ନୂଆଦିଲ୍ଲୀ,୨୯।୧୧: ଚାଇନାର ପିଲାଙ୍କୁ ବ୍ୟାପିଥିବା ଭାଇରାଲ ଜ୍ୱର ଓ ନିମୋନିଆ ଭାରତ ସରକାରଙ୍କର ମୁଣ୍ଡବିନ୍ଧା ବଢାଇଛି। ସରକାର କେତେକ ରାଜ୍ୟରେ ଆଲର୍ଟ ଜାରି କରିଛନ୍ତି। ଏନେଇ ରାଜ୍ୟ ସରକାର ସ୍ବାସ୍ଥ୍ୟ ବିଭାଗକୁ ଆଡଭାଇଜରି ଜାରି କରିଛନ୍ତି। ମହରାଷ୍ଟ୍ର ସରକାର ରାଜ୍ୟରେ କୋଭିଡ ପ୍ରୋଟକଲ ଲାଗୁ କରିବା ପାଇଁ ନିର୍ଦ୍ଦେଶ ଦେଇଛନ୍ତି। ଏହା ବ୍ୟତୀତ ହରିୟାଣା, ରାଜସ୍ଥାନ, ଗୁଜରାଟଳ କର୍ନାଟକ, ଉତ୍ତରାଖଣ୍ଡ ଓ ତାମିଲନାଡୁର ସରକାର ରାଜ୍ୟରେ ସତର୍କତା ଜାରି କରିଛନ୍ତି। ସବୁ ହସ୍ପିଟାଲକୁ ପ୍ରସ୍ତୁତ ହୋଇ ରହିବାକୁ ନିର୍ଦ୍ଦେଶ ଦିଆଯାଇଛି। ଶ୍ୱାସ ରୋଗରେ ପୀଡିତଙ୍କୁ ସଠିକ ଭାବେ ଯାଞ୍ଚ କରିବାକୁ ସବୁ ହସ୍ପିଟାଲକୁ ସ୍ବାସ୍ଥ୍ୟ ବିଭାଗ ତରଫର ନିର୍ଦ୍ଦେଶ ଦିଆଯାଇଛି। ସେହିପରି ମେଡିକାଲକୁ ଆସୁଥିବା ସବୁ ରୋଗୀଙ୍କ ସାମ୍ପୁଲ ନେଇ ଲ୍ୟାବକୁ ପଠାଇବାକୁ କୁହାଯାଇଛି।
କର୍ନାଟକ ସ୍ବାସ୍ଥ୍ୟ ମନ୍ତ୍ରଣାଳୟ ଲୋକଙ୍କୁ ଭାଇରାଲ ଜ୍ୱରରୁ ବଞ୍ଚିବା ପାଇଁ ସର୍ତକ କରିବା ସହ ଖାସିବା ଏବଂ ଛିଙ୍କିବା ସମୟରେ ମୁହଁରେ ରୁମାଲ ଦେବାକୁ ପରାମର୍ଶ ଦେଇଛି। ଭିଡ ସ୍ଥାନରେ ମାସ୍କ ପିନ୍ଧିବା ସହ ଗହଳି ସ୍ଥାନକୁ ନ ଯିବାକୁ ପରାମର୍ଶ ଦେଇଛି। ସେହିପରି ରାଜସ୍ଥାନ ସ୍ବାସ୍ଥ୍ୟ ବିଭାଗ ଛୋଟ ପିଲାଙ୍କ ପାଇଁ ହସ୍ପିଟାଲ ସ୍ବତନ୍ତ୍ର ବ୍ୟବସ୍ଥା କରିଛି।