ନୂଆଦିଲ୍ଲୀ,୩।୧୨: ବର୍ତ୍ତମାନ ପର୍ଯ୍ୟନ୍ତ କୋଭିଡ ଦୁନିଆରୁ ଶେଷ ହେବାର ନା ନେଉ ନଥିବା ବେଳେ ଏବେ ନୂଆ ନୂଆ ଭାଇରସ ବ୍ୟାପିବାରେ ଲାଗିଛି। ଆଜିକାଲି ଆଫ୍ରିକୀୟ ଦେଶ ରୁୱାଣ୍ଡାରେ ମାରବର୍ଗ ଜୀବାଣୁ ମାଡିବାରେ ଲାଗିଛି ଏବଂ ଏହି କାରଣରୁ ୧୫ ଜଣଙ୍କର ମୃତ୍ୟୁ ମଧ୍ୟ ହୋଇଛି। ମାରବର୍ଗ ଜୀବାଣୁରେ ଶହ ଶହ ଲୋକ ସଂକ୍ରମିତ ହୋଇଛନ୍ତି ଏବଂ ଏହାର ବିପଦକୁ ଦୃଷ୍ଟିରେ ରଖି ପ୍ରାୟ ୧୭ଟି ଦେଶରେ ଯାତ୍ରୀମାନଙ୍କ ପାଇଁ ଏକ ସତର୍କ ସୂଚନା ଜାରି କରାଯାଇଛି। ମାରବର୍ଗ ଜୀବାଣୁ କାରଣରୁ ଲୋକଙ୍କ ଆଖିରୁ ରକ୍ତ ବାହାରିବା ଆରମ୍ଭ କରେ, ଯେଉଁଥିପାଇଁ ଏହାକୁ ବ୍ଲିଡିଂ ଆଇ ଭାଇରସ ମଧ୍ୟ କୁହାଯାଏ। ଆସନ୍ତୁ ଜାଣିବା ଏହି ଜୀବାଣୁ ସମ୍ବନ୍ଧୀୟ ଗୁରୁତ୍ୱପୂର୍ଣ୍ଣ ଜିନିଷ…
ବିଶ୍ୱ ସ୍ବାସ୍ଥ୍ୟ ସଂଗଠନ (ଡବ୍ଲ୍ୟୁଏଚଓ)ର ରିପୋର୍ଟ ଅନୁଯାୟୀ, ମାରବର୍ଗ ଭାଇରସ ଇବୋଲା ଭାଇରସ ପରିବାର ସହିତ ଜଡିତ, ଯାହା ଭାଇରାଲ ହେମୋରେଜିକ ଜ୍ୱର ସୃଷ୍ଟି କରିଥାଏ। ଏହି ଜୀବାଣୁ ଲୋକଙ୍କ ରକ୍ତ ଭେସେଲ୍ସକୁ କ୍ଷତି ପହଞ୍ଚାଏ ଏବଂ ଆଭ୍ୟନ୍ତରୀଣ ରକ୍ତସ୍ରାବର କାରଣ ହୋଇଥାଏ। ମାରବର୍ଗ ଜୀବାଣୁ ଏକ ଜୁନୋଟିକ ଜୀବାଣୁ, ଅର୍ଥାତ୍ ଏହା ପଶୁମାନଙ୍କଠାରୁ ମଣିଷଙ୍କୁ ବ୍ୟାପିଥାଏ । ଏହା ରକ୍ତ, ପରିସ୍ରା କିମ୍ବା ଲାଳର ସଂସ୍ପର୍ଶରେ ଆସି ମଣିଷକୁ ବ୍ୟାପିଥାଏ । ଏହି ଜୀବାଣୁ ଅତ୍ୟନ୍ତ ବିପଜ୍ଜନକ ଏବଂ ସଂକ୍ରମିତ ହେଲେ ମୃତ୍ୟୁ ହେବାର ସମ୍ଭାବନା ଅଧିକ ଥାଏ।
ଡବ୍ଲ୍ୟୁଏଚଓ ଅନୁଯାୟୀ, ମାରବର୍ଗ ଜୀବାଣୁର ଲକ୍ଷଣ ଇବୋଲା ଜୀବାଣୁ ପରି। ଏହି ଜୀବାଣୁ ସଂକ୍ରମିତ ହେଲେ ଲୋକମାନେ ଉଚ୍ଚ ଜ୍ୱର, ପ୍ରବଳ ମୁଣ୍ଡବିନ୍ଧା, ମାଂସପେଶୀ ଯନ୍ତ୍ରଣା, ବାନ୍ତି, ଗଳା ଯନ୍ତ୍ରଣା ଭଳି ସମସ୍ୟାର ସମ୍ମୁଖୀନ ହୋଇପାରନ୍ତି। ଗୁରୁତର ଅବସ୍ଥାରେ, ଏହି ଜୀବାଣୁ ଆଭ୍ୟନ୍ତରୀଣ ରକ୍ତସ୍ରାବ ଏବଂ ଅଙ୍ଗ ବିଫଳତା ସୃଷ୍ଟି କରିପାରେ, ଯାହା ଲୋକଙ୍କ ମୃତ୍ୟୁ ମୁଖକୁ ନେଇପାରେ। ଯଦି ଜୀବାଣୁ ସଂକ୍ରମଣ ଆହୁରି ବଢିଯାଏ. ତେବେ ଏହା ହଠାତ୍ ଓଜନ ହ୍ରାସ, ନାକ, ଆଖି, ପାଟି କିମ୍ବା ଯୋନୀରୁ ରକ୍ତସ୍ରାବ ଏବଂ ମାନସିକ ଦ୍ୱନ୍ଦ୍ୱ ଭଳି ସମସ୍ୟା ସୃଷ୍ଟି କରିପାରେ । ଏହି ଜୀବାଣୁ ପ୍ରଥମେ ୧୯୬୧ରେ ଜର୍ମାନୀର ଫ୍ରାଙ୍କଫର୍ଟରେ ମିଳିଥିଲା।