ବରିଷ୍ଠ ନାଗରିକଙ୍କୁ ବଡ଼ କ୍ଷମତା ଦେଲେ ହାଇକୋର୍ଟ: ଦେଖାଶୁଣା ନ କଲେ ରଦ୍ଦହେବ ଦାନପତ୍ର

ନୂଆଦିଲ୍ଲୀ,୧୯ା୩: ସନ୍ତାନ ସନ୍ତତି କିମ୍ବା ନିକଟ ସମ୍ପର୍କୀୟ ଦେଖାଶୁଣା ନ କଲେ ବରିଷ୍ଠ ନାଗରିକମାନେ ପୂର୍ବ ସମ୍ପାଦିତ ଦାନପତ୍ରକୁ ରଦ୍ଦ କରିପାରିବେ। ଏପରି କି ଗିଫ୍ଟ ଡିଡ୍‌ରେ ଏହି ସର୍ତ୍ତ ଉଲ୍ଲେଖ କରାଯାଇ ନ ଥିଲେ ମଧ୍ୟ ଏହାକୁ ରଦ୍ଦ କରାଯାଇପାରିବ ବୋଲି ମାଡ୍ରାସ୍‌ ହାଇକୋର୍ଟ ଏକ ଗୁରୁତ୍ୱପୂର୍ଣ୍ଣ ରାୟ ଦେଇଛନ୍ତି।

ଆଲୋଚ୍ୟ ମାମଲାରେ ଜଷ୍ଟିସ୍‌ ଏସ୍‌.ଏମ୍‌. ସୁବ୍ରମଣ୍ୟମ୍‌ ଏବଂ କେ. ରାଜଶେଖରଙ୍କୁ ନେଇ ଗଠିତ ଖଣ୍ଡପୀଠ ମୃତ ଏସ୍‌. ନାଗଲକ୍ଷ୍ମୀଙ୍କ ବୋହୂ ଏସ୍‌. ମାଲା ଦାଖଲ କରିଥିବା ଅପିଲକୁ ଖାରଜ କରିଦେଇଛନ୍ତି। ନାଗଲକ୍ଷ୍ମୀ ନିଜ ପୁଅ କେଶବନଙ୍କ ସପକ୍ଷରେ ଏକ ସେଟେଲମେଣ୍ଟ ଡିଡ୍‌ (ବୁଝାମଣା ଦଲିଲ) ସମ୍ପାଦନ କରିଥିଲେ।

ନାଗଲକ୍ଷ୍ମୀ ଆଶା କରିଥିଲେ ଯେ, ପୁଅ କେଶବନ୍‌ ଓ ବୋହୂ ମାଲା ଆଜୀବନ ତାଙ୍କ ସେବାଯତ୍ନ କରିବେ। କିନ୍ତୁ ପୁଅବୋହୂ ଏଥିରେ ବିଫଳ ହୋଇଥିଲେ। ଇତିମଧ୍ୟରେ କେଶବନ୍‌ଙ୍କ ମୃତ୍ୟୁ ଘଟିଥିଲା। କେଶବନ୍‌ଙ୍କ ଅନ୍ତେ ମାଲା ନିଜ ଶାଶୁଙ୍କୁ ଜାଣିଶୁଣି ଅବହେଳା କରିବାରେ ଲାଗିଲେ। ଏହାକୁ ନେଇ ନାଗଲକ୍ଷ୍ମୀ ନାଗପଟ୍ଟିନମ୍‌ ରେଭେନ୍ୟୁ ଡିଭିଜନାଲ ଅଫିସର (ଆର୍‌ଡିଓ)ଙ୍କ ଦ୍ୱାରସ୍ଥ ହୋଇଥିଲେ। ଆର୍‌ଡିଓ ତାଙ୍କ ବୟାନ ରେକର୍ଡ କରିବା ପରେ ଉକ୍ତ ବୁଝାମଣାପତ୍ରକୁ ରଦ୍ଦ କରିଦେଇଥିଲେ। ମାଲା ଏହାକୁ ଚ୍ୟାଲେଞ୍ଜକରି ଏକ ପିଟିଶନ ଦାଖଲ କରିଥିଲେ, ଯାହାକି ରଦ୍ଦ ହୋଇଯାଇଥିଲା। ତେଣୁ ମାଲା ଏହା ଉପରେ ମାଡ୍ରାସ୍‌ ହାଇାକୋର୍ଟରେ ଆବେଦନ କରିଥିଲେ।

