ବ୍ରହ୍ମପୁର ଅଫିସ,୨୩।୧୦: ୨୦୦୦ରୁ ୨୦୧୯ ମସିହା ମଧ୍ୟରେ ୫ ବିଧାନସଭା ନିର୍ବାଚନ ହୋଇଛି। ଏହି ସମୟ ଭିତରେ ଗଞ୍ଜାମରୁ ୮ ବିଜେଡି ବିଧାୟକ ଲଗାତର ନିର୍ବାଚିତ ହୋଇ ହ୍ୟାଟ୍ରିକ୍ କରିଛନ୍ତି। ଦଳ ସୁପ୍ରିମୋ ନବୀନ ପଟ୍ଟନାୟକ ହିଞ୍ଜିଳି ଆସନରୁ ବିପୁଳ ଭୋଟରେ ୫ ଥର ଜିତି ୫ମ ପାଳି ମୁଖ୍ୟମନ୍ତ୍ରୀ ହୋଇ ରେକର୍ଡ ସୃଷ୍ଟି କରିଛନ୍ତି। କେବଳ ରାଜନୀତି ନୁହେଁ ବିଭିନ୍ନ କ୍ଷେତ୍ରରେ ନିଜର ଦକ୍ଷତା ପ୍ରମାଣିତ କରିଛନ୍ତି।
ବର୍ତ୍ତମାନର ବିଧାନସଭା ବାଚସ୍ପତି ବିକ୍ରମ କେଶରୀ ଆରୁଖ ଭଞ୍ଜନଗର ନିର୍ବାଚନମଣ୍ଡଳୀରୁ ୨୦୦୦ରୁ ୧୯ ନିର୍ବାଚନ ମଧ୍ୟରେ ୫ଥର ଜିତିଛନ୍ତି। ବିଜେଡି ଗଠନ ପୂର୍ବରୁ ସେ ୧୯୯୫ ନିର୍ବାଚନରେ ସେହି ଆସନରୁ ପ୍ରଥମେ ଜନତା ଦଳରୁ ନିର୍ବାଚିତ ହୋଇଥିଲେ। ଲଗାତର ୬ ଥର ବିଧାୟକ ଆରୁଖ ଶାସକ ଦଳ ମୁଖ୍ୟ ସଚେତକ ଏବଂ ୨୦୦୯ରୁ କ୍ରମାନ୍ବୟରେ ୩ ଥର କ୍ୟାବିନେଟ ମନ୍ତ୍ରୀ ପଦ ପାଇ କେତେକ ଗୁରୁତ୍ୱପୂର୍ଣ୍ଣ ବିଭାଗ ସଫଳତାର ସହ ସମ୍ଭାଳିଥିଲେ। ପରବର୍ତ୍ତୀ ପର୍ଯ୍ୟାୟରେ ସେ ବାଚସ୍ପତି ହୋଇଛନ୍ତି।
ସେହିପରି ପୂର୍ବତନ ବାଚସ୍ପତି ସୂର୍ଯ୍ୟ ନାରାୟଣ ପାତ୍ର ୧୯୯୦ରୁ ୨୦୧୯ ଭିତରେ ହୋଇଥିବା ୭ ନିର୍ବାଚନରେ ପୂର୍ବ ମୋହନା ଓ ବର୍ତ୍ତମାନର ଦିଗପହଣ୍ଡି ନିର୍ବାଚନମଣ୍ଡଳୀରୁ ଲଗାତର ବିଧାୟକ ଭାବେ ନିର୍ବାଚିତ ହୋଇଛନ୍ତି। ୯୦ ଓ ୯୫ ନିର୍ବାଚନରେ ସେ ଜନତା ଦଳରୁ ମୋହନା ଆସନରୁ ଜିତିଥିଲେ। ୨୦୦୦ ଓ ୨୦୦୪ ନିର୍ବାଚନରେ ସେହି ଆସନରୁ ବିଜେଡିରୁ ଏବଂ ୨୦୦୯, ୨୦୧୪ ଓ ୨୦୧୯ ନିର୍ବାଚନରେ ଦିଗପହଣ୍ଡି କ୍ଷେତ୍ରରୁ ବିଜେଡି ବିଧାୟକ ହୋଇଛନ୍ତି। ପାତ୍ର ଡବଲ ହ୍ୟାଟ୍ରିକ୍ କରିଛନ୍ତି। ଏବେ ନଗର ଉନ୍ନୟନ ମନ୍ତ୍ରୀ ଥିବା ଉଷା ଦେବୀ ୨୦୦୦ରୁ ୧୯ ମଧ୍ୟରେ ଚିକିଟି ବିଧାନସଭା କ୍ଷେତ୍ରରୁ ଲଗାତର ୫ ଥର ଜିତି ହ୍ୟାଟ୍ରିକ୍ କରିଛନ୍ତି। ସେ ୧୯୯୦ ନିର୍ବାଚନରେ ପ୍ରଥମେ ଜନତା ଦଳରୁ ନିର୍ବାଚିତ ହୋଇଥିଲେ। ୩ ଥର କ୍ୟାବିନେଟ ମନ୍ତ୍ରୀ ପଦ ପାଇଛନ୍ତି। ଗୋପାଳପୁର ବିଧାୟକ ପ୍ରଦୀପ ପାଣିଗ୍ରାହୀ ୨୦୦୯ରୁ ୧୯ ମଧ୍ୟରେ ଲଗାତର ବିଜେଡିରୁ ନିର୍ବାଚିତ ହୋଇ ହ୍ୟାଟ୍ରିକ୍ କରିଛନ୍ତି। ପାଣିଗ୍ରାହୀ ପ୍ରାୟ ଦୁଇ ବର୍ଷ ହେବ ବିଜେଡିରୁ ବହିଷ୍କୃତ ହୋଇଛନ୍ତି। ଅପରପକ୍ଷରେ ସୋରଡ଼ା ବିଧାୟକ ପୂର୍ଣ୍ଣଚନ୍ଦ୍ର ସ୍ବାଇଁ ୨୦୦୯ରୁ ୧୯ ମଧ୍ୟରେ ୩ ଥର ବିଜେଡି ବିଧାୟକ ହୋଇ ହ୍ୟାଟ୍ରିକ୍ କରିଛନ୍ତି। ପୂର୍ବତନ ବ୍ରହ୍ମପୁର ବିଧାୟକ ରମେଶ ଚନ୍ଦ୍ର ଚ୍ୟାଉ ପଟ୍ଟନାୟକ ୨୦୦୦ରୁ ୧୪ ନିର୍ବାଚନ ମଧ୍ୟରେ ଲଗାତର ଜିତି ହ୍ୟାଟ୍ରିକ କରିଥିଲେ। ୯୫ ନିର୍ବାଚନରେ ସେ ଜନତା ଦଳରୁ ନିର୍ବାଚିତ ହୋଇଥିଲେ।
ପୂର୍ବତନ ବିଧାୟିକା ସୁଜ୍ଞାନ କୁମାରୀ ଦେଓ ୨୦୦୦ରୁ ୨୦୧୪ ମଧ୍ୟରେ ବିଜେଡିରୁ ଲଗାତର ଖଲ୍ଲିକୋଟ ଓ କବିସୂର୍ଯ୍ୟନଗର ଆସନରୁ ନିର୍ବାଚିତ ହୋଇଥିଲେ। ସେ ଏହା ପୂର୍ବରୁ ଖଲ୍ଲିକୋଟରୁ ବିଭିନ୍ନ ଦଳରୁ ୫ ଥର ବିିଧାୟିକା ହୋଇଥିଲେ।