ଭୁବନେଶ୍ୱର,(ବ୍ୟୁରୋ)୧୪ ।୮: ସମୟ ଅପରାହ୍ନ ପ୍ରାୟ ସାଢେ ୪ଟା। ହଠାତ୍ ଭୁବନେଶ୍ୱର ରେଳଷ୍ଟେଶନର ପ୍ଲାଟ ଫର୍ମ ନଂ.୧ରେ ଏକ ବ୍ୟାଗ୍ରେ ବୋମା ଥିବା ପ୍ରଚାର ହେଲା। ଏହା ଶୁଣି ଲୋକେ ଏଣେତେଣେ ଦୌଡ଼ିବାକୁ ଲାଗିଲେ। ପ୍ଲାଟଫର୍ମ ଭିତରକୁ ଜିଆର୍ପି ଥାନା ପୋଲିସ ସହ କ୍ୟାପିଟାଲ ଓ ଖାରବେଳନଗର ଥାନା ପୋଲିସ ପ୍ରବେଶ କରି ବୋମା ଖୋଜିବା ଆରମ୍ଭ କରିଦେଇଥିଲେ। ପ୍ରଥମେ ପୋଲିସ ପକ୍ଷରୁ ପ୍ଲାଟଫର୍ମରେ ଥିବା ଲୋକଙ୍କୁ ତୁରନ୍ତ ସେଠାରୁ ଖାଲି କରାଯାଇଥିଲା। ୨୦ ମିନିଟ୍ ଭିତରେ କମିଶନରେଟ ପୋଲିସ୍ର ବୋମା ନିଷ୍କ୍ରିୟକାରୀ ଟିମ୍ର ସଦସ୍ୟମାନେ ସନ୍ଧାନୀ କୁକୁର ସହ ପ୍ଲାଟଫର୍ମ ନଂ.୧ରେ ପହଞ୍ଚତ୍ୟାଇଥିଲେ। ଏହାପରେ ସେମାନେ ସନ୍ଧାନୀ କୁକୁର ସାହାଯ୍ୟରେ ବୋମା ଖୋଜିବା ସହ ନିର୍ଦ୍ଦିଷ୍ଟ ଏକ ସ୍ଥାନରେ ଥିବା ବ୍ୟାଗକୁ ଚିହ୍ନଟ କରିଥିଲା। ଏହାପରେ ଉକ୍ତ ବ୍ୟାଗକୁ ସ୍ବତନ୍ତ୍ର ବାକ୍ସରେ ଭର୍ତ୍ତି କରାଯାଇ ତୁରନ୍ତ ଷ୍ଟେଶନରୁ ବହୁ ଦୂରକୁ ନିଆଯାଇ ନିଷ୍କ୍ରିୟ କରାଯାଇଥିଲା। ଏହା ରେଳ ଷ୍ଟେଶନର ସୁରକ୍ଷା ସଂକ୍ରାନ୍ତ ମକ୍ଡ୍ରିଲ୍ ବୋଲି ଜାଣିବା ପରେ ଯାତ୍ରୀମାନେ ଆଶ୍ୱସ୍ତ ହୋଇଥିଲେ।
ସ୍ବାଧୀନତା ଦିବସରେ ଆତଙ୍କବାଦୀମାନେ ସାଧାରଣତଃ ରେଳ ଷ୍ଟେଶନ ଭଳି ଜାତୀୟ ସମ୍ପତ୍ତିକୁ ଟାର୍ଗେଟ କରିଥାନ୍ତି। ସମ୍ଭାବ୍ୟ ଏଭଳି ଆକ୍ରମଣକୁ ପ୍ରତିହତ କରିବା ପାଇଁ ଏଭଳି ମକ୍ଡ୍ରିଲ୍ କରାଯାଇଥିଲା। ରେଳଷ୍ଟେଶନ ପରିସରରେ ବୋମା ଚିହ୍ନଟ ହେଲେ ତାହାକୁ କିପରି ନିଷ୍କ୍ରିୟ କରାଯିବ, କେଉଁ ବୋମା ନିଷ୍କ୍ରିୟ ଟିମ୍କୁ କେଉଁ ପ୍ରକାର ସହଯୋଗ କରାଯିବ ଏହାର ଏକ ସମ୍ପୂର୍ଣ୍ଣ ମକ୍ଡ୍ରିଲ ସ୍ବାଧୀନତା ଦିବସ ପୂର୍ବରୁ ରେଳଷ୍ଟେଶନରେ କରାଯାଇଥିଲା। ଏହି ମକ୍ଡ୍ରିଲରେ କ୍ୟାପିଟାଲ ଥାନାଧିକାରୀ ପଦ୍ମନାଭ ପ୍ରଧାନ, ଖାରବେଳନଗର ଥାନାଧିକାରୀ ରଜନୀକାନ୍ତ ମିଶ୍ର, ଜିଆର୍ପି ଥାନାଧିକାରୀ ଜୟଦେବ ବିଶ୍ୱଜିତଙ୍କ ସମେତ କମିଶନରେଟ ପୋଲିସର ବୋମା ନିଷ୍କ୍ରିୟକାରୀ ଟିମ୍ ଓ ସନ୍ଧାନୀ କୁକୁର ସାମିଲ ହୋଇଥିଲେ।