ଭୁବନେଶ୍ୱର,୬।୩(ବ୍ୟୁରୋ): ଦୁଗ୍ଧର ଲିଟର ପିଛା ସର୍ବନିମ୍ନ ସହାୟକ ମୂଲ୍ୟ (ଏମ୍.ଏସ୍.ପି.) ୩୫ ଟଙ୍କା କରିବାକୁ ଓଡ଼ିଶା ଦୁଗ୍ଧଚାଷୀ ମହାସଂଘ ଦାବି କରି ଆସୁଛି। ତେବେ ଏହାକୁ ସମାଜବାଦୀ ପାର୍ଟି ସମର୍ଥନ କରିବା ସହ ଦୁଗ୍ଧ ଚାଷୀଙ୍କ ଆର୍ଥତ୍କ ସ୍ବଚ୍ଛଳତା ବୃଦ୍ଧି ପାଇଁ କ୍ଷୀରର ଏକ ସ୍ଥିରୀକୃତ ମୂଲ୍ୟ ପ୍ରଦାନ କରିବାକୁ ସରକାରଙ୍କ ନିକଟରେ ଦୃଢ଼ ଦାବି ରଖିଛି। ପାର୍ଟିର ରାଜ୍ୟ କମିଟି ସଭାପତି ରବି ବେହେରା କହିଛନ୍ତି, ମଙ୍ଗଳବାରଠାରୁ ଅମୂଲ କମ୍ପାନୀ ଲିଟର ପିଛା ୨ ଟଙ୍କା କ୍ଷୀର ଦର ବୃଦ୍ଧି କରିଛି। ସେହିପରି ମଦର ଡାଏରୀ କମ୍ପାନୀ ମଧ୍ୟ ରବିବାରଠାରୁ ଦର ବୃଦ୍ଧି କରିବାକୁ ଯାଉଛି। କମ୍ପାନୀଗୁଡିକ ଗ୍ରାହକଙ୍କଠାରୁ ଲିଟର ପିଛା ୬୦ରୁ ଊର୍ଦ୍ଧ୍ୱ ଟଙ୍କା ନେଇ ଭଲ ଲାଭ କରୁଥିବାବେଳେ ଦୁଗ୍ଧ ଚାଷୀ ଲିଟର ପିଛା ମାତ୍ର ୨୭/୨୮ ଟଙ୍କା ପାଉଛନ୍ତି। ଦୁଗ୍ଧର ସର୍ବନିମ୍ନ କ୍ରୟମୂଲ୍ୟ ସ୍ଥିର କରାଯାଇ ନ ଥିବାରୁ ଚାଷୀମାନେ ଦୁଗ୍ଧ କମ୍ପାନୀଗୁଡ଼ିକ ଦ୍ବାରା ଶୋଷିତ ହେବାରେ ଲାଗିଛନ୍ତି। ତେଣୁ ଦାବି ଅନୁସାରେ ଦୁଗ୍ଧର ଏମ୍ଏସ୍ପି ଲାଗୁ ଜରୁରୀ ହୋଇପଡିଛି ବୋଲି ବେହେରା କହିଛନ୍ତି।
