ମେଲବୋର୍ନ, ୨।୪(ପି.ଟି.)-ଚେନ୍ନାଇ ସୁପରକିଙ୍ଗ୍ସର ଅଷ୍ଟ୍ରେଲୀୟ ଫାଷ୍ଟ ବୋଲର ଜୋଶ ହାଜଲେଉଡ୍ ଆଗାମୀ ଇଣ୍ଡିଆନ ପ୍ରିମିୟର ଲିଗ୍ (ଆଇପିଏଲ)ରୁ ଓହରି ଯାଇଛନ୍ତି। ଆଗାମୀ ଦିନରେ ଖେଳାଯିବାକୁ ଥିବାଆଶେସ ସିରିଜ ଏବଂ ଟି୨୦ ବିଶ୍ୱକପ ପାଇଁ ସତେଜ ରହିବାକୁ ସେ ବିଶ୍ରାମ ନେବା ଉଦ୍ଦେଶ୍ୟରେ ଏପରି ନିଷ୍ପତ୍ତି ନେଇଛନ୍ତି। ଆଇପିଏଲରେ ଖେଳିବାକୁ ଥିବା ଅନ୍ୟ ଅଷ୍ଟ୍ରେଲୀୟ ଖେଳାଳିଙ୍କ ସହ ହାଜଲେଉଡ ଚେନ୍ନାଇ ଦଳରେ ଯୋଗ ଦେଇଥିଲେ, ମାତ୍ର ପରେ ଏହି ବ୍ୟୟବହୁଳ ଲିଗ୍ରେ ନ ଖେଳିବାକୁ ନିଷ୍ପତ୍ତି ନେଇଥିଲେ। ଆଇପିଏଲର ଆଗାମୀ ସଂସ୍କରଣ ଚଳିତ ମାସ ୯ରେ ଆରମ୍ଭ ହୋଇ ମେ ୩୦ରେ ଶେଷ ହେବ। ଆଗାମୀ ଦୁଇମାସ ପରିବାର ସହ କଟାଇବାକୁ ହାଜଲେଉଡ ନିଷ୍ପତ୍ତି ନେଇଛନ୍ତି। ୨୦୨୦ର ଶେଷଭାଗରେ ୟୁଏଇରେ ହୋଇଥିବା ଆଇପିଏଲର ଗତ ସଂସ୍କରଣରେ ସେ ଚେନ୍ନାଇ ପକ୍ଷରୁ ୩ଟି ମ୍ୟାଚରେ ଖେଳିଥିଲେ। ଦୀର୍ଘ ୧୦ ମାସ ଧରି ବାୟୋବବ୍ଲରେ ରହିବା ସହ ବିଭିନ୍ନ ସମୟରେ କ୍ୱାରାଣ୍ଟାଇନ୍ରେ ରହିବାକୁ ପଡ଼ିଥିବାରୁ ସେ କ୍ରିକେଟରୁ କିଛିଦିନ ଦୂରେଇ ରହିବାକୁ ଚାହୁଁଛନ୍ତି ବୋଲି ପ୍ରକାଶ କରିଛନ୍ତି।