ଚଣ୍ଡିଗଡ,୩୦।୧୨: ହରିୟାଣାର କ୍ରୀଡ଼ା ମନ୍ତ୍ରୀ ତଥା ପୂର୍ବତନ ହକି ଖେଳାଳି ସନ୍ଦୀପ ସିଂ ବିବାଦକୁ ଆସିଛନ୍ତି। ତାଙ୍କ ନାଁରେ ଯୌନ ନିର୍ଯାତନା ଅଭିଯୋଗ ଆଣିଛନ୍ତି ମହିଳା କୋଚ। କ୍ରୀଡ଼ା ମନ୍ତ୍ରୀ ତାଙ୍କୁ ତାଙ୍କ ବାସଭବନକୁ ଡାକି ଅସଦାଚରଣ କରିଥିବା ସେ ଅଭିଯୋଗ କରିଛନ୍ତି।
ମହିଳା କୋଚ ଅଭିଯୋଗ କରି କହିଛନ୍ତି, ଇନଷ୍ଟାଗ୍ରାମ ମାଧ୍ୟମରେ କ୍ରୀଡ଼ା ମନ୍ତ୍ରୀ ସନ୍ଦୀପ ସିଂ ତାଙ୍କ ସହ ଯୋଗାଯୋଗ କରିଥିଲେ। ସେ ତାଙ୍କୁ କହିଥିଲେ ଯେ, ଯଦି ତୁମେ ମୋର କଥା ମାନିବ, ତୁମେ ସମସ୍ତ ସୁବିଧା ପାଇବ ଏବଂ ଇଚ୍ଛାକୃତ ସ୍ଥାନରେ ପୋଷ୍ଟିଂ ହେବ। ମନ୍ତ୍ରୀଙ୍କ କଥା ନ ଶୁଣିବାରୁ ତାଙ୍କୁ ବଦଳ କରାଯାଇଥିଲା ଏବଂ ତାଲିମ ବନ୍ଦ କରି ଦିଆଯାଇଥିଲା। ସେ ଡିଜିପି କାର୍ଯ୍ୟାଳୟ, ସିଏମ ହାଉସ ଏବଂ ଗୃହମନ୍ତ୍ରୀ ଅନିଲ ବିଜୟଙ୍କ ନିକଟକୁ ଯାଇ ଏହି ଘଟଣାରେ ଅଭିଯୋଗ କରିଥିଲେ। କିନ୍ତୁ ତାଙ୍କ କଥା କେହି ଶୁଣି ନ ଥିଲେ। ସେ ଡିସେମ୍ବର ୨୯ରେ ଆଇଏନଏଲଡି ନେତା ଅଭୟ ଚୈତନ୍ୟଙ୍କୁ ଭେଟିଥିଲେ। ଅଭୟ ତାଙ୍କୁ ସାହସ ଦେଇଛନ୍ତି ଏବଂ ଗଣମାଧ୍ୟମ ସାମ୍ନାକୁ ଆସିବାକୁ କହିଛନ୍ତି। ମୁଁ କୌଣସି ସ୍ଥାନରୁ ସାହାଯ୍ୟ ପାଇ ନାହିଁ, ତେଣୁ ମୁଁ ବର୍ତ୍ତମାନ ଗଣମାଧ୍ୟମ ସାମ୍ନାକୁ ଆସିଛି।
ଅନ୍ୟପକ୍ଷରେ ତାଙ୍କ ବିରୋଧରେ ଆସିଥିବା ଅଭିଯୋଗ ଉପରେ ହରିୟାଣା କ୍ରୀଡ଼ା ମନ୍ତ୍ରୀ ସନ୍ଦୀପ ସିଂ କହିଛନ୍ତି, ଜୁନିୟର କୋଚ ମୋ ବିରୋଧରେ ଭିତ୍ତିହୀନ ଅଭିଯୋଗ ଆଣିଛନ୍ତି। ଏହି ଅଭିଯୋଗ ଏକ ରାଜନୈତିକ ଉଦ୍ଦେଶ୍ୟ ପ୍ରଣୋଦିତ। ମୁଁ ଦୁଃଖିତ ଯେ ଖେଳାଳିଙ୍କୁ ସାହାଯ୍ୟ କରିବାକୁ ଚେଷ୍ଟା କରେ କିନ୍ତୁ ଏଭଳି ଅଭିଯୋଗ ହୋଇଛି।