ବଇଣ୍ଡା, ୧୬ା୫ (ପରିକ୍ଷିତ ସାହୁ)ବର୍ଷ ବର୍ଷ ହେଲା ସରକାର ରାଜସ୍ବ ଆଦାୟ କରୁଛନ୍ତି। ହେଲେ ଅନୁଗୋଳ ଜିଲା ଆଠମଲ୍ଲିକ ବ୍ଲକ ଠାକୁରଗଡ଼ ସାପ୍ତାହିକ ହାଟକୁ ନେଇ ରହିଥିବା ସମସ୍ୟାର ସମାଧାନ କରାଯାଉ ନାହିଁ। ବଇଣ୍ଡା-ଆଠମଲ୍ଲିକ ପୂର୍ତ୍ତ ବିଭାଗ ରାସ୍ତା ପାର୍ଶ୍ୱରେ ବସୁଥିବା ଏହି ହାଟକୁ ପ୍ରତି ସପ୍ତାହରେ ଶତାଧିକ ବ୍ୟବସାୟୀ ଓ ଚାଷୀ ଆସୁଛନ୍ତି। ଖାଉଟିମାନଙ୍କ ଭିଡ଼ ଜମୁଛି। ହେଲେ ବ୍ୟବସାୟ ପାଇଁ ପିଣ୍ଡି ନିର୍ମାଣ କରାଯାଉ ନାହିଁ କି ପାନୀୟ ଜଳର କୌଣସି ସୁବିଧା ହୋଇନାହିଁ। ଫଳରେ ରାସ୍ତା ପାର୍ଶ୍ୱରେ ବିପଦସଙ୍କୁଳ ଅବସ୍ଥାରେ ଏଠାରେ କିଣାବିକା ଚାଲୁଥିବା ବେଳେ ଟ୍ରାଫିକ ସମସ୍ୟା ମଧ୍ୟ ଉପୁଜୁଛି। ଏହାକୁ ନେଇ ଖାଉଟି ଓ ବ୍ୟବସାୟୀଙ୍କ ମଧ୍ୟରେ ଅସନ୍ତୋଷ ଦେଖାଦେଇଛି।
ବଇଣ୍ଡା-ଆଠମଲ୍ଲିକ ପୂର୍ତ୍ତ ରାସ୍ତା ପାର୍ଶ୍ୱରେ ପ୍ରତ୍ୟେକ ଶୁକ୍ରବାର ଏହି ହାଟ ବସୁଛି। ଏହା ଉପରେ ଠାକୁରଗଡ଼, କନ୍ତପଡା, ପାଇକସାହି, ଆମ୍ବସରମୁଣ୍ଡା, ମଇମୁରା, ସପଘରା, ଟାପଢୋଲ, ପେଡିପଥର, ସାନହୁଲା, କୃତ୍ତିବାସପୁର, କୁରୁମଟାପ, ସଞ୍ଜାମୁରା ଆଦି ପଞ୍ଚାୟତର ଚାଷୀ ଓ ବିଭିନ୍ନ ବ୍ଲକର ବ୍ୟବସାୟୀ ନିର୍ଭର କରୁଛନ୍ତି। ବିଶେଷକରି ଏହି ହାଟରୁ ଜିଲା ବାହାର ଅଞ୍ଚଳରୁ ବ୍ୟବସାୟୀମାନେ ଆସି ପନିପରିବା କିଣିନେଇ ଅନ୍ୟ ଜିଲାରେ ବିକ୍ରି କରୁଛନ୍ତି। ଶତାଧିକ ଚାଷୀ ହାଟକୁ ଆସୁଥିବା ବେଳେ ସେମାନଙ୍କ ପାଇଁ କୌଣସି ସୁବିଧା ନାହି। ହାଟରେ ପିଣ୍ଡି ନିର୍ମାଣ ହେଉ ନ ଥିବା ଯୋଗୁ ବର୍ଷା ଦିନେ କାଦୁଅରେ କିଣାବିକା ହେଉଛି। ସେହିପରି ପାନୀୟ ଜଳ ପାଇଁ ମଧ୍ୟ କୌଣସି ବ୍ୟବସ୍ଥା ନାହିଁ। ପ୍ରତେକ ସପ୍ତାହରେ ରାଜସ୍ବ ଆଦାୟ ହେଉଥିଲେ ମଧ୍ୟ ଚାଷୀ ଓ ବ୍ୟବସାୟୀଙ୍କୁ ସୁବିଧା ଯୋଗାଇ ଦିଆଯାଉନାହିଁ। ତୁରନ୍ତ ଏ ଦିଗରେ ପ୍ରଶାସନ ପକ୍ଷରୁ ପଦକ୍ଷେପ ନିଆ ନ ଗଲେ ଆଗାମୀ ଦିନରେ ଆନ୍ଦୋଳନ କରାଯିବ ବୋଲି ବ୍ୟବସାୟୀ ଓ ଚାଷୀମାନେ ପ୍ରକାଶ କରିଛନ୍ତି।