ଅହମଦାବାଦ,୧୫।୧୧ : ଗୁଜରାଟରେ ମୋରବି ଝୁଲାପୋଲ ଦୁର୍ଘଟଣାକୁ ନେଇ ହାଇକୋର୍ଟ ରାଜ୍ୟ ସରକାରଙ୍କୁ କଡ଼ା ସମାଲୋଚନା କରିଛନ୍ତି। ଏହାର ମରାମତି ପାଇଁ ଚୁକ୍ତିନାମା ପ୍ରଦାନ କରିବାର ପଦ୍ଧତି ଉପରେ ମଧ୍ୟ କୋର୍ଟ ପ୍ରଶ୍ନ କରିଛନ୍ତି। ଅଦାଲତ ମୁଖ୍ୟ ଶାସନ ସଚିବଙ୍କୁ ଡକାଇ ଏପରି ଗୁରୁତ୍ୱପୂର୍ଣ୍ଣ କାର୍ଯ୍ୟ ପାଇଁ ଟେଣ୍ଡର କାହିଁକି ଆମନ୍ତ୍ରିତ କରାଯାଇ ନଥିଲା ବୋଲି ପଚାରିଛନ୍ତି।
ଶୁଣାଣି ସମୟରେ ପ୍ରଧାନ ବିଚାରପତି ଅରବିନ୍ଦ କୁମାରଙ୍କ ଖଣ୍ଡପୀଠ ମଧ୍ୟ ପ୍ରଶ୍ନ ପଚାରିଛନ୍ତି ଯେ ଏହି ଗୁରୁତ୍ୱପୂର୍ଣ୍ଣ କାର୍ଯ୍ୟ ପାଇଁ ଚୁକ୍ତିନାମା କିପରି ଦେଢ଼ ପୃଷ୍ଠାରେ ସମ୍ପୂର୍ଣ୍ଣ ହୋଇଛି? ଚାଲାକି ନ କରି ପ୍ରଶ୍ନର ଜବାବ ଦିଅ ବୋଲି କୋର୍ଟ କହିଛନ୍ତି।
ପୂର୍ବରୁ ହାଇକୋର୍ଟ ଏହି ଘଟଣାରେ ୬ଟି ବିଭାଗକୁ ଉତ୍ତର ମାଗିଥିଲେ। ସୋମବାର ସୁପ୍ରିମକୋର୍ଟ ଏହି ଘଟଣାର ଯାଞ୍ଚ ପାଇଁ ନ୍ୟାୟିକ ଆୟୋଗର ଗଠନ ଚାହୁଁଥିବା ଏକ ଜନସ୍ବାର୍ଥ ମାମଲାର ଶୁଣାଣିକୁ ତାଲିକାଭୁକ୍ତ କରିବାକୁ ସହମତି ପ୍ରକାଶ କରିଥିଲେ।
ପ୍ରଧାନ ବିଚାରପତି ଡି.ଓ୍ବାଇ ଚନ୍ଦଚୂଡ଼ ଏବଂ ବିଚାରପତି ଜିବି ପାରଦିଓ୍ବାଲାଙ୍କ ନେତୃତ୍ୱରେ ଗଠିତ ଖଣ୍ଡପୀଠ ଆଇନଜୀବୀ ବିଶାଳ ତିଓ୍ବାରୀଙ୍କୁ କହିଥିଲେ ଯେ ଆମେ କାଗଜପତ୍ର ବିଳମ୍ବରେ ପାଇଲୁ। ଆମେ ଏହାକୁ ତାଲିକାଭୁକ୍ତ କରିବୁ। ତିୱାରୀ ଆବେଦନରେ କହିଛନ୍ତି ଯେ ଏହି ଦୁର୍ଘଟଣା ସରକାରୀ କର୍ମଚାରୀଙ୍କ ଅବହେଳା ଏବଂ ଚରମ ବିଫଳତାକୁ ଦର୍ଶାଉଛି।
