ବାହାନଗା, ୨୪ା୧(ଡି.ଏନ.ଏ.): ଲକ୍ଷାଧିକ ଟଙ୍କା ହେରଫେର ଅଭିଯୋଗରେ ଫେରାର ଥିବା ବାଲେଶ୍ୱର ବାହାନଗା ଅଞ୍ଚଳର ୨ଯୁବକଙ୍କୁ ଗିରଫ କରିବାକୁ ଆସି ହରିୟାଣା ପୋଲିସ ହଟହଟା ହୋଇଛି। ଅଭିଯୁକ୍ତଙ୍କୁ ନ ପାଇ ସେମାନଙ୍କ ପରିବାର ଲୋକଙ୍କୁ ଖନ୍ତାପଡ଼ା ଥାନାକୁ ଆଣିଥିବାରୁ ପୋଲିସ ଟିମ୍ ସ୍ଥାନୀୟ ଲୋକଙ୍କ ବିରୋଧର ଶିକାର ହୋଇଛି। ସ୍ଥିତି ଏପରି ହୋଇଥିଲା ଯେ, ଖବର ସଂଗ୍ରହ କରିବାକୁ ଯାଇଥିବା ଜଣେ ଖବରଦାତାଙ୍କୁ ପୋଲିସ ବନ୍ଧୁକ ଦେଖାଇ ଭୟଭୀତ କରିବାକୁ ପଛାଇ ନ ଥିତ୍ଲା। ଏହାକୁ ନେଇ ଥାନା ପରିସରରେ ଉତ୍ତେଜନାମୂଳକ ସ୍ଥିତି ସୃଷ୍ଟି ହେବା ସହ ପୋଲିସ ଏବଂ ଲୋକଙ୍କ ମଧ୍ୟରେ ଠେଲାପେଲା ହୋଇଥିଲା। ଖବରପାଇ ସଦର ଏସ୍ଡିପିଓ ଘଟଣାସ୍ଥଳରେ ପହଞ୍ଚତ୍ ସ୍ଥିତି ନିୟନ୍ତ୍ରଣକୁ ଆଣିଥିଲେ। ଶେଷରେ ହରିୟାଣା ପୋଲିସ ଭୁଲ୍ ମାଗି ଥାନାକୁ ଆଣିଥିବା ଅଭିଯୁକ୍ତଙ୍କ ସମ୍ପର୍କୀୟଙ୍କୁ ଛାଡ଼ିଥିଲା। ଏହି ଘଟଣା ପରେ ହରିୟାଣା ପୋଲିସ ଟିମ୍ ଫେରି ଯାଇଥିବା ଜଣାପଡ଼ିଛି।
ମିଳିଥିବା ସୂଚନା ଅନୁସାରେ ବାଲେଶ୍ୱର ଜିଲା ବାହାନଗା ବ୍ଲକ ଷଠୀ ଗ୍ରାମର ଲିପୁ ରାଉତ ନାମକ ଯୁବକ ହରିୟାଣାର ଏକ ଲୁଗା କମ୍ପାନୀରେ କାମ କରୁଥିଲେ। ସେହି କମ୍ପାନୀରୁ ଲକ୍ଷାଧିକ ଟଙ୍କା ହେରଫେର କରି ସେ ଏବେ ଫେରାର ଅଛନ୍ତି। ୨ମାସ ତଳେ ହରିୟାଣା ପୋଲିସ ଲିପୁଙ୍କୁ ଗିରଫ କରିବାକୁ ଆସିଥିଲା। ତାଙ୍କୁ ନ ପାଇ ତାଙ୍କ ମା’ ବାପାଙ୍କୁ ଧରି ଥାନାକୁ ନେଇ ପଚରାଉଚୁରା କରି ଛାଡ଼ିଦେଇଥିଲା। ଉକ୍ତ ଘଟଣାରେ ହରିୟାଣା ପୋଲିସର ଏକ ୪ଜଣିଆ ଟିମ୍ ପୁନର୍ବାର ରବିବାର ଭୋର ସମୟରେ ପହଞ୍ଚତ୍ ଲିପୁଙ୍କୁ ଖୋଜିଥିଲେ। ତାଙ୍କୁ ନ ପାଇବାରୁ ଖନ୍ତାପଡ଼ା ପୋଲିସ ସହାୟତାରେ ମା’ ହରପ୍ରିୟା ରାଉତଙ୍କୁ ଉଠାଇ ନେଇଥିଲେ। ଏହାସହ ଗ୍ରାମର ରଞ୍ଜନ ଦାସଙ୍କ ଆକାଉଣ୍ଟକୁ ଲକ୍ଷାଧିକ ଟଙ୍କା ଟ୍ରାନ୍ସଫର ହୋଇଥିବାରୁ ତାଙ୍କୁ ମଧ୍ୟ ନ ପାଇ ତାଙ୍କ ୧୮ବର୍ଷର ପୁଅକୁ ଥାନାକୁ ନେଇଯାଇଥିଲେ। ଏହି ଘଟଣା ଜଣାପଡ଼ିବା ପରେ ଷଠୀ ଗ୍ରାମର କେତେଜଣ ଲୋକ ଥାନାରେ ପହଞ୍ଚତ୍ କେଉଁ ଆଧାରରେ ଏମାନଙ୍କୁ ସୂର୍ଯ୍ୟୋଦୟ ପୂର୍ବରୁ ଉଠାଇ ଅଣାଯାଇଛି ବୋଲି ପଚାରିବାରୁ ପୋଲିସ ଅଧିକାରୀ ଉତ୍ତ୍ୟକ୍ତ ହୋଇପଡିଥିଲେ। ଏପରି କି ଏକ ଓ୍ବେବଚ୍ୟାନେଲର ଖବରଦାତା ନାରାୟଣ ମହାନ୍ତି ଏ ସମ୍ପର୍କିତ ଖବର ସଂଗ୍ରହ କରୁଥିବାବେଳେ ହରିୟାଣା ପୋଲିସ ତାଙ୍କୁ ଗାଳିଗୁଲଜ କରି ବନ୍ଧୁକ ଦେଖାଇ ମାରିଦେବାକୁ ମଧ୍ୟ ଧମକ ଦେଇଥିଲେ। ଏହାକୁ ନେଇ ଥାନା ପରିସରରେ ପୋଲିସ ଓ ଲୋକଙ୍କ ମଧ୍ୟରେ ହାତାହାତି ହୋଇଥିଲା। ଖବର ପାଇ ଅନ୍ୟ ଖବରଦାତାମାନେ ଘଟଣାସ୍ଥଳରେ ପହଞ୍ଚତ୍ ହଟ୍ଟଗୋଳ କରିଥିଲେ। ପରେ ନାରାୟଣ ହରିୟାଣାର ଗୁରୁଗାଁଓରୁ ଆସିଥିବା ପୋଲିସ ଅଧିକାରୀ ଏସ୍.କେ.ମଙ୍ଗଳଙ୍କ ବିରୋଧରେ ଲିଖିତ ଅଭିଯୋଗ କରିଥିଲେ। ଖନ୍ତାପଡା ପୋଲିସ୍ ଏ ସମ୍ପର୍କରେ ଉପରିସ୍ଥ ଅଧିକାରୀଙ୍କୁ ଜଣାଇବା ପରେ ବାଲେଶ୍ୱର ସଦର ଏସ୍ଡିପିଓ ପଦାରବିନ୍ଦ ତ୍ରିପାଠୀ, ସଦର ଥାନାଧିକାରୀ ପହଞ୍ଚତ୍ ତଦନ୍ତ କରିଥିଲେ। ହରିୟାଣା ପୋଲିସ୍ ଏସ୍.କେ ମଙ୍ଗଳ ସଦର ଏସ୍ଡିପିଓ ତ୍ରିପାଠୀଙ୍କ ଉପସ୍ଥିତିରେ ଖବରଦାତାଙ୍କୁ ଭୁଲ୍ ମାଗିବାରୁ ସମସ୍ୟାର ସମାଧାନ ହୋଇଥିଲା। ପରେ ପୋଲିସ ଲିପୁଙ୍କ ମା’ ହରପ୍ରିୟା ରାଉତ ଓ ରଞ୍ଜନଦାସଙ୍କ ପୁଅକୁ ସନ୍ଧ୍ୟାରେ ଛାଡି ହରିୟାଣା ଫେରି ଯାଇଥିଲା।