ମୁମ୍ବାଇ, ୨୩।୮ : କେନ୍ଦ୍ର ମନ୍ତ୍ରୀ ନିତିନ ଗଡକରୀ ପୁଣିଥରେ କେନ୍ଦ୍ରର ଭାଜପା ନେତୃତ୍ୱାଧୀନ ଏନଡ଼ିଏ ସରକାରଙ୍କ କାର୍ଯ୍ୟ ଉପରେ ପ୍ରଶ୍ନ କରିଛନ୍ତି। ଏକ କାର୍ଯ୍ୟକ୍ରମରେ ଗଡକରୀ କହିଛନ୍ତି ଯେ ସରକାର ଠିକ ସମୟରେ ନିଷ୍ପତ୍ତି ନେଉନାହାଁନ୍ତି ଏବଂ ଏହା ଏକ ସମସ୍ୟା ପାଲଟିଛି। କେନ୍ଦ୍ର ମନ୍ତ୍ରୀ କହିଛନ୍ତି, ସରକାର ଆଶ୍ଚର୍ଯ୍ୟଜନକ କାର୍ଯ୍ୟ କରିପାରିବେ,. ଏବଂ ଏହା କରିବାର ସାମର୍ଥ୍ୟ ମଧ୍ୟ ଅଛି। ମୁଁ ବିଶ୍ୱାସ କରେ ଯେ ଭାରତୀୟ ଭିତ୍ତିଭୂମିର ଭବିଷ୍ୟତ ଉଜ୍ଜ୍ୱଳ ଅଟେ। ଆମକୁ ଭଲ ଟେକ୍ନୋଲୋଜି, ଉତ୍ତମ ଉଦ୍ଭାବନ, ଉତ୍ତମ ଗବେଷଣା ଏବଂ ସଫଳ ଅଭ୍ୟାସ ଗ୍ରହଣ କରିବା ଆବଶ୍ୟକ। ଆମର ବିକଳ୍ପ ସାମଗ୍ରୀ ରହିବା ଉଚିତ ଯାହା ଦ୍ୱାରା ଗୁଣବତ୍ତା ଉପରେ ଆପୋଷ ବୁଝାମଣା ନକରି ଆମେ ମୂଲ୍ୟ ହ୍ରାସ କରିପାରିବା।
ଉତ୍ପାଦନରେ ସମୟ ହେଉଛି ସବୁଠାରୁ ଗୁରୁତ୍ୱପୂର୍ଣ୍ଣ ଜିନିଷ। ସମୟ ହେଉଛି ସବୁଠାରୁ ବଡ ପୁଞ୍ଜି। ତେବେ ସବୁଠାରୁ ବଡ ସମସ୍ୟା ହେଉଛି ସରକାର ଏହାକୁ ଗ୍ରହଣ କରୁନାହାଁନ୍ତି। ଠିକ ସମୟରେ ନିଷ୍ପତ୍ତି ନିଆଯାଉ ନାହିଁ। ଆସୋସିଏଶନ ଅଫ କନ୍ସଲ୍ଟିଂ ସିଭିଲ ଇଞ୍ଜିନିୟର୍ସ ମୁମ୍ବାଇ ଦ୍ୱାରା ଆୟୋଜିତ ନାଟକୋନ-୨୦୨୨ କାର୍ଯ୍ୟକ୍ରମକୁ ସମ୍ବୋଧିତ କରି କେନ୍ଦ୍ର ମନ୍ତ୍ରୀ କହିଛନ୍ତି ଯେ ଟେକ୍ନୋଲୋଜି କିମ୍ବା ଉତ୍ସ ଅପେକ୍ଷା ସମୟ ଅଧିକ ଗୁରୁତ୍ୱପୂର୍ଣ୍ଣ। କିଛି ଦିନ ପୂର୍ବରୁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଦେଇଥିବା ମନ୍ତବ୍ୟ ଏବଂ ଏବେ ଗଡକରୀ ବିବୃତିରେ ପାର୍ଥକ୍ୟ ଦେଖିବାକୁ ମିଳିଛି। ପ୍ରଧାନମନ୍ତ୍ରୀ ସ୍ବାଧୀନତାର ଅମୃତ ମହୋତ୍ସବ ଅବସରରେ ଦୋ ବଡ଼ ମାଇଲଖୁଣ୍ଟ ଅତିକ୍ରମ କରିବା ସହିତ ସରକାରଙ୍କ ସଫଳତା ବିଷୟରେ ଉଲ୍ଲେଖ କରିଥିଲେ। ତେବେ ଭାଜପା ନେତାମାନେ କହିଛନ୍ତି ଯେ ଗଡକରୀଙ୍କ ଏହି ମନ୍ତବ୍ୟ ସାଧାରଣ ଭାବେ କୁହାଯାଇଛି।
ଏହା ଭାଜପା ସରକାରଙ୍କ ପାଇଁ କୁହାଯାଇ ନାହିଁ। ଭାଜପା ସଂସଦୀୟ ବୋର୍ଡ ନୂତନ ଭାବରେ ଗଠିତ ହୋଇଛି। ଏଥିରେ ଗଡକରୀଙ୍କୁ ସ୍ଥାନ ଦିଆଯାଇ ନାହିଁ। ଏହି ଗୁରୁତ୍ୱପୂର୍ଣ୍ଣ କମିଟିରୁ ଗଡକରୀଙ୍କ ବିଦାୟ ଆଶ୍ଚର୍ଯ୍ୟଜନକ। ସେ ନରେନ୍ଦ୍ର ମୋଦି କ୍ୟାବିନେଟର ଜଣେ ବରିଷ୍ଠ ମନ୍ତ୍ରୀ। ସେ ଭାଜପା ରାଷ୍ଟ୍ରୀୟ ଅଧ୍ୟକ୍ଷ ଦାୟିତ୍ୱ ମଧ୍ୟ ତୁଲାଇଛନ୍ତି। ସାଧାରଣତଃ ଦଳ ନିଷ୍ପତ୍ତି ନେବା ପ୍ରକ୍ରିୟାରେ ଏହାର ପୂର୍ବତନଅଧ୍ୟକଙ୍କୁ ଜଡିତ କରିଥାଏ। ଅନ୍ୟ ଏକ ଗୁରୁତ୍ୱପୂର୍ଣ୍ଣ ବିଷୟ ହେଉଛି, ଗଡକରୀ ଭାଜପାର ଆଦର୍ଶବାଦୀ ବୈଚାରିକ ସଂସ୍ଥା ରାଷ୍ଟ୍ରୀୟ ସ୍ବଂୟସେବକ ସଂଘ (ଆରଏସଏସ) ର ନିକଟତର ମଧ୍ୟ।