କୋଟଗଡ,୧୮।୧୦(ସରୋଜ ବଳିୟାରସିଂ): ସର୍ବଶିକ୍ଷା ଅଭିଯାନ ‘ସଭିଏଁ ପଢ଼ିବେ ସଭିଏଁ ବଢ଼ିବେ’ ନାରା ଦେଉଥିବା ବେଳେ ଆଦିବାସୀ ବହୁଳ କନ୍ଧମାଳ ଜିଲାରେ ଶିକ୍ଷା ବ୍ୟବସ୍ଥା ସମ୍ପୂର୍ଣ୍ଣ ଭାବେ ଫେଲ ମାରିଛି। ଏଠାରେ ଶ୍ରେଣୀ ଗୃହ ଅଭାବ ଥିବାରୁ ଦୀର୍ଘ ୩ ବର୍ଷ ଧରି ଖରା ଓ ଶୀତକୁ ଖାତିର ନ କରି ଛାତ୍ରୀଛାତ୍ରମାନେ ଆମ୍ବଗଛ ତଳେ ବସି ପାଠ ପଢୁଛନ୍ତି। ଏହା ଦେଖିବାକୁ ମିଳିଛି ତୁମୁଡିବନ୍ଧ ବ୍ଲକ ଉପାନ୍ତ ଝିରିପାଣି ସରକାରୀ ଉନ୍ନୀତ ଉଚ୍ଚ ବିଦ୍ୟାଳୟରେ।
ମସିହାରେ ଚାଉଳ ଧୁଆ ନଦୀ କୂଳରେ ଝରିପାଣି ସରକାରୀ ଉନ୍ନୀତ ଉଚ୍ଚ ବିଦ୍ୟାଳୟ ସ୍ଥାପନ କରାଯାଇଥିଲା। ଏହି ବିଦ୍ୟାଳୟରେ ପ୍ରଥମରୁ ଅଷ୍ଟମ ଶ୍ରେଣୀରେ ପଡୁଥିବା ଛାତ୍ରୀଛାତ୍ରଙ୍କ ସଂଖ୍ୟା ୧୫୮ଥିବାବେଳେ ଦୁଇ ଜଣ ଶିକ୍ଷୟିତ୍ରୀ ଓ ତିନି ଜଣ ଶିକ୍ଷକ ଅଛନ୍ତି। କିନ୍ତୁ ଛାତ୍ରୀଛାତ୍ରମାନଙ୍କ ପାଠ ପଢିବା ପାଇଁ ରହିଛି ମାତ୍ର ଗୋଟିଏ ଶ୍ରେଣୀ ଗୃହ। ସେହି ଶ୍ରେଣୀ ଗୃହରେ ପ୍ରଥମ, ଦ୍ୱିତୀୟ ଓ ତୃତୀୟ ଶ୍ରେଣୀର ପିଲାମାନେ ପଢ଼ୁଛନ୍ତି। ଚତୁର୍ଥ ଓ ପଞ୍ଚମ ଶ୍ରେଣୀ ପିଲାମାନେ ସ୍କୁଲ କ୍ୟାମ୍ପସରେ ତିଆରି ହୋଇଥିବା ରୋଷେଇ ଘରେ ପଢ଼ଥିବା ବେଳେ ସିଆରସି କୋଠାରେ ସପ୍ତମ ଓ ଅଷ୍ଟମ ଶ୍ରେଣୀର ପିଲାମାନେ ଅଧ୍ୟୟନ କରୁଛନ୍ତି। କିନ୍ତୁ ଷଷ୍ଠ ଶ୍ରେଣୀ ପିଲାଙ୍କ ପାଇଁ ଶ୍ରେଣୀ ଗୃହ ନଥିବାରୁ ସେମାନେ ଦୀର୍ଘ ତିନି ବର୍ଷ ହେଲାଣି ଆମ୍ବ ଗଛ ମୂଳେ ପଢୁଛନ୍ତି। ଏହି ସ୍କୁଲ ପାର୍ଶ୍ୱରେ ଚାଉଳ ଧୁଆ ନଦୀ ଥିବାରୁ ବର୍ଷା ଦିନେ ପାଣି ପଶିଗଲେ ଛାତ୍ରୀଛାତ୍ରମାନେ ବହୁ ଅସୁବିଧାର ସମ୍ମୁଖୀନ ହେଉଛନ୍ତି। ସ୍କୁଲ ଚାରିପଟେ ପାଚେରୀ ନାହିଁ, ଲାଟିନ ନାହିଁ, ପିଇବା ପାଣି ନାହିଁ ଫଳରେ ଛାତ୍ରୀଛାତ୍ରମାନଙ୍କୁ ବହୁ ଦୂର ଯିବାକୁ ପଡୁଛି। ଏ ନେଇ ବାରମ୍ବାର ସ୍କୁଲ କର୍ତ୍ତୃପକ୍ଷ ଜନପ୍ରତିନିଧିଙ୍କୁ ବ୍ଲକ ପ୍ରଶାସନଙ୍କୁ ଓ ଜିଲା ଉଚ୍ଚ ଅଧିକାରୀଙ୍କୁ ଜଣାଇଥିଲେ ମଧ୍ୟ ଆଜି ଯାଏ କୌଣସି ସୁଫଳ ମିଳିପାରୁନଥିବା ସ୍କୁଲ ସଭାପତି ମହେନ୍ଦ୍ର ପାତ୍ର ପ୍ରକାଶ କରିଛନ୍ତି। ଏଥିପାଇଁ ଆଜି ବି ଛାତ୍ରୀଛାତ୍ର ନିଜ ଜୀବନକୁ ବାଜି ଲଗାଇ ପାଠ ବଢ଼ିବାକୁ ବାଧ୍ୟ ହେଉଛନ୍ତି। ଏ ନେଇ ତୁମୁଡିବନ୍ଧ ଗୋଷ୍ଠୀ ଉନ୍ନୟନ ଅଧିକାରୀ ଲକ୍ଷ୍ମଣ ସୁରେନଙ୍କୁ ପଚାରିବାରୁ ମୁଁ ୪ ମାସ ହେବ ଆସିଛି ମୋ ପାଖରେ କୌଣସି ଅଭିଯୋଗ ଆସି ନାହିଁ। ଯଦି ଏହିଭଳି ଅସୁବିଧା ରହିଛି ତା’ହେଲେ ତୁରନ୍ତ ପଦକ୍ଷେପ ନିଆଯିବ ବୋଲି କହିଛନ୍ତି। ସ୍କୁଲର ପ୍ରଧାନ ଶିକ୍ଷକ କାମରାଜ କହଁର କହିଛନ୍ତି, ମୁଁ ଏହି ବିଷୟରେ ଅନେକ ଥର ବିଇଓଙ୍କ ଅଭିଯୋଗ କରିଛି ସେ ଶୁଣୁନାହାନ୍ତି।