାଚ୍ ଜିତାଇଥିଲେ ହରମନପ୍ରୀତ୍। ଶେଷ ଯାଏ ଅପରାଜିତ ଥିବା ହରମନପ୍ରୀତ୍ ୩୫ ବଲ୍ ଖେଳି ୬ଚୌକା ଓ ୨ ଛକା ମାରିଥିଲେ। ବାଂଲାଦେଶ ପକ୍ଷରୁ ସୁଲତାନା ଖାତୁନ ୨ ଓ ମାରୁଫା ଅଖତର ଗୋଟିଏ ଉଇକେଟ ନେଇଥିଲେ। ହରମନ୍ପ୍ରୀତଙ୍କୁ ପ୍ଲେୟର ଅଫ୍ ଦ ମ୍ୟାଚ୍ ବିବେଚିତ ହୋଇଥିଲେ।
