ଭୁବନେଶ୍ୱର, ୬।୪(ବ୍ୟୁରୋ): ପିପିଲି ଉପନିର୍ବାଚନ ନେଇ ପ୍ରଚାର ଚାଲିଥିବା ବେଳେ ସୋମବାର ପୋଲିସ ଦୁଇ ଜଣ ଯୁବକଙ୍କ ପାଖରୁ ୫୦ ଲକ୍ଷ ଟଙ୍କା ଜବତ କରିଛି। ଏନେଇ ବିଜେଡି ପକ୍ଷରୁ ଭାଜପା ବିରୋଧରେ ଅଭିଯୋଗ କରାଯାଇଛି। ବିଜେଡିର ଗୋଟିଏ ଟିମ୍ ଏନେଇ ମୁଖ୍ୟ ନିର୍ବାଚନ ଅଧିକାରୀ ସୁଶୀଲ କୁମାର ଲୋହାନୀଙ୍କୁ ଭେଟିଛନ୍ତି। ବିଜେଡି ଅଭିଯୋଗରେ ଦର୍ଶାଇଛି ଯେ, ଭାଜପାର ଦୁଇ ଜଣ ନେତାଙ୍କ ନିକଟରୁ ପିପିଲିରେ ୫୦ ଲକ୍ଷ ଟଙ୍କା ଧରାଯାଇଛି। ଉପନିର୍ବାଚନ ହାରିଯାବା ଭୟ ବଢୁଥିବା ଯୋଗୁ ଭାଜପା ପ୍ରଚୁର ଟଙ୍କା ଧରି ପିପିଲି ଲୋକଙ୍କୁ ଭ୍ରମିତ କରିବାର ଅପଚେଷ୍ଟା ଆରମ୍ଭ କରିଛି। ହେଲେ ପିପିଲିବାସୀ ଶିକ୍ଷିତ ଏବଂ ସଚେତନ ଭୋଟର। ଭାଜପାର ଏସବୁ ପଦକ୍ଷେପକୁ ସେମାନେ ପ୍ରତ୍ୟାଖାନ କରିବେ। ଏସବୁ ଅନୈତିକ କାର୍ଯ୍ୟକ୍ରମ ଉପରେ ରୋକୋ ଲଗାଇବା ପାଇଁ ପିପିଲି ନିର୍ବାଚନମଣ୍ଡଳୀରେ ଆହୁରି ଗାଡିକୁ ପଇଁତରା କାର୍ଯ୍ୟରେ ନିୟୋଜିତ କରାଯାଉ। ଏହାସହ ଅଧିକ ସର୍ଭିଲାନ୍ସ ଟିମ୍ ବୃଦ୍ଧି କରି ଭାଜପାର ଏଭଳି କାମକୁ ରୋକାଯିବା ଆବଶ୍ୟକ। ଏହାସହ ଧରା ପଡିଥିବା ଟଙ୍କା କେଉଁଠାରୁ ଆସିଲା ତାହାର ଠିକ୍ରେ ଯାଞ୍ଚ କରି ଉପଯୁକ୍ତ କାର୍ଯ୍ୟାନୁଷ୍ଠାନ ଗ୍ରହଣ କରାଯାଉ। ଏହା ବ୍ୟତୀତ ଏକ ଶାନ୍ତିପୂର୍ଣ୍ଣ ନିର୍ବାଚନ ଲାଗି ପଦକ୍ଷେପ ନେବା ପାଇଁ ବିଜେଡି ଟିମ୍ ଅନୁରୋଧ କରିଛନ୍ତି।