ନୂଆଦିଲ୍ଲୀ,୧୬।୯: ସେପ୍ଟେମ୍ବର ୧୯ରୁ ଆରମ୍ଭ ହେବାକୁ ଯାଉଛି ଇଣ୍ଡିଆନ୍ ପ୍ରିମିୟର ଲିଗ୍(ଆଇପିଏଲ୍)। ସବୁଥର ଭଳି ଚଳିତ ଥର ମଧ୍ୟ କିଛି ପ୍ରତିଭାବାନ ଖେଳାଳିଙ୍କୁ ଦେଖିବାକୁ ମିଳିବ, ଯେଉଁମାନଙ୍କ ଖେଳ ଦର୍ଶକେ ଏଯାବତ ଦେଖିନାହାନ୍ତି। ସେଭଳି ଜଣେ ହେଲେ କିଙ୍ଗ୍ସ ଇଲେଭେନ୍ ପଞ୍ଜାବର ହରପ୍ରିତ ବ୍ରାର। ୨୦୧୯ରେ ଟିମ୍ ତାଙ୍କୁ କିଣିଥିଲେ ମଧ୍ୟ ତାଙ୍କୁ ବିଶେଷ ସୁଯୋଗ ମିଳିପାରି ନ ଥିଲା। ହେଲେ ଚଳିତ ଥର ତାଙ୍କଠାରୁ ଭଲ ପ୍ରଦର୍ଶନ ଆଶା କରାଯାଉଛି।
୧୯୯୫ ସେପ୍ଟେମ୍ବର ୧୬ରେ ଜନ୍ମିତ ପଞ୍ଜାବର ହରପ୍ରିତ ଏବେ ଯାଏ ଆଇପିଏଲ୍ରେ କେବଳ ୨ଟି ମ୍ୟାଚ୍ ଖେଳିଛନ୍ତି। ହେଲେ ଦଳ ତାଙ୍କୁ ପୁଣି ଥରେ ସୁଯୋଗ ଦେଇଛି। ବାମହାତୀ ଏହି ସ୍ପିନରଙ୍କୁ ଗତ ବର୍ଷ ୨୦ ଲକ୍ଷ ଟଙ୍କାରେ କିଣିଥିଲା କିଙ୍ଗ୍ସ ଇଲେଭେନ୍ ପଞ୍ଜାବ।
ତେବେ ହରପ୍ରିତଙ୍କ କ୍ୟାରିୟର କଷ୍ଟକର ରହିଆସିଛି। ସେ ୨୪ ବର୍ଷର ହେବା ବେଳେ ପରିବାରଲୋକେ ଚାକିରି କରିବା ପାଇଁ ଚାପ ପକାଉଥିଲେ। ମଧ୍ୟବିତ୍ତ ପରିବାର ହରପ୍ରିତଙ୍କ ବାପା ପଞ୍ଜାବ ପୋଲିସର ଡ୍ରାଇଭର ଭାବେ କାର୍ଯ୍ୟ କରୁଥିଲେ। ଅନ୍ୟପଟେ ଲଗାତାର ଅସଫଳତା ଯୋଗୁ ଆଉ କ୍ରିକେଟରେ କିଛି ବାକି ନ ଥିବା ଭଳି ଲାଗିଥିଲା। ଫଳରେ ସେ କାନାଡ଼ା ଚାଲିଯିବାକୁ ନିଷ୍ପତ୍ତି ନେଇଥିଲେ। ହେଲେ ଶେଷ ସମୟରେ ପ୍ରିତି ଜିଣ୍ଟାଙ୍କ ନଜର ତାଙ୍କ ଉପରେ ପଡ଼ିଥିଲା। କିଙ୍ଗ୍ସ ଇଲେଭେନ୍ ପଞ୍ଜାବ ପାଇଁ ୨୦୧୯ରେ ତାଙ୍କୁ ଚୟନ କରାଯାଇଥିଲା।