ବଡବିଲ,୨୦।୯(ଦେବପ୍ରିୟ ରଣା): କେନ୍ଦୁଝର ଜିଲା ବଡବିଲ ଉପ-କାରାଗାରରେ ଜଣେ ବିଚାରଧୀନ କଏଦୀଙ୍କ ମୃତ୍ୟୁ ଘଟିଛି। ମୃତକ ଜଣକ ହେଲେ ଓଏମସି (ଓଡିଶା ଖଣି ନିଗମ)ର ଗୃପ-୪ ସିକ୍ୟୁରିଟୀ ସଂସ୍ଥାରେ କାର୍ଯ୍ୟ କରୁଥିବା ଯାଜପୁର ଜିଲା ବିଞ୍ଝାରପୁରର ତୁଷାର କାନ୍ତ ମଲ୍ଲିକ(୨୯)। ସ୍ତ୍ରୀ ଅନୁସୂୟାଙ୍କ ହତ୍ୟା ଅଭିଯୋଗରେ ସୋମବାର ରାତି ପ୍ରାୟ ସାଢେ ଦଶଟା ବେଳେ ସ୍ବାମୀ ତୁଷାରଙ୍କୁ ଜେଲ ପଠାଯାଇଥିଲାବେଳେ ମଙ୍ଗଳବାର ସକାଳେ ତାଙ୍କ ମୃତଦେହ ଜେଲ ଭିତରୁ ଉଦ୍ଧାର ହେବା ଘଟଣା ପୋଲିସର ତଦନ୍ତ ପ୍ରକ୍ରିୟାରେ ପୂର୍ଣ୍ଣଚ୍ଛେଦ ପକାଇଛି।
ସ୍ତ୍ରୀ ଅନୁସୂୟା ଆତ୍ମହତ୍ୟା କରିଥିଲେ ନାଁ ଅନୁସୂୟାଙ୍କ ପରିବାର ପକ୍ଷରୁ ଦିଆଯାଇଥିବା ମିଥ୍ୟା ଅଭିଯୋଗରେ ମ୍ରିୟମାଣ ହୋଇ ତୁଷାର ଜେଲ ଭିତରେ ଆତ୍ମହତ୍ୟା କଲେ ସେ ନେଇ ନାନା ପ୍ରଶ୍ନବାଚୀ ସୃଷ୍ଟି ହୋଇଛି।
ସୁଚନା ଅନୁଯାୟୀ, ତୁଷାର ମାଟକାମବେଡାସ୍ଥିତ କଳିଙ୍ଗ ନଗର କ୍ୱାର୍ଟର ନଂ-୨ ଆରଏ-୧୩ରେ ରହି ଓଏମସି(ଓଡିଶା ଖଣି ନିଗମ)ରେ ନିୟୋଜିତ ଗୃପ- ୪ ସିକ୍ୟୁରିଟୀ ସଂସ୍ଥାରେ
ସିକ୍ୟୁରିଟୀ ଭାବେ କାର୍ଯ୍ୟ କରୁଥିଲେ। ୨୦୨୦ ମସିହା ଜୁନ ୨୯ରେ ତୁଷାର ଖୋର୍ଦ୍ଧା ଜିଲା ଜଙ୍ଖତ୍ଆ ଥାନା ଅନ୍ତର୍ଗତ ଲେଖନପୁର ଅଞ୍ଚଳର ଅଜୟ କୁମାର ପଟ୍ଟନାୟକଙ୍କ ଝିଅ ଅନୁସୟାଙ୍କ ସହିତ ପ୍ରେମ ବିବାହ କରିଥିଲେ। ତୁଷାର ଓ ଅନୁସୂୟାଙ୍କ ଓରସରୁ ଏକ ୩
ବର୍ଷର କନ୍ୟା ସନ୍ତାନ ମଧ୍ୟ ରହିଥିବା ଜଣାପଡିଛି। ବାପା ଓଏମସିରେ ପିଅନ ଭାବେ କାର୍ଯ୍ୟ କରୁଥିବାରୁ ତୁଷାରଙ୍କ କ୍ୱାର୍ଟରକୁ ଲାଗି ଅନ୍ୟ ଏକ କ୍ୱାର୍ଟରରେ ମାଆ ଓ ସହିତ ବାପା ରହୁଥିଲେ। ତୁଷାରଙ୍କ ମାଆ ସସ୍ମିତାଙ୍କ କହିବା ମୁତାବକ ତୁଷାର ମଦ୍ୟପାନଧ୍ କରୁଥିବାରୁ ସ୍ବାମୀ ଓ ସ୍ତ୍ରୀଙ୍କ ମଧ୍ୟରେ ଅନେକ ସମୟରେ କଳି ହୁଏ। ରବିବାର ଦିନ ପ୍ରାୟ ୧୨ଟା ବେଳେ ଉଭୟଙ୍କ ମଧ୍ୟରେ କଳି ହୋଇଥିବାବେଳେ ଝିଅକୁ ନେଇ ତୁଷାର ନିକଟସ୍ଥ ଦୋକାନକୁ ଯାଇଥିଲେ। ଦୋକାନରୁ ଫେରି ଦେଖିବାବେଳକୁ ଭିତରପଟୁ କବାଟ ବନ୍ଦ ଥିବାରୁ ରାଗରେ ତୁଷାର କବାଟକୁ ଏକ ଶକ୍ତ ଗୋଇଠା ମାରିଥିଲେ। ଫଳରେ କବାଟଟି ଖୋଲିଯାଇଥିବାବେଳେ ସ୍ତ୍ରୀ ଅନୁସୂୟାଙ୍କ ଝୁଲନ୍ତା ମୃତଦେହକୁ ତୁଷାର ଦେଖିବାକୁ ପାଇଥିଲେ। ମାଆ ସସ୍ମିତା ଓ ପୁଅ ତୁଷାର ଅନୁସୂୟାଙ୍କୁ ବଡବିଲ
ଗୋଷ୍ଠୀ ସ୍ବାସ୍ଥ୍ୟ କେନ୍ଦ୍ରକୁ ନେଇଥିଲେହେଁ ତାଙ୍କୁ ଡାକ୍ତର ମୃତ ଘୋଷଣା କରିଥିଲେ। ଏ ନେଇ ଖବରପାଇ ପୋଲିସ ଘଟଣାସ୍ଥଳରେ ପହଞ୍ଚି ମୃତଦେହକୁ ଜବତ କରିଥିଲା।
ଅନୁସୂୟାଙ୍କ ବାପା ବଡବିଲ ପହଞ୍ଚି ଅନୁସୂୟାଙ୍କ ମୃତ୍ୟୁ ଯୌତୁକ ଜନିତ ହତ୍ୟା ବୋଲି ଲିଖିତ ଅଭିଯୋଗ କରିବାରୁ ପୋଲିସ ବଡବିଲ ଥାନା କେଶ ନଂ ୨୪୭/୨୦୨୪ରେ ଏକ ମାମଲା ରୁଜୁ କରି ସୋମବାର ତୁଷାରଙ୍କୁ ଗିରଫ କରିଥିଲା। ରାତି ପ୍ରାୟ ସାଢେ ୧୦ଟା ବେଳେ ପୋଲିସ ତୁଷାରଙ୍କୁ କୋର୍ଟ ଚାଲାଣ କରିଥିଲାବେଳେ ଜାମିନ ନାମଞ୍ଜୁର ହେବାରୁ ତାଙ୍କୁ ବଡବିଲ ସବ-ଜେଲକୁ ପଠାଯାଇଥିଲା। ଜେଲର କର୍ମଚାରୀଙ୍କଠାରୁ ମିଳିଥିବା ସୁଚନା ଅନୁଯାୟୀ ରାତି ପ୍ରାୟ ୩ଟା ପର୍ଯ୍ୟନ୍ତ ତୁଷାର ଶୋଇଥିଲେ। ଭୋର ପ୍ରାୟ ୪ଟା ବେଳେ ଜେଲର ଲୁହା ରେଲିଂରେ ଏକ ଗାମୁଛା ସାହାଯ୍ୟରେ ବେକରେ ଫାଶି ଲଗାଇତୁଷାର ଆତ୍ମହତ୍ୟା କରିଥିବା ଦେଖିବାକୁ ମିଳିଥିଲା। ଏ ନେଇ ବଡବିଲ ପୋଲିସ ଥାନା ଅପମୃତ୍ୟୁ ମାମଲା ସଂଖ୍ୟା ୩୪/୨୦୨୪ରେ ଏକ ମାମଲା ରୁଜୁ କରି ତଦନ୍ତରେ ସହାୟତା ନିମନ୍ତେ କେନ୍ଦୁଝର ଜିଲା ମୁଖ୍ୟାଳୟରୁ ସାଇଣ୍ଟିଫିକ ଟିମକୁ ଡାକିଥିବା ବଡବିଲ ଥାନା ଆଇଆସି ରମାକାନ୍ତ ମୁଦୁଲି କହିଛନ୍ତି। କୋର୍ଟ ଚାଲାଣ ପୂର୍ବରୁ ସ୍ତ୍ରୀ ଅନୁସୂୟାଙ୍କୁ ବହୁତ ଭଲପାଉଥିବା କହିବା ସହ ଅନୁସୂୟାଙ୍କ ବିନା ସେ ବଞ୍ଚିପାରିବେ ନାହିଁ ବୋଲି ତୁଷାର କହିଥିବା ଆଇଆସି ସୂଚନା ଦେଇଛନ୍ତି।