କଟକ ଅଫିସ,୫।୨: ସମସ୍ତଙ୍କର ସ୍ବପ୍ନ ଭିନ୍ନ ଭିନ୍ନ। ନିଜର ସ୍ବପ୍ନକୁ ସାକାର କରିବା ପାଇଁ ସମସ୍ତେ ଚେଷ୍ଟା କରିଥାନ୍ତି। ସେହିଭଳି ଏକ ସ୍ବପ୍ନ ଦେଖିଥିଲେ କଟକ ଜିଲା ବିରିବାଟିସ୍ଥିତ ଡିହସାହି ଗ୍ରାମର ଦିବ୍ୟଜ୍ୟୋତି ଜେନା(୨୦)। କମ୍ ବୟସରେ ସେ ୬୦ଟି ଦେଶର ୪୫୦ ମୁଦ୍ରା ଓ ୧୯ ନୋଟ୍ ସଂଗ୍ରହ କରି ଲୋକଲୋଚନକୁ ଆସିପାରିଛନ୍ତି। ସେ ଏବେ କଟକ ଷ୍ଟିୱାର୍ଟ ବିଜ୍ଞାନ ମହାବିଦ୍ୟାଳୟରେ ଯୁକ୍ତ ୩ ଶେଷବର୍ଷରେ ଅଧ୍ୟୟନ କରୁଛନ୍ତି। ଏ ସମ୍ପର୍କରେ ସେ କହିଛନ୍ତି, ନୟାବଜାରସ୍ଥିତ ସେଣ୍ଟ୍ ଜାଭିୟର ସ୍କୁଲରେ ପଢୁଥିବାବେଳେ ଗ୍ରୀଷ୍ମ ଅବକାଶ ସମୟରେ ବିଭିନ୍ନ ଦେଶ ମୁଦ୍ରା ସଂଗ୍ରହ କରିବା ପାଇଁ ଶିକ୍ଷକ ମୋତେ ଏକ ପ୍ରୋଜେକ୍ଟ ଦେଇଥିଲେ। ତଦନୁଯାୟୀ ବିଭିନ୍ନ ଦେଶର ମୁଦ୍ରା ସଂଗ୍ରହ କରି ସାର୍ଙ୍କଠାରୁ ପ୍ରଶଂସିତ ହୋଇଥିଲି। ଏହାପରଠାରୁ ଦେଶ ବିଦେଶର ମୁଦ୍ରା ସଂଗ୍ରହ କରିବା ମୋର ଏକ ନିଶା ପାଲଟି ଯାଇଥିଲା। ପରିବାର ସଦସ୍ୟ, ବନ୍ଧୁବାନ୍ଧବ, ସାଙ୍ଗସାଥୀ, ପଡୋଶୀ ଯଦି କେହି ବିଦେଶ ବୁଲିବାକୁ ଯାଉଥିଲେ, ସେଠାକାର ମୁଦ୍ରା ଆଣିବାକୁ ମୁଁ ତାଙ୍କୁ କହୁଥିଲି। ସେମାନେ ସେଠାକାର ମୁଦ୍ରା ଆଣି ଦେବା ପରେ ମୁଁ ଏହାକୁ ମୋ ଆଲ୍ବମ୍ରେ ସାଇତି ରଖୁଥିଲି। ଇତିମଧ୍ୟରେ ଅଷ୍ଟ୍ରେଲିଆ, ଇଂଲଣ୍ଡ, ଫ୍ରାନ୍ସ, ନେପାଳ, ଥାଇଲାଣ୍ଡ, ଜାପାନ, ଓମାନ୍, ଇରାକ୍, ଶ୍ରୀଲଙ୍କା, ପାକିସ୍ତାନ, ଇଣ୍ଡୋନେସିଆ, କାନାଡା, ମେକ୍ସିକୋ, ଆମେରିକା, ସିଙ୍ଗାପୁର ଭଳି ୬୦ଟି ଦେଶର ୪୫୦ ମୁଦ୍ରା ଓ ୧୯ଟି ନୋଟ୍ ସଂଗ୍ରହ କରି ଏବେ ତିନୋଟି ଆଲ୍ବମରେ ସାଇତି ରଖିଛନ୍ତି।