ଲକ୍ଷ୍ନୌ,୨୭।୧୦: ସମାଜବାଦି ପାର୍ଟିର ବରିଷ୍ଠ ନେତା ତଥା ରାମପୁରର ବିଧାୟକ ଆଜମ ଖାନଙ୍କୁ ଉତ୍ତେଜନାମୂଳକ ଭାଷଣ ଦେବା ଅଭିଯୋଗରେ କୋର୍ଟ ୩ ବର୍ଷ ଜେଲ୍ ଦଣ୍ଡାଦେଶ ଶୁଣାଇଛନ୍ତି। ଏହାସହ ତାଙ୍କୁ ୨୫ ହଜାର ଜୋରିମାନା ମଧ୍ୟ କରାଯାଇଛି। ତାଙ୍କ ବିଧାନସଭାର ସଦସ୍ୟତା ପଦ ଯିବା ସମ୍ଭାବନା ସୃଷ୍ଟି ହୋଇଛି। ଦୀର୍ଘ ୧.୩୦ ଘଣ୍ଟାର ବିତର୍କ ପରେ କୋର୍ଟ ଏହି ରାୟ ଦେଇଛନ୍ତି। ଆଜମ ଖାନ ରାମପୁରର ୧୦ଥର ବିଧାୟକ ଏବଂ ଏସପିର ପ୍ରତିଷ୍ଠାତା ସଦସ୍ୟମାନଙ୍କ ମଧ୍ୟରୁ ଜଣେ।
ସୂଚନାଯୋଗ୍ୟ, ୨୦୧୯ ଲୋକ ସଭା ନିର୍ବାଚନ ସମୟରେ ଆଜମ ଉତ୍ତେଜନାମୂଳକ ଭାଷଣ ଦେଇଥିଲେ। ୨୭ ଜୁଲାଇ ୨୦୧୯ରେ ଭାଜପା ନେତା ଆକାଶ ସକ୍ସେନା ଆଜମଙ୍କ ବିରୋଧରେ ମାମଲା ଦାୟର କରିଥିଲେ। ଅଭିଯୋଗ ହୋଇଛି ଯେ, ରାମପୁରର ମିଲାକ ବିଧାନସଭା ଆସନରେ ଜନସାଧାରଣଙ୍କୁ ସମ୍ବୋଧିତ କରୁଥିବାବେଳେ ଆଜମ ମୁଖ୍ୟମନ୍ତ୍ରୀ ଯୋଗୀ, ପ୍ରଧାନମନ୍ତ୍ରୀ ମୋଦି ଏବଂ ତତ୍କାଳୀନ ଡିଏମ ବିଷୟରେ ଆପତ୍ତିଜନକ ଭାଷା ବ୍ୟବହାର କରିଥିଲେ। ୩ ବର୍ଷ ପରେ ଆଜମଙ୍କୁ କୋର୍ଟ ଦୋଷୀ ସାବ୍ୟସ୍ତ କରିଥିଲେ ଏବଂ ଦଣ୍ଡ ଘୋଷଣା କରିଥିଲେ।
ଦଣ୍ଡ ଘୋଷଣା ପୂର୍ବରୁ କୋର୍ଟ ପରିସରରେ ସୁରକ୍ଷା ବୃଦ୍ଧି କରାଯାଇଥିଲା। ଘଟଣାସ୍ଥଳରେ ପୋଲିସ ଫୋର୍ସ ମୁତୟନ କରାଯାଇଥିଲା ଏବଂ କୋର୍ଟ କମ୍ପ୍ଲେକ୍ସ ଫାଟକ ନିକଟରେ ପୋଲିସ କର୍ମଚାରୀମାନେ ହାଇ ଆଲର୍ଟରେ ଥିଲେ।