ଅହମଦାବାଦ,୩୦।୫: ଆଇପିଏଲ୍ ୨୦୨୨ରେ ଗୁଜରାଟ ଟାଇଟାନ୍ସ (ଜିଟି)ର ସଫଳତା ପଛରେ ଖେଳାଳି ତଥା କୋଚିଂ ଷ୍ଟାଫ୍ ମଧ୍ୟ ଏକ ପ୍ରମୁଖ ଭୂମିକା ଗ୍ରହଣ କରିଥିଲେ। ଆଇପିଏଲ୍ର ଏହି ନୂତନ ଦଳ ଆଶିଷ ନେହେରାଙ୍କୁ ମୁଖ୍ୟ କୋଚ୍ ଭାବେ ଦାୟିତ୍ୱ ଦେଇଥିଲା। ମୁଖ୍ୟ କୋଚ ଭାବେ ନେହେରା ଆଇପିଏଲ୍ରେ ଏକ ସ୍ବତନ୍ତ୍ର ରେକର୍ଡ ସୃଷ୍ଟି କରିଛନ୍ତି। ଆଇପିଏଲ୍ରେ ସେ ଏପରି ସଫଳତା ହାସଲ କରିଥିବା ପ୍ରଥମ ଭାରତୀୟ ହୋଇପାରିଛନ୍ତି।
ଆଇପିଏଲ୍ ୨୦୨୨ରେ ଆଶିଷ ନେହେରା ଏବଂ ହାର୍ଦ୍ଦିକ ପାଣ୍ଡ୍ୟାଙ୍କ ଯୋଡ଼ି ସୁପର ହିଟ୍ ହୋଇଥିଲା। ଅଧିନାୟକ ଭାବରେ ହାର୍ଦ୍ଦିକଙ୍କ ପାଇଁ ଏହା ଡେବ୍ୟୁ ସିଜିନ୍ ହୋଇଥିବାବେଳେ ମୁଖ୍ୟ କୋଚ ଭାବରେ ନେହେରାଙ୍କ ପାଇଁ ଏହା ପ୍ରଥମ ଆଇପିଏଲ୍ ଥିଲା। ଆଇପିଏଲ୍ ଇତିହାସରେ ନେହେରା ପ୍ରଥମ ଭାରତୀୟ ମୁଖ୍ୟ କୋଚ ଭାବେ ତାଙ୍କ ଦଳ ପାଇଁ ଆଇପିଏଲ୍ ଟ୍ରଫି ଜିତିଛନ୍ତି। ଏହି ସିଜିନ୍ ପୂର୍ବରୁ ଚାମ୍ପିୟନ ହୋଇଥିବା ଦଳର ମୁଖ୍ୟ କୋଚମାନେ ବିଦେଶୀ ଥିଲେ।
ମୁମ୍ବାଇ ଇଣ୍ଡିଆନ୍ସ ୫ ଥର ଆଇପିଏଲ୍ ଚାମ୍ପିୟନ ହୋଇଛି। ଏହିସବୁ ସିଜିନ୍ରେ ଦଳର ମୁଖ୍ୟ କୋଚ ମହେଲା ଜୟବର୍ଦ୍ଧନେ କୋଚ ରହିଛନ୍ତି। ଷ୍ଟିଫେନ୍ ଫ୍ଲେମିଂ ଚେନ୍ନାଇ ସୁପର କିଙ୍ଗ୍ସ (ସିଏସ୍କେ)କୁ ୪ଥର ମୁଖ୍ୟ କୋଚ ଭାବରେ ଚାମ୍ପିୟନ କରିଛନ୍ତି। ଟ୍ରେଭର ବାଇଲିସ ଦୁଇଥର ମୁଖ୍ୟ କୋଚ ଭାବରେ ଆଇପିଏଲ୍ ଟ୍ରଫି ଜିତିଛନ୍ତି। ଏଥିସହିତ ଟମ୍ ମୁଡି, ରିକି ପଣ୍ଟିଂ, ଜନ୍ ରାଇଟ, ଡାରେନ ଲେହମାନ ଏବଂ ଶେନ୍ ଓ୍ବାନର୍ର୍ ଥରେ ଆଇପିଏଲ୍ ଟାଇଟଲ ଜିତିଛନ୍ତି। ପ୍ରଥମ ଭାରତୀୟ ମୁଖ୍ୟ କୋଚ ଥିବା ଆଶିଷ ନେହେରା ଏବେ ଏହି ତାଲିକାରେ ପ୍ରବେଶ କରିଛନ୍ତି।