ଦୁଇଜଣିଆ ଖଣ୍ଡପୀଠ କହିଛନ୍ତି, ବରିଷ୍ଠ ନାଗରିକ ପିଲାଙ୍କଠାରୁ ମୌଳିକ ସୁବିଧା ଆଶାରେ ଦାନପତ୍ର କିମ୍ବା ବୁଝାମଣାପତ୍ର ଜରିଆରେ ନିଜ ସମ୍ପତ୍ତି ହସ୍ତାନ୍ତର କଲେ ମାତାପିତା ଏବଂ ବରିଷ୍ଠ ନାଗରିକଙ୍କ ଭରଣପୋଷଣ ଓ କଲ୍ୟାଣ ଆଇନ, ୨୦୦୭ର ଧାରା ୨୩(୧) ସେମାନଙ୍କୁ ସୁରକ୍ଷା ଦେଇଥାଏ। ଯଦି ହସ୍ତାନ୍ତରିତ ସମ୍ପତ୍ତିର ସମ୍ଭାବ୍ୟ ଗ୍ରହୀତା ନିଜ କର୍ତ୍ତବ୍ୟ ସମ୍ପାଦନରେ ବିଫଳ ହୁଅନ୍ତି ତେବେ ବରିଷ୍ଠ ନାଗରିକ ଏହାକୁ ରଦ୍ଦ କରାଇବା ସକାଶେ ଟ୍ରିବ୍ୟୁନାଲଙ୍କଠାରୁ ଏକ ଘୋଷଣାନାମା ଦାବି କରିପାରିବେ।

ବରିଷ୍ଠ ନାଗରିକ ସ୍ନେହ ଓ ଶ୍ରଦ୍ଧାରେ ପିଲା କିମ୍ବା ନିକଟ ସମ୍ପର୍କୀୟଙ୍କୁ ସମ୍ପତ୍ତି ହସ୍ତାନ୍ତର କରିଥାନ୍ତି। ଏହି ହସ୍ତାନ୍ତର କେବଳ ଏକ ଆଇନଗତ କାର୍ଯ୍ୟ ନୁହେଁ, ବରଂ ସେମାନଙ୍କ ବୃଦ୍ଧାବସ୍ଥାରେ ସେବାଯନତ୍ ପାଇବାର ଆଶା ଏଥିରେ ରହିଥାଏ। ଟ୍ରାଞ୍ଜାକ୍ସନରେ ଭଲପାଇବା ଓ ସ୍ନେହ ଏକ ସୂଚୀତ ସର୍ତ୍ତ ହୋଇ ରହିଥାଏ। ଏପରି କି ଟ୍ରାନ୍ସଫର ଦସ୍ତାବିଜରେ ଏହା ଉଲ୍ଲେଖ କରାଯାଇ ନ ଥିଲେ ମଧ୍ୟ କାର୍ଯ୍ୟକାରୀ ହୋଇଥାଏ। ସମ୍ପତ୍ତି ଗ୍ରହୀତା ପ୍ରତିଶ୍ରୁତି ମୁତାବକ ଦେଖାଶୁଣା ନ କଲେ ବରିଷ୍ଠ ନାଗରିକ ଉକ୍ତ ଆଇନର ଧାରା ୨୩(୧)କୁ ପ୍ରୟୋଗକରି ସମ୍ପୃକ୍ତ ଦସ୍ତାବିଜକୁ ରଦ୍ଦ କରିଦେଇପାରିବେ ବୋଲି ଖଣ୍ଡପୀଠ ସ୍ପଷ୍ଟ କରିଛନ୍ତି। ୮୭ ବର୍ଷୀୟା ନାଗଲକ୍ଷ୍ମୀ ବାଢ଼ିଥିବା ଯୁକ୍ତିରେ ଯଥାର୍ଥତା ରହିଛି। ସୁପ୍ରିମକୋର୍ଟ ଓ ଦେଶର ହାଇକୋର୍ଟଗୁଡ଼ିକ ପୂର୍ବରୁ ଏଭଳି ମାମଲାଗୁଡ଼ିକରେ ଦେଇଥିବା ରାୟ ଅନୁସାରେ ତାଙ୍କ ଦାନପତ୍ରକୁ ରଦ୍ଦ କରାଯାଉଛି ବୋଲି ଖଣ୍ଡପୀଠ କହିଛନ୍ତି।