ଭୁବନେଶ୍ୱର, ୬।୧୧(ବ୍ୟୁରୋ): ରାଜଧାନୀ ଉପକଣ୍ଠ ଚନ୍ଦକା ଥାନା ଅନ୍ତର୍ଗତ ପାଣିଓରା ଛତାବରସ୍ଥିତ ହାପି ମୋମେଣ୍ଟ୍ସ ରିସର୍ଟରେ ବେଆଇନ ଭାବେ ବିଳମ୍ବିତ ରାତିଯାଏ ଚାଲିଥିଲା ରେଭ୍ ପାର୍ଟି। ଜମିଥିଲା ବିଦେଶୀ ମଦର ଆସର। ରଙ୍ଗିନ ଆଲୁଅରେ ଡିଜେ ମ୍ୟୁଜିକ୍ର ତାଳେ ତାଳେ ନିଶାରେ ଝୁମି ଚାଲିଥିଲେ ୫୦ରୁ ଅଧିକ ଯୁବତୀଯୁବକ। ନିୟମକୁ ଖୋଲାଖୋଲି ଉଲ୍ଲଂଘନ କରି ରିସର୍ଟ ମାଲିକ ଆୟୋଜନ କରିଥିଲେ ଏହି ରେଭ୍ ପାର୍ଟି। ଚନ୍ଦକା ଥାନା ପୋଲିସ ରାତି ପ୍ରାୟ ୪ଟାରେ ଉକ୍ତ ରସର୍ଟରେ ଅତର୍କିତ ଚଢ଼ାଉ କରି ମାଲିକ ଓ ରୋଷେୟାଙ୍କୁ ଗିରଫ କରିଛି। ଏଥିସହ ଘଟଣାସ୍ଥଳରୁ ୪୦ କେନ୍ ମଦ (୨୦ ଲିଟର) ମଧ୍ୟ ଜବତ କରିଛି। ଗିରଫ ଅଭିଯୁକ୍ତଦ୍ୱୟ ହେଲେ ରିସର୍ଟ ମାଲିକ ତଥା ଶହୀଦନଗର ପ୍ଲଟ୍ ନଂ.ଏ-୧୨୦ରେ ରହୁଥିବା ଶିବ ପ୍ରସାଦ ପଟ୍ଟନାୟକ(୫୩)। ଅନ୍ୟଜଣେ ହେଲେ ପୁରୀ ଜିଲା ଗୋପ ଥାନା ଅନ୍ତର୍ଗତ ସୋଲାପୁର ଗ୍ରାମର ରାହୁଲ ମଲ୍ଲିକ (୩୦)। ଏନେଇ ଥାନାରେ ଏକ ମାମଲା ନଂ.୨୬୧/୨୦୨୨ ରୁଜୁ କରାଯାଇ ଅଭିଯୁକ୍ତଙ୍କୁ କୋର୍ଟ ଚାଲାଣ କରାଯାଇଛି। ତେବେ ପୋଲିସର ଚଢ଼ାଉ ଦେଖି ଯୁବତୀଯୁବକମାନେ ଛତ୍ରଭଙ୍ଗ ଦେଇଥିବାବେଳେ ଅନ୍ୟ କର୍ମଚାରୀମାନେ ଖସି ପଳାଇଥିଲେ।
ଏନେଇ ଚନ୍ଦକା ଥାନା ଅଧିକାରୀ ସୁରେନ୍ଦ୍ର ବଳ କହିଛନ୍ତି, ଘଟଣା ସଂକ୍ରାନ୍ତରେ ଅଧିକ ତଦନ୍ତ ଚାଲିଛି। କୋଭିଡ୍ କଟକଣା ଯୋଗୁ ହାପି ମୋମେଣ୍ଟ୍ସ ରିସର୍ଟକୁ ବନ୍ଦ କରାଯାଇଥିଲା। ପରେ କିଛି ମାସ ହେବ ସେଠାରେ ବିବାହ ଉତ୍ସବ କରାଯାଉଥିଲା। ହେଲେ ଶୁକ୍ରବାର ରାତିରେ ରେଭ୍ ପାର୍ଟି ଓ ମଦ ବେପାର ଚାଲିଥିବା ନେଇ ପାଟ୍ରୋଲିଂ ଟିମ୍ ଖବର ପାଇବା ପରେ ବିଳମ୍ବିତ ରାତିରେ ସେଠାରେ ଚଢ଼ାଉ କରିଥିଲୁ। ଏହା ଏକ ବେଆଇନ କାମ। ମାଲିକ କୌଣସି କାଗଜପତ୍ର ଦେଖାଇ ନ ପାରିବାରୁ ପଦକ୍ଷେପ ନେଇଛୁ। ଯଦି ଆଗାମୀ ଦିନରେ ଏଭଳି କାର୍ଯ୍ୟ କିଏ କରେ ତା’ ହେଲେ ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ସେ କହିଛନ୍ତି। ହେଲେ ମିଳିଥିବା ସୂଚନାନୁସାରେ, ଗତ କିଛିଦିନ ହେବ ଏହି ରିସର୍ଟରେ ରେଭ୍ ପାର୍ଟି ଚାଲିଥିଲା। ବିଳମ୍ବିତ ରାତି ପର୍ଯ୍ୟନ୍ତ ବିଦେଶୀ ମଦ ସହ ଅନ୍ୟ ନିଶା କାରବାର ହେଉଥିଲା। ହେଲେ ପୋଲିସ ପୂର୍ବରୁ କିପରି ଜାଣିପାରିଲା ନାହିଁ ତାହାକୁ ନେଇ ପ୍ରଶ୍ନ ଉଠୁଛି।