ହାଥରସ,୩ ।୧୦: ଉତ୍ତର ପ୍ରଦେଶ ହାଥରସରେ ହୋଇଥିବା ବଳାତ୍କାର ମାମଲାକୁ ନେଇ ଏବେ ସାରା ଦେଶରେ ଚାପା ଗୁଞ୍ଜରଣ ସୃଷ୍ଟି ହୋଇଛି । ଏହାକୁ ନେଇ ରାଜନୀତି ବି ଆରମ୍ଭ ହୋଇ ଗଲାଣି । ମିଳିଥିବା ସୂଚନାରୁ ଜଣାପଡିଛି କି ମୁଖ୍ୟ ସଚିବ (ଗୃହ) ଓ ଡିଜିପି ପୀଡ଼ିତାଙ୍କ ପରିବାର ସହ ଭେଟିବାକୁ ଯାଇପାରନ୍ତି । ଏବେ ମାମଲାକୁ ନେଇ ହାଇକୋର୍ଟର ଡବଲ ବେଞ୍ଜ ଅକ୍ଟୋବର ୧୨ ସୁଦ୍ଧା ସ୍ପଷ୍ଟିକରଣ ମାଗିଛନ୍ତି । କୋର୍ଟ ମୁଖ୍ୟ ସଚିବ (ଗୃହ), ଡିଜିପି, ଏଡିଜି, ଡିଏମ୍ ଓ ଏସ୍ପିଙ୍କ ନିକଟରୁ ସ୍ପଷ୍ଟିକରଣ ଲୋଡିଛନ୍ତି । ତେବେ ମୁଖ୍ୟ ସଚିବ (ଗୃହ) ଓ ଡିଜିପି ହାଥରସରେ ହେଲିକ୍ୟାପ୍ଟରରେ ପହଞ୍ଚିବେ ବୋଲି ସୂଚନା ରହିଛି । ଏଥିପାଇଁ ହେଲିପ୍ୟାଡ ବି ପ୍ରସ୍ତୁତ ହୋଇଛି । ତେବେ କଂଗ୍ରେସର ପୂର୍ବତନ ଅଧ୍ୟକ୍ଷ ରାହୁଲ ଗାନ୍ଧୀ ପୁଣିଥରେ ହାଥରସ ଗସ୍ତ କରିପାରନ୍ତି ବୋଲି ଅନୁମାନ କରି ଉତ୍ତର ପ୍ରଦେଶ କଂଗ୍ରେସ ଅଧ୍ୟକ୍ଷ ଅଜୟ କୁମାର ଲଲ୍ଲୁଙ୍କୁ ହାଉସ ଆରେଷ୍ଟ କରାଯାଇଛି । ଏବେ ମିଳିଥିବା ତାଜା ଖବର ଅନୁଯାୟୀ, ଗଣମାଧ୍ୟମଙ୍କୁ ପୀଡ଼ିତା ପରିବାର ସହ ଭେଟିବାକୁ ଅନୁମତି ପ୍ରଦାନ କରାଯାଇଛି । ଅନ୍ୟପଟେ ପୀଡ଼ିତାଙ୍କ ପରିବାର ନାର୍କୋ ଟେଷ୍ଟ କରିବାକୁ ମନା କରି ଦେଇଦେବା ସହ ଡିଏମ୍ଙ୍କ ଉପରେ ଅଭିଯୋଗ ଆଣିଛନ୍ତି । ସେମାନେ କହିଛନ୍ତି ଆମର ପୋଲିସ ଉପରେ ଭରସା ନାହିଁ ।
