କଟକ, ୯ା୪(ଶିଳ୍ପା ପ୍ରିୟଦର୍ଶିନୀ):ବାରବାଟୀ-କଟକ ବିଜେଡିର କର୍ମୀ ସମ୍ମିଳନୀ କଟକ ସାରଳା ଭବନରେ ସୋମବାର ପୂର୍ବାହ୍ନରେ ଅନୁଷ୍ଠିତ ହୋଇଥିଲା। ଏହି ସମ୍ମିଳନୀରେ ଯୋଗଦେବା ପରେ ବିଜେଡି କଟକ ଜିଲା ସଭାପତି ଦେବାଶିଷ ସାମନ୍ତରାୟ ଗଣମାଧ୍ୟମକୁ ପ୍ରତିକ୍ରିୟା ଦେଇ ଭାଜପା କଟକ ଲୋକ ସଭା ପ୍ରାର୍ଥୀ ଭର୍ତ୍ତୃହରି ମହତାବଙ୍କୁ ଟାର୍ଗେଟ୍ କରିଛନ୍ତି। ସେ କହିଛନ୍ତି, ଭର୍ତ୍ତୃହରି କେବେ ନିର୍ବାଚନ ସମୟରେ ବାହାରକୁ ବାହାରନ୍ତି ନାହିଁ। ଲୋକ କେବେ ତାଙ୍କୁ ଦେଖୁ ନ ଥିଲେ, କେବଳ ଶଙ୍ଖ ଚିହ୍ନ ପାଇଁ ସେ ନିର୍ବାଚନରେ ବିଜୟୀ ହୋଇ ୬ ଥର ଏମ୍ପି ହୋଇଛନ୍ତି। ହେଲେ ଏବେ ବିଜେଡି ବିରୋଧରେ କଟୁ ବାକ୍ୟ କହୁଛନ୍ତି। ଯାହାକି ସମ୍ପୂର୍ଣ୍ଣ ଭାବେ ନିନ୍ଦନୀୟ। ଅପରପକ୍ଷରେ କଟକ ସାରଳା ଭବନରେ ସୋମବାର ସନ୍ଧ୍ୟାରେ ବାରବାଟୀ-କଟକ ଭାଜପାର ଯୁବ ସଂକଳ୍ପ କାର୍ଯ୍ୟକ୍ରମରେ ଯୋଗଦେଇ ଭର୍ତ୍ତୃହରି କହିଛନ୍ତି, ଯେଉଁ ବ୍ୟକ୍ତି ଏପରି ବାକ୍ୟ କହିଛନ୍ତି ସେ କେବେ କୌଣସି ବ୍ୟକ୍ତିଙ୍କୁ ପ୍ରଶଂସା କରିନାହାନ୍ତି।