ଗଞ୍ଜାମ,୧୫ା୧୨(ଡି.ଏନ୍.ଏ.): ଗଞ୍ଜାମ ସହର ମଧ୍ୟରେ ଥିବା ସ୍ବାସ୍ଥ୍ୟକେନ୍ଦ୍ର ନୂତନ କୋଠାରେ ରୋଗୀ ସେବା ଆରମ୍ଭ ହୋଇଛି l ପୂର୍ବରୁ ‘ମେଡିକାଲର ପୁରୁଣା ଭଙ୍ଗା କୋଠାରେ ଚାଲିଛି ରୋଗୀ ସେବା’ ଶୀର୍ଷକ ଏକ ଖବର ‘ଧରିତ୍ରୀ’ରେ ପ୍ରସାରଣ ପରେ ଯୁଦ୍ଧକାଳୀନ ଭିତ୍ତିରେ ନୂତନ କୋଠାରେ ସେବା ଆରମ୍ଭ ହୋଇଛି। ପ୍ରଥମେ ଏହାର ଶୁଭାରମ୍ଭ ବେଳେ ଏନ୍ଏସି ଅଧ୍ୟକ୍ଷା ପ୍ରତିଭା ପାଢ଼ୀ, ଜେଡ୍ପି ତଥା ଆରକେଏସ୍ ଚେୟାରମ୍ୟାନ ସନାତନ ବେହେରା, ଆୟୁଷ ଡାକ୍ତର ବନୋଜକାନ୍ତ କର ପ୍ରମୁଖ ଉପସ୍ଥିତ ଥିଲେ। ନୂତନ କୋଠାରେ ପ୍ରଥମ ରୋଗୀ କଲ୍ୟାଣ ସମିତି ବୈଠକ ଅନୁଷ୍ଠିତ ହୋଇଥିଲା। ମେଡିକାଲ ଅଫିସର ସୌମ୍ୟକାନ୍ତ ମହାପାତ୍ର ଅଧ୍ୟକ୍ଷତା କରିଥିଲେ। ସମିତି ଜରିଆରେ ଆସୁଥିବା ଟଙ୍କା ମେଡିକାଲ ଉନ୍ନୟନ କାର୍ଯ୍ୟରେ ଖର୍ଚ୍ଚ କରିବା ଲାଗି ଆଲୋଚନା ହୋଇଥିଲା। ଫାର୍ମାସିଷ୍ଟ ଶ୍ରୀମୟ ରଥ, ସଂଯୁକ୍ତା ରାଣୀ ଜେନା, ଚନ୍ଦନ କୁମାର ମଲିକ, ରଶ୍ମିତା ପାଣିଗ୍ରାହୀଙ୍କ ସମେତ ଅନ୍ୟାନ୍ୟ ମେଡିକାଲ କର୍ମଚାରୀ ଉପସ୍ଥିତ ଥିଲେ।
