ଜନ୍ମଦିନରେ କରିଥାନ୍ତେ ନିଜ ରାଜନୈତିକ ପାର୍ଟିର ଲଞ୍ଚ, ହେଲେ ଥାଲାପଥିଙ୍କର ରହିଛି ଅଲଗା ପ୍ଲାନ
08 ନୂଆଦିଲ୍ଲୀ,୨୨।୬: ସାଉଥ୍ ସୁପରଷ୍ଟାର ଥାଲାପଥି ବିଜୟ ଚଳିତ ବର୍ଷ ଆରମ୍ଭରେ ନିଜର ରାଜନୈତିକ ଦଳ ତାମିଜାଗା ଭେଟ୍ରି କାଜଗାମ ଲଞ୍ଚ କରିଛନ୍ତି। କିନ୍ତୁ ଚଳିତ ଲୋକ ସଭା ନିର୍ବାଚନରେ ସେ ଭାଗ ନେଇ ନ ଥିଲେ କି କୌଣସି ପ୍ରାର୍ଥୀ ଉତାରି ନ ଥିଲେ। କୁହାଯାଉଛି କି, ଥାଲାପଥିଙ୍କର ନଜର ୨୦୨୬ ତାମିଲନାଡୁ ନିର୍ବାଚନ ଉପରେ ରହିଛି।
ସାଉଥ୍ର ସୁପରଷ୍ଟାର ଥାଲାପଥି ୨୦୨୬ରେ ହେବାକୁ ଥିବା ତାମିଲନାଡୁ ବିଧାନସଭା ନିର୍ବାଚନ ଉପରେ ନଜର ପକାଇଛନ୍ତି। ଏହାକୁ ନେଇ ସେ ତାଙ୍କ ରଣନୀତି ପ୍ଲାନ କରୁଛନ୍ତି। ତେବେ ବର୍ତ୍ତମାନ ପର୍ଯ୍ୟନ୍ତ ସେ ଆନୁଷ୍ଠାନିକ ଭାବେ ତାଙ୍କ ପାର୍ଟି ଆରମ୍ଭ କରିନାହାଁନ୍ତି। ସୂଚନା ଥିଲା କି, ତାଙ୍କର ୫୦ତମ ଜନ୍ମଦିନ ଅର୍ଥାତ ୨୨ଜୁନରେ ସେ ଆନୁଷ୍ଠାନିକ ଭାବରେ ତାଙ୍କର ପାର୍ଟି ଲଞ୍ଚ କରିବେ। ଏଥିପାଇଁ ଏକ ସ୍ଥାନ ମଧ୍ୟ ଚୟନ କରାଯାଇଥିଲା। କିନ୍ତୁ କାଲାକୁରିଚିରେ ହୋଇଥିବା ଘଟଣା ପରେ ସେ ତାଙ୍କ ଜନ୍ମଦିନରେ ସମସ୍ତ କାର୍ଯ୍ୟକ୍ରମକୁ ବାତିଲ କରିଦେଇଛନ୍ତି।
ବିଜୟ ୧୯୭୪ ଜୁନ ୨୨୩ରେ ତାମିଲନାଡୁର ମାଡ୍ରାସ (ବର୍ତ୍ତମାନ ଚେନ୍ନାଇ) ରେ ଜନ୍ମଗ୍ରହଣ କରିଥିଲେ। ତାଙ୍କର ସମ୍ପୂର୍ଣ୍ଣ ନାମ ଜୋସେଫ ବିଜୟ ଚନ୍ଦ୍ରଶେଖର, ଯିଏ ଏବେ ଥାଲାପାଥି ବିଜୟ ଏବଂ ଇଲାୟାଥାପାଥି ନାମରେ ମଧ୍ୟ ଜଣାଶୁଣା। ବିଜୟଙ୍କ ପତ୍ନୀଙ୍କ ନାମ ହେଉଛି ସଂଗୀତ ସର୍ଣ୍ଣଲିଙ୍ଗମ। ତାଙ୍କର ଦୁଇଟି ସନ୍ତାନ ହେଲେ ସାଜନ ସଞ୍ଜୟ ଏବଂ ଦିବ୍ୟା ଶଶା ଅଛନ୍ତି।
