କୋରାପୁଟ,୧୬ା୪(ସ୍ବ.ପ୍ର): ମୋବାଇଲ ଗେମ୍ ନିଶାରେ ପିଲା ଓ ଯୁବକମାନେ ଏତେ ଆସକ୍ତ ହୋଇପଡ଼ୁଛନ୍ତି ଯେ ସେମାନେ ଜଘନ୍ୟ କାଣ୍ଡ ଘଟାଇବାକୁ ପଛାଉନାହାନ୍ତି। କୋରାପୁଟ ଜିଲାରେ ଗୁରୁବାର ସେଭଳି ଏକ ଘଟଣା ଘଟିଛି। ଜଣେ ନାବାଳକଙ୍କୁ ପଥରରେ ଛେଚି ବୀଭତ୍ସ ଭାବେ ହତ୍ୟା କରିଛନ୍ତି ତାଙ୍କର ୨ ସାଙ୍ଗ। ଏହାପରେ ସେମାନେ ମୃତଦେହକୁ କୋଲାବ ନଦୀରେ ଭସାଇ ଦେଇଥିଲେ। ଶୁକ୍ରବାର ମୃତଦେହକୁ ଜବତ କରାଯିବା ସହ କୋରାପୁଟ ଟାଉନ ଥାନା ପୋଲିସ ଘଟଣା ଘଟାଇଥିବା ଦୁଇ ସାଙ୍ଗକୁ ଧରି ପଚରାଉଚରା କରିଛି। ସେମାନଙ୍କ ମଧ୍ୟରେ ଜଣେ ସାବାଳକ ଥିବାବେଳେ ଅନ୍ୟଜଣେ ହେଉଛନ୍ତି ନାବାଳକ। ଏହି ୩ ସାଙ୍ଗଙ୍କ ଘର କୋରାପୁଟ ବ୍ଲକ ମସ୍ତିପୁଟ୍ ଗ୍ରାମରେ ହୋଇଥିବାବେଳେ ଗ୍ରାମବାସୀ ମ୍ରିୟମାଣ ହୋଇପଡ଼ିଛନ୍ତି। ମୃତ ନାବାଳକ ହେଲେ ପୀତବାସ ଭୋଇଙ୍କ ୧୨ ବର୍ଷର ପୁଅ ଲୁଲୁ ଭୋଇ।
କୋରାପୁଟ ଅତିରିକ୍ତ ଏସ୍ପି ଉତ୍କଳ କେଶରୀ ଦାସଙ୍କ ସୂଚନା ଅନୁଯାୟୀ ଗଁା ଶେଷମୁଣ୍ଡରେ ଥିବା ସ୍କୁଲ ନିକଟରେ ଗୁରୁବାର ଅପରାହ୍ନ ପ୍ରାୟ ସାଢ଼େ ୪ଟାରେ ୩ ସାଙ୍ଗ ମୋବାଲଇ ଫୋନରେ ‘ଫ୍ରିଫାୟାର’ ଗେମ୍ ଖେଳୁଥିଲେ। ଏଥିରେ ଲୁଲୁ ହାରିଯାଇଥିଲେ। ଫଳରେ ପାଖରେ ଥିବା ଲକି ମାଳୀ(୧୯) ଓ ତାଙ୍କ ନାବାଳକ ସାଙ୍ଗ ଖେଳିବା ପାଇଁ ଲୁଲୁଙ୍କୁ ମୋବାଇଲ ଫୋନ ମାଗିଥିଲେ। ଲୁଲୁ ଦେବାକୁ ମନା କରିବାରୁ ସେମାନଙ୍କ ମଧ୍ୟରେ ବଚସା ହୋଇଥିଲା। ଏହାପରେ ଲକି ଓ ତାଙ୍କ ସାଙ୍ଗ ଏକ ପଥରରେ ଲୁଲୁଙ୍କୁ ଆକ୍ରମଣ କରିଥିଲେ। ଫଳରେ ଲହୁଲୁହାଣ ହୋଇ ଲୁଲୁ ତଳେ ପଡ଼ିଯାଇଥିଲେ। ସେ ମରିଯାଇଥିବ ଭାବି ସେମାନେ ଲୁଲୁଙ୍କୁ ଘୋଷାଡ଼ି ଘୋଷାଡ଼ି ନେଇ ନିକଟସ୍ଥ କୋଲାବ ନଦୀରେ ଫିଙ୍ଗି ଦେଇଥିଲେ। ଅନ୍ୟପକ୍ଷରେ ଦୀର୍ଘ ସମୟ ଧରି ଲୁଲୁ ଘରକୁ ନ ଫେରିବାରୁ ପରିବାର ଲୋକେ ଖୋଜାଖୋଜି କରିଥିଲେ ମଧ୍ୟ ତାଙ୍କୁ ପାଇ ନ ଥିଲେ। ଶୁକ୍ରବାର ପୂର୍ବାହ୍ନରେ ଲୁଲୁଙ୍କ ମୃତଦେହ କୋଲାବରେ ଭାସୁଥିବା ଦେଖି ତାଙ୍କ ମା’ ଟାଉନ ଥାନା ପୋଲିସକୁ ଜଣାଇଥିଲେ। ପୋଲିସ ଓ ସାଇଣ୍ଟିଫିକ୍ ଟିମ୍ ପହଞ୍ଚତ୍ ମୃତଦେହକୁ ବ୍ୟବଚ୍ଛେଦ ପାଇଁ ପଠାଇବା ସହ ତଦନ୍ତ ଜାରି ରଖିଛି। ଟାଉନଥାନା ଅଧିକାରୀ ଧୀରେନ ପଟ୍ଟନାୟକଙ୍କୁ ପଚାରିବାରୁ ସେ କହିଛନ୍ତି ଯେ, ଘଟଣାକୁ ନେଇ ଅଧିକ ତଦନ୍ତ କରାଯାଉଛି। ଲକି ମାଳୀ ବଡପିଲାଟା। ତାଙ୍କ ବୟସ ପ୍ରାୟ ୨୦ ବର୍ଷ ହେବ। ଶନିବାର ଲକିଙ୍କୁ କୋର୍ଟଚାଲାଣ କରାଯିବ। ତାଙ୍କ ସହ ଥିବା ନାବାଳକଙ୍କୁ ଜୟପୁର ଜୁଭେନାଇଲ ଜଷ୍ଟିସ ବୋର୍ଡରେ ହାଜର କରାଯିବ ବୋଲି ପଟ୍ଟନାୟକ କହିଛନ୍ତି। ସୂଚନାଯୋଗ୍ୟ, ଲୁଲୁ ଏବଂ ପୋଲିସ ହେପାଜତରେ ଥିବା ନାବାଳକ ଦୁହେଁ ଅଷ୍ଟମ ଶ୍ରେଣୀରେ ପଢ଼ୁଥିବାବେଳେ ଲକି ପାଠ ପଢ଼ୁ ନ ଥିଲେ।