ବୈପାରିଗୁଡ଼ା/ପଟ୍ଟାଙ୍ଗୀ, ୨୮ା୯(ଡି.ଏନ୍.ଏ.): କୋରାପୁଟ ଜିଲା ବୈପାରିଗୁଡ଼ା ତହସିଲ କାର୍ଯ୍ୟାଳୟରେ ମଙ୍ଗଳବାର ଲାଞ୍ଚ ନେଉଥିବା ବେଳେ ଜଣେ ବରିଷ୍ଠ କିରାଣି ଭିଜିଲାନ୍ସ ହାତରେ ଧରାପଡ଼ିଛନ୍ତି। ସେ ହେଲେ ସତ୍ୟ ନାରାୟଣ ଦଳେଇ। ଜମିବାଡ଼ି କିସମ ପରିବର୍ତ୍ତନ ପାଇଁ ଜଣେ ବ୍ୟକ୍ତିଙ୍କଠାରୁ ସେ ୫ ହଜାର ଟଙ୍କା ଦାବି କରିଥିଲେ। ସେ ଏନେଇ ଭିଜିଲାନ୍ସରେ ଅଭିଯୋଗ କରିଥିଲେ। ପୂର୍ବ ଯୋଜନା ମୁତାବକ ସତ୍ୟ ନାରାୟଣ ସମ୍ପୃକ୍ତ ବ୍ୟକ୍ତିଙ୍କଠାରୁ ଟଙ୍କା ଲାଞ୍ଚ ନେବା ବେଳେ ପୂର୍ବରୁ ଛପି ରହିଥିବା ଭିଜିଲାନ୍ସ ଟିମ୍ ଡଢାଉ କରି ତାଙ୍କୁ ଧରିଥିଲେ। ଭିଜିଲାନ୍ସ ପକ୍ଷରୁ ଏକକାଳୀନ କୋରାପୁଟ ଅମିନଲାଇନସ୍ଥିତ ତାଙ୍କ ବାସସ୍ଥାନ ଓ ପୈତୃକ ବାସସ୍ଥାନ ପଟ୍ଟାଙ୍ଗୀ ଗୋପବନ୍ଧୁ ପଲ୍ଲିସାହିଠାରେ ଚଢାଉ କରାଯାଇଛି। ପଟ୍ଟାଙ୍ଗୀରେ ଡିଏସ୍ପି ରୂପଧର ନାୟକଙ୍କ ନେତୃତ୍ୱରେ ୪ଜଣିଆ ଟିମ୍ ଚଢାଉ କରିଥିବା ଜଣାପଡିଛି। ଏଠାରୁ ୫ହଜାର ୯ଶହ ଟଙ୍କା, ଗୋଟିଏ ସୁନାହାର ଓ ଗୋଟିଏ ସୁନାମୁଦି ଜବତ ହୋଇଛି। କେସ୍ ନଂ. ୩୦/୨୨ରେ ଏକ ମାମଲା ରୁଜୁ ହୋଇଛି। ବୈପାରିଗୁଡା ଚଢାଉ ସମ୍ପର୍କରେ ବିସ୍ତୃତ ତଥ୍ୟ ଭିଜିଲାନ୍ସ ପକ୍ଷରୁ ମିଳିନାହିଁ ା ଏଠାରେ ଭିଜିଲାନ୍ସ ଡିଏସ୍ପିଙ୍କ ନେତୃତ୍ବରେ ୩ ଜଣ ଇନ୍ସପେକ୍ଟରଙ୍କ ସମେତ ୭ ଜଣିଆ ଟିମ୍ ଚଢାଉରେ ସାମିଲ ହୋଇଥିଲେ। ସୂଚନାଯୋଗ୍ୟ, ୪ ମାସ ତଳେ ସତ୍ୟ ନାରାୟଣ ବୈପାରିଗୁଡା ତହସିଲରେ ଯୋଗ ଦେଇଥିଲେ।