ବିଜୟ ଚଳଚ୍ଚିତ୍ର ଜଗତରୁ ଅନେକ ସମ୍ମାନ ପାଇଛନ୍ତି। ଏଥିମଧ୍ୟରେ ଷ୍ଟାର ଇଣ୍ଡିଆରୁ ଆଠଟି ପୁରସ୍କାର, ତାମିଲନାଡୁ ସରକାରଙ୍କ ଦ୍ୱାରା ତିନିଥର ଦିଆଯାଇଥିବା ତାମିଲନାଡୁ ରାଜ୍ୟ ଚଳଚ୍ଚିତ୍ର ପୁରସ୍କାର ଏବଂ SIIMA ପୁରସ୍କାରରେ ମଧ୍ୟ ସମ୍ମାନିତ ହୋଇଛନ୍ତି। ଏହା ବ୍ୟତୀତ, ତାଙ୍କର ରୋଜଗାର ଆଧାରରେ ସେ ଅନେକ ଥର ଫୋର୍ବସ ଇଣ୍ଡିଆରେ ୧୦୦ ସେଲିବ୍ରିଟି ତାଲିକାରେ ସ୍ଥାନ ପାଇଛନ୍ତି ।
ତାମିଲ ସୁପରଷ୍ଟାର ବିଜୟ ଚଳିତ ବର୍ଷ ଫେବୃଆରୀ ୨ରେ ତାମିଜାଗା ଭେଟ୍ରି କାଜଗାମ ନାମକ ଏକ ରାଜନୈତିକ ଦଳ ଗଠନ କରିଥିଲେ। ଏହାପୂର୍ବରୁ ତାମିଲ ସିନେମାର ଅନେକ ସୁପରଷ୍ଟାର ରାଜନୀତିରେ ପ୍ରବେଶ କରିଛନ୍ତି ଏବଂ ଯଥେଷ୍ଟ ସଫଳତା ହାସଲ କରିଛନ୍ତି । ତାମିଲନାଡୁର ପାଞ୍ଚ ଜଣ ମୁଖ୍ୟମନ୍ତ୍ରୀ ଅଛନ୍ତି ଯେଉଁମାନେ ଚଳଚ୍ଚିତ୍ର ପୃଷ୍ଠଭୂମିରୁ ଆସିଛନ୍ତି। ତେବେ ତାମିଲନାଡୁ ରାଜନୀତିରେ ବିଜୟଙ୍କ ନଜର ମଧ୍ୟ ରହିଛି। ତେଣୁ ଦଳ ଗଠନ ସତ୍ତ୍ୱେ ବି ସେ ଲୋକ ସଭା ନିର୍ବାଚନରେ ଏହାକୁ ସ୍ଥାନିତ କରିନାହାଁନ୍ତି। ନିର୍ବାଚନରେ କୌଣସି ଦଳକୁ ସମର୍ଥନ ମଧ୍ୟ ଦେଇନାହାଁନ୍ତି। ଏପରିକି ଏହାକୁ ଆନୁଷ୍ଠାନିକ ଭାବେ ଲଞ୍ଚ ମଧ୍ୟ କରି ନାହାନ୍ତି।
କାଲାକୁରିଚିରେ ବିଷାକ୍ତ ମଦ ପିଇ ୪୦ ଜଣଙ୍କର ମୃତ୍ୟୁ ହୋଇଥିଲା। ଏହା ପରେ ଥାଲପଥି ବିଜୟ ତାଙ୍କ ଜନ୍ମଦିନରେ ହେବାକୁ ଥିବା ସମସ୍ତ କାର୍ଯ୍ୟକ୍ରମକୁ ବାତିଲ କରିଛନ୍ତି। ଏହି ମଦ ଦୁର୍ନୀତିରେ ପୀଡିତଙ୍କ ପରିବାରକୁ ସାହାଯ୍ୟ କରିବାକୁ ସେ ତାଙ୍କ ପ୍ରଶଂସକଙ୍କୁ ନିବେଦନ କରିଛନ୍ତି। ତେବେ ସେ ଆଉ କେଉଁଦିନ ତାଙ୍କ ପାର୍ଟି ଲୟ୍ଚ କରିବେ ସେ ନେଇ ମଧ୍ୟ କିଛି ସୂଚନା ଦେଇ ନାହାନ୍ତି।