ରିୟାଲିଟି ଶୋ’ ‘ମିଠା ମିଠା ଯୋଡି’ରୁ ଅଭିନୟର ଯାତ୍ରା ଆରମ୍ଭ। ଏହାପରେ ସିରିୟଲ, ମ୍ୟୁଜିକ୍ ଭିଡିଓ, ଓ୍ବେବ୍ ସିରିଜ୍ କରି ସେ ଘରେ ଘରେ ପରିଚିତା। ନିଖୁଣ ଅଭିନୟରେ ଦର୍ଶକଙ୍କ ମନ ଜିଣୁଥିବା ଏଇ ନାୟିକା ଜଣକହେଉଛନ୍ତି ଚୁଲ୍ବୁଲି
ଶ୍ରଦ୍ଧା ପାଣିଗ୍ରାହୀ।
ପାଠପଢାରେ କେମିତି?
ପାଠ ପଢାରେ ବହୁତ ଭଲ ଥିଲି। ଘରେ ଭାବିଥିଲେ ଭଲ ଚାକିରି କରିବି।
ଅଭିନେତ୍ରୀ ନ ହେଇଥିଲେ କ’ଣ ହେଇଥାନ୍ତେ?
ପୋଲିସ୍ ଅଫିସର୍। ଆଉ ଏଭଳି ଇଛା ପଛର କାରଣ ହେଉଛି- ସ୍କୁଲ କଲେଜରେ ପଢିବାବେଳେ ବହୁତ ପିଲା ମତେ ଫଲୋ କରୁଥିଲେ। କମେଣ୍ଟ ମାରୁଥିଲେ। ତେଣୁ ଭାବୁଥିଲି ପୋଲିସ୍ ଅଫିସର୍ ହେଇ ଏଭଳି ପିଲାଙ୍କୁ ଜେଲ୍ରେ ପୁରେଇ ଧୁମ୍ ପିଟିବି।
ବିଉଟି ସିକ୍ରେଟ୍ କ’ଣ?
ପ୍ରାକୃତିକ ଜିନିଷ ବ୍ୟବହାର କରେ। ଆଉ ସବୁବେଳେ ଖୁସିରେ ରହିବାକୁ ଚେଷ୍ଟା କରେ। ଟେନ୍ସନ୍୍ ଆସିଲେ ଅଳ୍ପ ସମୟ ଚିନ୍ତାରେ ରହି ପରେ ତାକୁ ଭୁଲିଯାଏ। ମୋର ପର୍ସନାଲ ଏକ ୟୁଟ୍ୟୁବ୍ ଚ୍ୟାନେଲ୍ ଅଛି। ଯେଉଁଥିରେ ମୁଁ ନିଜେ ବେନିଫିଟ୍ ପାଉଥିବା ବିଉଟି ଟିପ୍ସକୁ ଶେୟାର କରିଥାଏ।
ଡ୍ରିମ୍ ରୋଲ୍?
ସବୁବେଳେ ସିମ୍ପଲ, ସୋବର ରୋଲ୍ କରି କିଛି ଭିନ୍ନ କରିବାର ଇଛା ଅଛି। ଆଉ ମୋର ଡ୍ରିମ୍ ରୋଲ ହେଉଛି ସାଇକୋ କ୍ୟାରେକ୍ଟର କରିବା।
ପ୍ରଥମ କ୍ରସ୍ କିଏ ଥିଲେ?
ବାବୁସାନ୍ ମତେ ବହୁତ ଭଲ ଲାଗନ୍ତି। ତାଙ୍କ ଚକ୍ଲେଟି ଲୁକ୍ ଓ ମଜାମସ୍ତି ବାଲା କ୍ୟାରେକ୍ଟର ମତେ ବହୁତ ପସନ୍ଦ। ତେଣୁ ଇଣ୍ଡଷ୍ଟ୍ରିକୁ ଆସିବା ସମୟରେ ତାଙ୍କୁ ଦେଖିଲେ ମତେ ଭଲ ଫିଲ୍ ହେଉଥିଲା।
ଘୃଣା କାହାକୁ କରନ୍ତି?
ସତକୁ ସାମ୍ନା ନ କରିପାରି ସତକୁ ଲୁଚାଇବା ପାଇଁ ଗୋଟେ ପରେ ଗୋଟେ ମିଛ କହୁଥିବା ଲୋକଙ୍କୁ ମୁଁ ଘୃଣା କରେ।
ଫିଟ୍ନେସ୍ ରାଜ୍?
ପାଣି ଅଧିକା ପିଏ। ମୁଁ ଟିକେ ଅଳସୁଆ। ତାଛଡା ଶୁଟିଂ ସିଡ୍ୟୁଲ ପାଇଁ ଜିମ୍ ରେଗୁଲାର୍ ଯାଇପାରେନା। ସମୟ ମିଳିଲେ କରେ। ଯୋଗ ବି ସେମିତି ସମୟ ମିଳିଲେ କରେ। ଆଉ ମନ ଭଲ ନ ଥିଲେ ବି ଯୋଗ କରେ।
କେଉଁ ଅଭିନେତ୍ରୀ ଭଲ ଲାଗନ୍ତି?
ଅପରାଜିତା ମହାନ୍ତି। ତାଙ୍କର ଅଭିନୟ, ସୌନ୍ଦର୍ଯ୍ୟ ସବୁକିଛି ମତେ ଭଲ ଲାଗେ। ମୋ ଡାକ ନାଁ ବି ଟିକି। ଇଣ୍ଡଷ୍ଟ୍ରୀରେ କେହି କେହି ମତେ କମ୍ପ୍ଲିମେଣ୍ଟ ବି ଦେଇଛନ୍ତି ତାଙ୍କର ଛାପ ମୋଠି ଅଛି ବୋଲି। ଆଉ ବଲିଉଡ୍ରେ ମୋର ପସନ୍ଦ ରାନୀ ମୁଖାର୍ଜୀ।
ଲାଇଫ୍ ପାର୍ଟନର୍
ବାପାମା’ଙ୍କ ଉପରେ ଛାଡିଛି। ସେମାନେ ଯେଉଁମାନଙ୍କୁ ବାଛିବେ ତା’ଭିତରୁ ଜଣକୁ ବାଛି ଆରେଞ୍ଜ ମ୍ୟାରେଜ୍ କରିବି।
ସିନେମା ନା ସିରିୟଲ କେଉଁଥିରେ କାମ କରିବାକୁ ବେଶି ପସନ୍ଦ?
ସିନେମା ଅପେକ୍ଷା ସିରିୟଲରେ କାମ କରିବାକୁ ବେଶି ପସନ୍ଦ କରେ। କାହିଁକି ନା ଓଡିଆ ସିନେମାକୁ ବହୁତ କମ୍ ଲୋକ ଯାଉଛନ୍ତି ଦେଖିବାକୁ। ଆଉ ସିରିୟଲକୁ ଘରେ ଘରେ ଟିଭି ପରଦାରେ ଦେଖନ୍ତି।