ଭୁବନେଶ୍ୱର, ୭।୨(ତପନ ସ୍ବାଇଁ): କଳିଙ୍ଗ ଷ୍ଟାଡିୟମରେ ଚାଲିଥିବା ଏଫ୍ଆଇଏଚ୍ ମହିଳା ହକି ପ୍ରୋ ଲିଗ୍ରେ ନେଦରଲାଣ୍ଡ୍ସ ଦଳ ବିଜୟରେ ହ୍ୟାଟ୍ରିକ ଅର୍ଜନ କରିଛି। ମଙ୍ଗଳବାର ଅନୁଷ୍ଠିତ ମ୍ୟାଚରେ ଏହି ଦଳ ଚାଇନାକୁ ୩-୧ ଗୋଲରେ ପରାସ୍ତ କରିଛି। ଆମେରିକାକୁ ୭-୦ ଗୋଲରେ ହରାଇ ଅଭିଯାନ ଆରମ୍ଭ କରିଥିବା ନେଦରଲାଣ୍ଡ୍ସ ପରବର୍ତ୍ତୀ ମ୍ୟାଚରେ ଘରୋଇ ଭାରତକୁ ୩-୧ ଗୋଲରେ ପରାସ୍ତ କରିଥିଲା। ଅନ୍ୟପକ୍ଷରେ କ୍ରମାଗତ ୨ଟି ମ୍ୟାଚ ଜିତିବା ପରେ ଚାଇନା ବିଜୟ ଧାରାରେ ବ୍ରେକ୍ ଲାଗିଛି। ଏହି ଦଳ ନିଜର ପ୍ରଥମ ୨ଟି ମ୍ୟାଚରେ ଭାରତକୁ ୨-୧ ଓ ଅଷ୍ଟ୍ରେଲିଆକୁ ୩-୦ରେ ହରାଇଥିଲା। ନେଦରଲାଣ୍ଡ୍ସ ଚଳିତ ସିଜନରେ ଏପର୍ଯ୍ୟନ୍ତ ୭ (ସାଣ୍ଟିଆଗୋରେ ୪ ମ୍ୟାଚ)ଟି ମ୍ୟାଚ ଖେଳି ସାରିଥିବାବେଳେ ସମସ୍ତ ମ୍ୟାଚରେ ବିଜୟୀ ହୋଇ ୨୧ ପଏଣ୍ଟ ପାଇଛି। ଫଳରେ ଏହି ଦଳ ଶୀର୍ଷରେ ନିଜର ସ୍ଥାନକୁ ସୁଦୃଢ଼ କରିଛି। ଅନ୍ୟପକ୍ଷରେ ଚାଇନା ୩ ମ୍ୟାଚରୁ ୬ ପଏଣ୍ଟରେ ସ୍ଥିର ରହିଛି।
ପୂର୍ବ ମ୍ୟାଚଗୁଡ଼ିକ ଭଳି ଏଠାରେ ମଧ୍ୟ ଚାଇନା ଆରମ୍ଭରୁ ଆକ୍ରମଣାତ୍ମକ ଖେଳିଥିଲା। ତେବେ କଡ଼ା ଟକ୍କର ଦେଇଥିଲା ନେଦରଲାଣ୍ଡ୍ସ। ପ୍ରଥମ କ୍ୱାର୍ଟର ଖେଳ ଗୋଲଶୂନ୍ୟ ରହିଥିଲା। ଦ୍ୱିତୀୟ କ୍ୱାର୍ଟର ଆରମ୍ଭରେ ଅର୍ଥାତ୍ ୧୯ତମ ମିନିଟରେ ଏକ ଫିଲ୍ଡ ଗୋଲଦେଇ ଚାଇନାକୁ ଅଗ୍ରଣୀ କରିଥିଲେ ଝୋଙ୍ଗ ଜିଆକି। ମାତ୍ର ଦଳର ଏହି ଖୁସି ବେଶି ସମୟ ତିଷ୍ଠି ନ ଥିଲା। ୨୨ତମ ମିନିଟରେ ନେଦରଲାଣ୍ଡ୍ସର ମୋଇସ ଫ୍ରେକ୍ ଏକ ଫିଲ୍ଡ ଗୋଲ ମାଧ୍ୟମରେ ମ୍ୟାଚକୁ ସମାନ ସ୍ଥିତିକୁ ନେଇ ଆସିଥିଲେ। ଅଗ୍ରଣୀ ନେବାକୁ ନେଦରଲାଣ୍ଡ୍ସ ବେଶି ସମୟ ନେଇ ନ ଥିଲା। ୨୫ତମ ମିନିଟରେ ଆଉ ଏକ ଫିଲ୍ଡ ଗୋଲ ମାଧ୍ୟମରେ ଭିନ୍ ମାର୍ଜିନ ଦଳକୁ ୨-୧ରେ ଅଗ୍ରଣୀ କରିଥିଲେ। ଅଣଖେଳୁଆଡ଼ ପ୍ରଦର୍ଶନ ପାଇଁ ୨୬ତମ ମିନିଟରେ ଚାଇନାର ମା ନିଙ୍ଗ୍ଙ୍କୁ ଗ୍ରୀନ୍ କାର୍ଡ ମିଳିଥିଲା। ତୃତୀୟ କ୍ୱାର୍ଟରରେ ଗୋଲ ପରିଶୋଧ ପାଇଁ ଚାଇନା ଉଦ୍ୟମରତ ଥିବାବେଳେ ନେଦରଲାଣ୍ଡ୍ସ ପକ୍ଷରୁ ୩୮ତମ ମିନିଟରେ ତୃତୀୟ ଗୋଲଟି ସ୍କୋର କରିଥିଲେ ମୋଇସ ଫ୍ରିକ୍। ୪୦ ଓ ୪୨ତମ ମିନିଟରେ ଗୋଲ ପରିଶୋଧ ପାଇଁ ଚାଇନା ନିକଟକୁ ସୁବର୍ଣ୍ଣ ସୁଯୋଗ ଆସିଥିଲା। ମାତ୍ର ପେନାଲ୍ଟି କର୍ନରକୁ ଖେଳାଳିମାନେ ଗୋଲରେ କନଭର୍ଟ କରିବାରେ ଅସମର୍ଥ ରହିଥିଲେ। ବିପଜ୍ଜନକ ପ୍ରଦର୍ଶନ ପାଇଁ ୪୩ତମ ମିନିଟରେ ଜୁ ଓ୍ବେନୟୁଙ୍କୁ ଅମ୍ପାୟର ଗ୍ରୀନ୍କାର୍ଡ ଦେଇଥିଲେ। ଅନ୍ତିମ କ୍ୱାର୍ଟରରେ ଆକ୍ରମଣ ପ୍ରତିଆକ୍ରମଣ ଜାରି ରହିଥିଲେ ହେଁ ଗୋଲ ହୋଇପାରି ନ ଥିଲା। ୫୯ତମ ମିନିଟରେ ଚାଇନା ଏକ ପେନାଲ୍ଟି କର୍ନର ପାଇଥିଲେ ହେଁ ନେଦରଲାଣ୍ଡ୍ସର ଦୃଢ଼ ରକ୍ଷଣଭାଗ ଏହାକୁ ସଫଳତାର ସହ ଡିଫେଣ୍ଡ କରିଥିଲେ। ବୁଧବାର ଆମେରିକାକୁ ଭେଟି ଚାଇନା ଏହାର ଭୁବନେଶ୍ୱର ପର୍ଯ୍ୟାୟ ଶେଷ କରିବ। ନେଦରଲାଣ୍ଡ୍ସ ୯ ତାରିଖରେ କଳିଙ୍ଗରେ ଅଷ୍ଟ୍ରେଲିଆ ବିପକ୍ଷରେ ଏହାର ଶେଷ ମ୍ୟାଚ ଖେଳିବ।