ନୂଆଦିଲ୍ଲୀ,୨୮।୫: ଭାରତୀୟ କ୍ରିକେଟ ଦଳର ତାରକା ୱିକେଟ କିପର ବ୍ୟାଟ୍ସମ୍ୟାନ ଋଷଭ ପନ୍ତ ତାଙ୍କ ଜୀବନର ସବୁଠାରୁ କଷ୍ଟଦାୟକ ସମୟ ବିଷୟରେ ପ୍ରକାଶ କରିଛନ୍ତି। ନିକଟରେ ପନ୍ତ ଶିଖର ଧାୱନଙ୍କ ନୂଆ ସୋ ‘ଧାୱନ କରେଙ୍ଗେ’ରେ ଭାଗ ନେଇଥିଲେ। ଏହି ସମୟରେ, ୨୬ ବର୍ଷୀୟ ପନ୍ତ ଏକ ଗୁରୁତର କାର ଦୁର୍ଘଟଣା ପରେ ସେ ଅସହ୍ୟ ଯନ୍ତ୍ରଣା ବିଷୟରେ ଖୋଲାଖୋଲି ଭାବରେ କହିଥିଲେ ।
ଋଷଭ ପନ୍ତଙ୍କ ଅନେକ ଗୁଡିଏ ଫ୍ୟାକ୍ଚର ହୋଇଥିଲା ଏବଂ ଲିଗାମେଣ୍ଟ ପାଇଁ ଆଣ୍ଠୁ ଅସ୍ତ୍ରୋପଚାର କରିବାକୁ ପଡିଲା। ଏହି ଆଘାତ ତାଙ୍କ କ୍ୟାରିୟରକୁ ବିପର୍ଯ୍ୟସ୍ତ କରିଦେଲା, କିନ୍ତୁ ସେ ୧୫ ମାସ ବ୍ୟବଧାନ ପରେ ଆଇପିଏଲ ୨୦୨୪ ରେ ପ୍ରତ୍ୟାବର୍ତ୍ତନ କରିଥିଲେ ଏବଂ ଟି -୨୦ ବିଶ୍ୱକପ ୨୦୨୪ପାଇଁ ଭାରତୀୟ ଦଳରେ ଅନ୍ତର୍ଭୁକ୍ତ ହୋଇଥିଲେ।
ଆଘାତ ପରେ ତାଙ୍କ ଅଭିଜ୍ଞତା ବିଷୟରେ ଋଷଭ ପନ୍ତ କହିଛନ୍ତି, ଆଘାତରୁ ମୁକ୍ତି ପାଇବା ପାଇଁ ଆତ୍ମର୍ନିଭରଶୀଳତା ଏବଂ ଆତ୍ମବିଶ୍ୱାସ ଅତ୍ୟନ୍ତ ଗୁରୁତ୍ୱପୂର୍ଣ୍ଣ କାରଣ ଆପଣଙ୍କ ଆଖପାଖର ଲୋକମାନେ ସବୁ ପ୍ରକାରର କଥା କୁହନ୍ତି। ବ୍ୟକ୍ତିଗତ ଭାବରେ ତୁମ ପାଇଁ କ’ଣ ଭଲ ତାହା ଚିନ୍ତା କରିବାକୁ ପଡିବ। କାର ଦୁର୍ଘଟଣା ମୋ ପାଇଁ ଏକ ଜୀବନ ପରିବର୍ତ୍ତନକାରୀ ଅନୁଭୂତି ଥିଲା। ଯେତେବେଳେ ମୁଁ ଆଖି ଖୋଲିଲି, ମୁଁ ବିଶ୍ୱାସ କରି ନ ଥିଲି ଯେ ମୁଁ ବଞ୍ଚି ପାରିବି। କିନ୍ତୁ ପରମେଶ୍ୱର ମୋତେ ରକ୍ଷା କଲେ।
ସେ ଆହୁରି ମଧ୍ୟ କହିଛନ୍ତି, ମୁଁ ଦୁଇମାସ ପର୍ଯ୍ୟନ୍ତ ଦାନ୍ତ ଘଷି ନ ଥିଲି। ମୁଁ ପ୍ରାୟ ୬ରୁ ୭ମାସ ପର୍ଯ୍ୟନ୍ତ ଅସହ୍ୟ ଯନ୍ତ୍ରଣା ସହିଥିଲି । ମୁଁ ବିମାନବନ୍ଦରକୁ ଯିବାକୁ ଚାହୁଁ ନଥିଲି କାରଣ ମୁଁ ଏକ ହ୍ବିଲ ଚେୟାରରେ ବସି ଲୋକଙ୍କୁ ସାମ୍ନା କରିବାକୁ ଦ୍ୱିଧା ବୋଧ କରୁଥିଲି। ବର୍ତ୍ତମାନ ମୁଁ କ୍ରିକେଟକୁ ଫେରି ଆସିଛି, ଚାପ ଅପେକ୍ଷା ମୁଁ ଅଧିକ ଉତ୍ସାହିତ ଅନୁଭବ କରୁଛି। ମୋତେ ଲାଗୁଛି ଯେ ଏହା ଦ୍ୱିତୀୟ ଜୀବନ ପରି। ମୁଁ ଉତ୍ସାହିତ ଏବଂ ଟିକିଏ ନର୍ଭସ ମଧ୍ୟ।