ଗୋପବନ୍ଧୁନଗର(ଶାନ୍ତନୁ କୁମାର ମଢୁଆଳ)/ଖୁଣ୍ଟା(ଦେବରଞ୍ଜନ ବେହେରା), ୨୭ା୧୦: ମୟୂରଭଞ୍ଜ ଜିଲା ଖୁଣ୍ଟା ଥାନା ଡେଙ୍ଗାମସ୍ଥିତ ସିଦାମଡି ଗ୍ରାମରେ ପାରିବାରିକ କଳହରୁ ଏକ ହତ୍ୟାକାଣ୍ଡ ଘଟିଛି। ବାପାଙ୍କ ଠେଙ୍ଗା ମାଡରେ ପୁଅର ମୃତ୍ୟୁ ହେବା ଘଟଣା ସ୍ଥାନୀୟ ଅଞ୍ଚଳରେ ଚାଞ୍ଚଲ୍ୟ ସୃଷ୍ଟି କରିଛି। ମୃତ ପୁଅ ହେଲେ ମେଘରାଏ ଟୁଡୁ (୨୫)।
ଗୁରୁବାର ସନ୍ଧ୍ୟାରେ କୌଣସି କାରଣରୁ ବାପା ସଲାହି ଟୁଡୁ ଓ ପୁଅ ମେଘରାଏଙ୍କ ମଧ୍ୟରେ ଝଗଡା ହୋଇଥିଲା। ଉଭୟ ବାପ ଓ ପୁଅ ମାରପିଟ୍ ଲାଗିଥିବା ବେଳେ ବାପା ସଲାହି ଉତ୍ତ୍ୟକ୍ତ ହୋଇ ଏକ ଠେଙ୍ଗାରେ ପୁଅକୁ ନିର୍ମମ ଭାବେ ମାଡ ମାରିଥିଲେ। ଘଟଣାସ୍ଥଳରେ ତାଙ୍କର ମୃତ୍ୟୁ ହୋଇଥିଲା। ତେବେ ପରିବାର ଲୋକଙ୍କ କହିବା ଅନୁଯାୟୀ, ମେଘରାଏ ପ୍ରତିଦିନ ନିଶାସକ୍ତ ଅବସ୍ଥାରେ ଘରକୁ ଫେରି ସମସ୍ତଙ୍କ ସହ ଝଗଡା କରିବା ସହ ଘରୁ ବାହାରି ଯାଇ ଅନ୍ୟତ୍ର ରହିବାକୁ ଧମକ ଦେଇ ଆସୁଥିଲେ। ଏନେଇ ପ୍ରତି ଦିନ ବାପ ପୁଅଙ୍କ ମଧ୍ୟରେ ଝଗଡା ହେଉଥିଲା। ଗତ ସନ୍ଧ୍ୟାରେ ପୁଅର ନିର୍ଯାତନା ଅତ୍ୟଧିକ ହେବାରୁ ତାହାକୁ ସହ୍ୟ କରି ନ ପାରି ପୁଅକୁ ପିଟି ମାରି ଦେଇଥିବା ପୋଲିସ ନିକଟରେ ସଲାହି ସ୍ବୀକାର କରିଛନ୍ତି। ଏହି ଖବର ପ୍ରଚାରିତ ହେବା ପରେ ଗ୍ରାମ ଲୋକେ ସରପଞ୍ଚଙ୍କୁ ଜଣାଇଥିଲେ। ସରପଞ୍ଚ ନବକିଶୋର ମୁର୍ମୁ ପୋଲିସକୁ ଖବର ଦେବା ପରେ ଆଇଆଇସି ସୁଜାତା ଖମାରୀ ଘଟଣାସ୍ଥଳରେ ପହଞ୍ଚି ତଦନ୍ତ କରିବା ସହ ସଲାହିଙ୍କୁ ଥାନାରେ ଅଟକ ରଖି ପଚରାଉଚରା ଜାରି ରଖିଛନ୍ତି। ରକ୍ତାକ୍ତ ଅବସ୍ଥାରେ ଘର ଚଟାଣରେ ପଡି ରହିଥିବା ମେଘରାଏଙ୍କ ମୃତଦେହକୁ ଜବତ କରିବା ସହ ପୋଲିସ ଏକ ମାମଲା(ନଂ. ୨୯୬/୨୩) ରୁଜୁ କରିଛି।